Esekiéli25
Ñunsu kóntüra Amonna
1Aba lariñagun Aburemei nun:2—Liráü wügüri, gararaguabá hawagun Amonna, badimurehame lidan niri kóntüra hagía.3Ariñagabá houn lun haganbuni dimurei burí le lariñagubei Aburemei hawagu: “Huguya, wáguatün lau ugundani dan le harihinbei luagu wíyedawaaru lan nitenpulun, günrinwagua hageira Ísüraelina, barüwagua lílana Hudá adaürǘwa bóugudi luéi hageira.4Ligía nederegerubadün lubéi labun habafu lílana oubaü le ñéingiñe lubéi laboucha weyu, lun hanügüni humúan huéi, bunagua hagíame hakianpun ñein, ábame haganóun ñein. Héigibei halubahan, gurá hameime himiligin.5Nadügübei Rabá hábiñeme kameyu, adüganeime Amón hábiñeme mudún. Ábameti hasubudiruni luagu au lan Aburemeibei”.6—Nariñahare au le Aburemei: “Huguya Amonna, apouhaadün húhabu, achubaha huguya lau ugundani, barǘ huméi Ísüraeli kei ni kata.7Ligía niñuraali lubéi núhabu lun nabeichunün, ábame nederegerunün houn néchanigu, lun hanügüni sun le húmati huéi. Náhulahabadün haganaguagiñe gürigia, nagumuchaguagüdübadün haganaguagiñe néchanigu, nagünrinchagubadün sunsuinagubei. Ábameti hasubudiruni luagu au lan Aburemeibei”.Ñunsu kóntüra Moábüna
8—Nariñahare, au, le Aburemei: “Lariñahare Moabü luma Seirü luagu ítara liña lan Hudá kei híbiri néchanigu.9Ligía nadaaruba lubéi aban üma lóubawagugiñe Moabü, ábame nígiruni maburuguteruga lúmagiñe aban lígirugu lumoun le aban, uburugu burí le, le lirisinbei ageiraü: Betü-hesimótu, Baali-meón luma Kiriataimü.10Nadügüba lun hárügüdüni lílana oubaü le láfuachagüle weyu hamúan, bóugudin hawéi Amonna, maritawagúnhalime hawagu Amonna hadan néchanigu.11Nagünrinchagubaña Moábüna sunsuinagubei, ábame hasubudiruni luagu au lan Aburemeibei».Ñunsu kóntüra Edomuna
12—Nariñahare, au, le Aburemei: “Adügaali Edomu wuribati lun Hudá, lau ladügüni lira, gadurunhali.13Ligía nariñagunbei au, le Aburemei: Niñuraali núhabu lun nabeichuni Edomu, günringuanáñame lílana dandu gürigia kei animaalu. Nígirubei lidan günringuaü. Háfarawaguba gürigia tau eféin lúmagiñe Temangiñe darí Dedán.14Nafayeiragüdübei Edomu lau háhabu Ísüraelina ha numutuniña, hagíaba óuserei Edomu úaragua luma nigañi. Ítara luba hasubudiruni nafayeiragüdün. Au, le Aburemei ariñagubalin”.Ñunsu kóntüra Filistéana
15—Nariñahare au, le Aburemei: “Adügaaña Filistéana wuribati luagu binadu háganigua hama Ísüraelina, rúguaaña houngua lun hagünrinchagun.16Ligía nariñagunbei au, le Aburemei: Niñuraali núhabu lun nabeichuniña Filistéana; nagumuchaguagüdaaña Keretüna, nagünrinchagubaña ha erederubaña laru beya hádangiñe.17Wéiribei nabeichuniña, ani nafayeiragüdübaña sunsuinagubei luagu le hadügübei. Danme nadügüni, ábame hasubudiruni luagu au lan Aburemeibei”.Bible Society of Honduras