2 John1
1Niya peyakw kaa niikaanishkuwaat umaamuuayimihaauh chimasinahamaatin chiya kaa wiyaapamikuyin uchimaashkweu kaye maak Chitawaashiimach nimasinahamuwaauch. Eukw chiyawaau taapwe kaa saachihiitakuch. Namui maak mikw niya chisaachihiitinaawaau. Misiwe kaye anichii kaa chischeyihtahkwaau taapwewiniyuu chisaachihiikuwaauch.2Wesh chikanuweyihtenaanuu kaye chinanihiihtenaanuu taapwewin chitehiinaahch kaye maak ekut muush che ihtakuhch kaachiche.3Chishemanituu Uhtaawiimaau ekw maak Jesus Christ aniyuuh Uhtaawiimaau Ukusisa chika chishewaatutaakunuuch, chika chistimaacheyimikunuuch kaye chika miikunuuch chiyaameyihtamuwiniyuu. Taapwe ekun che ishi ayaayihkw e chischeyihtamuhkw taapwewin kaye saachihiiwewin.4Naashch taapwe nichii muuchicheyihten iskutak chescheyihtamaan pasch chitawaashiimach taapwewinihch e ishi pimaatisiitwaau mwehch aniyuu kaa itashumitahkw Uhtaawiimaau chechii ishi pimaatisiyuuhkw.5Anuhchiish maak chinitutamaatin chiya uchimaashkweu chechii saachihiituyihkw. Namui chimasinahamaatinaawaau e wiihtamaatakuch e uskaach kacheskwewin, muush chichii itikunaanuu chechii saachihiituyihkw iskunaak kaa pehtamuhkw miywaachimuwin.6Mwaau maak saachihiiwewin, chechii ihtuutamuhkw taan e itashumitahkw Chishemanituu. Eukw maak uu itashuwewin kaa miikuyihkw maauch niishtam kaa pehtamuhkw miywaachimuwin, chechii ishi pimaatisiihkw taan e ishi pimaatisiitwaau anichii kaa saachihaatwaau Chishemanituuh kaye wiichishaanuwaauh.7Mihchetu kaa wiyeshihiiwetwaau shaash papaamaachimuuch utah aschiihch e aanuwehtahkwaau taapwe e chii takushiniyich Jesus muhch naapeu e chii iteyihtaakusiyich. Uyuu maak e iteyihtaakusit awen eukw uu kaa suuhcheyimututawaat Christ kaye muush kaa wiyeshihiiwet.8Yaakwaamiikw maak ekaa chechii wanihtaayekw an tipahamaakusiiwin kaa aapatisiihkahtamekw chechii ayaayekw, taapwe chechii miskamekw misiwe taan e ishi ayeskuushtamaataakw Chishemanituu.9An awen ayiwaak kaa ishi chiskutamaachet taan e ishi Chiskutamaacheyich Christ kaye ekaa kaa nanihiihtuwaat taan kaa ishi chiskutamaacheyich namui ayaaweu Chishemanituuh. Ekw an awen muush yaakwaau kaa naanaakachihtaat taan e ishi Chiskutamaacheyich Christ taapishkun Uhtaawiimaau ekw maak Ukusisimaau wiicheweu.10Nituwaapamiske maak awen ekaa chiskutamaachet taan e ishi Chiskutamaacheyich Christ ekaawii piihtakahii chiichihch. Ekaawii mechim chika uhchi waachiyemaau.11Wesh an awen kaa waachiyemaat aniyuuh nitamukw kaa ishi chiskutamaacheyich wiichiheu e machituutamiyich.12Aat eshkw mistahii e ihtakuhch taan waa ititakuch, namui niwii masinahen taan waa itweyaan. Teyakuch nipukuseyihten chechii nituu chiyuutamitakuch wechiihch chechii ayimihiituyihkw ekw maak taapwe che miyeyihtamuhk.13Utawaashiimh an chiichishaaniskwemuwaau Chishemanituuh kaa wiyaapamikut chiwaachiyemikuwaauch.
Canadian Bible Society