2 Samueli1
Laganbun Dawidi luagu lounwen Saulu
1Lárigiñe lounwen Saulu, aba lagiribudun Dawidi uburugun Sikülágü lárigiñe láfaraguniña Amaléküna, aba lerederun bián weyu ñein.2Gama lumoun luagu lǘrüwan weyu, aba liabin aban wügüri tídangiñe likianpun-agei Saulu hucheche ladaüragun, lau múa lábulugu le liseinin igarigu. Lachülürünbei ligibugiñe Dawidi, aba láhuduragun dagá lerebe múarugu arufudei linebenehabu.3Aba lariñagun Dawidi lun:—Haliagiñedibu san?
Lariñaga lun:
—Anuraharügütina tídangiñe hakianpun-agei Ísüraelina.4Lariñaga Dawidi lun:
—Fuleseihabubá nun, ariñagabéi nun! Ka lan suserebei?
Lariñaga lun:
—Anuraha wasudaranigu wuriburugugiñe, ani hilagua saragu hádangiñe, hilá giñe Saulu luma Yónatan le liráü.5Lariñaga Dawidi lun:
—Ida liñagia basubudiruni luagu hilá lan Saulu luma Yónatan?6Lariñaga lun:
—Luáguñadina wübü Gilübóa, ligía narihini Saulu balañu luagu larufunte, ani yarafaaña buga áganiñu lun hárügüdüni.7Lídanmeme oura ligía, aba ladigiragun lanagangiñoun, aba larihinina, aba lagúarun nun. Aba nidin lun.8Aba lálügüdünina kátana lan, aba nariñagun lun luagu Amaléküna nan.9Ábati lariñagun nun lun nayarafadun lun, lun náfaruni ladüga hilamémeeli, gama lumoun wínwangili.10Ábati nidin, aba náfaruni, ladüga narihini luagu siñati lan labagaridun lárigi léiguadun. Ábati nagidaruni liridin lábulugugiñe luma bángüli le luágubei larüna lun nanügüni bun, nabureme.11Ábati laheiridagunu Dawidi hama ha lúmabaña hadaüragun arufudei hagarigu,12aba hayahuahan lárigi Saulu luma Yónatan le liráü, luma luagu heferidiruni Ísüraelina wuribu, aba hayunarun darí lumoun rábounweyu.13Lárigiñe aba lariñagun Dawidi lun le buga anügübalin uganu lun:
Halíana buguya?
Lariñaga lun:
—Terencha au, Amaléküna.14Lariñaga Dawidi lun:
—Ida liñati biñurunbei búhabu lun báfaruni urúei le lanúadirubei Aburemei?15Ábati lagúarun lun aban hádangiñe lánigu, lariñaga lun:
—Áfarabei hilagubei!
Aba lagayuahan luagu Amaléküna ligía, aba líchugun aban buleseiti luagu, áfaragubeilei. Lubaragiñeti lounwen,16lariñaga Dawidi lun Amaléküna:
—Buguya guánarügü áfaragubei bungua, lugundun buguya guánarügü ariñagubei luagu báfarun lan urúei le lanúadirubei Wabureme.
Layahuahóuniwa Saulu luma Yónatan
17Aba leremuhani Dawidi ayahuni le luagu lounwen Saulu luma Yónatan,18aba lariñagun lun larufudahóun houn lumutuniña Hudá. Anihein ayahuni le bürüwañu tidan Liliburun le Richabei:19«Ísüraeli, günrinwagua buéirigun luagu wübü! Ábürühaaña ha ganigibaña!20Mariñaga huméi katei le uburugu Gatü, mabahüdagun humeime lidan burí lémeri uburugu Asükalón, luéi hagundaaragun würiña Filistéana, luéi hachubahan gibe tubungiutegu ha.21Mábürühadigiala huya ni serenu luagun burí luwübüri Gilübóa, ladüga áraabu lánina óunweni ligía! Ñein ladügürawagúa hadaüdina wügüriña ganigitiña. Ñein leferidirei lidaüdina Saulu límirin.22Magiribudúnñahati Saulu luma Yónatan, madüdüragüdünga hamoun hefeinte lau hata luma hagüle wuriburuguna ganigitiña.23Hínsiñeguatiña buga Saulu luma Yónatan houngua, mafanreinrawaguntiña ni lidan habagari, ni lidan hounwen. Furesetiña meha sügǘ hau ágila! Here sügǘ hau liñún!24Würiña lirahüñü Ísüraeli, hayahua lárigi Saulu, le meha adaüraguagüdübalün tau gamisa funatu tuma linu fínutu, le meha ewendedagüdübalün lau golu.25Ábürühaaña ganigitiña wuriburugu! Hilaadibu Yónatan iñu libiti buwübüri!26Hírutina bárigi níbiri Yónatan! Ma meha lubuidun bóuserunina! Wéiritimati meha bínsiñehabu nun sügǘ lau hínsiñehabu würiña.27Ábürühaaña ganigitiña! Günrinwagua burí áruma!»Bible Society of Honduras