2 Samueli2
Larúeihan Dawidi Hudá
1Lárigiñe le, aba lálügüdahan Dawidi luma Wabureme, lariñaga lun:—Neiba san lidan aban lídangiñe luburugute Hudá?
Lariñaga Wabureme lun:
—Anha, beiba.
Ábati lálügüdahan Dawidi, lariñaga:
—Haliabagia nidin?
Lariñaga Wabureme lun:
—Beiba uburugu Ebürón.2Aba lidin Dawidi ñein hau bián lúmarigu, Ainoamü to Hesüreelina, tuma Awigaili to meha lúmari Nawali le Karümélina dan wínwangili.3Barǘ lumutiña giñe lánigu hau sun liduheñu kada aban, aba haganóun uburugu Ebürón.4Lárigiñe aba hachülürün lílana Hudá, aba hanúadiruni Dawidi kei lurúeite Hudá.
Dan labahüdawagunbei lun Dawidi luagu lílana lan Habesi ábunubalin Saulu,5aba lóunahan Dawidi ariñaga houn:
—Binilaün Wabureme luagu hábununi Saulu.6Óuseralaün Wabureme lau areini luma úarani. Au, luéigiñe nóubadina, nóuserubadün buidu luagu katei le hadügübei.7Gama lumoun guentó gaguraasun humá ganigi huguyame, lugundun íbini hilá lan Saulu, anúadira láadina lani Hudá türibu lun au lan lurúeite.
Hawuribuhan Ísüraelina hama Hudaana
8Gama lumoun aba lanügüni Ábünerü le liráü Nerü, le hábuti lisudaranigu Saulu Isü-bosetü le liráü Saulu uburugun Manaímü,9aba lanúadiruni lun lurúeiteme Galaadü, Gesurí, Hesüreeli, Éfürain, Benhamín luma sun Ísüraeli.10Bián-wein-biama irumu lau Isü-bosetü dan le lagumeserunbei arúeiha Ísüraeli, aba larúeihan bián irumu. Ánhañati lánigu Hudá, Dawidi hasubudirubei kei urúei,11aba lubeiti larúeihan Dawidi sedü irumu sisi hati Hudá, Ebürónñoun meha lúbaana larúeihan.12Ábati láfu ridun Ábünerü Manaimügiñe lun uburugun Gabaón habá habá lisudaranigu Isü-bosetü.13Aba láfuridun Hoabü le tiráü Seruiá hau lisudaranigu Dawidi Ebüróngiñe, aba hadunragun hama lubadu lufusun Gabaón. Ábati hesetiragun houngua aban sétanu luéigiñe aban oubaü libiti fusu, le aban luéigiñe le aban oubaü.14Ábati lariñagun Ábünerü lun Hoabü:—Furí hamá nibureinhaña ageindagua wagibugiñe.
Lariñaga Hoabü lun:
—Anha, furí hamá.15Ábati háfuridun duusu súdaragu nibureingiña lun hageindagun luéigiñe lóubadina Benhamín luma Isü-bosetü, le liráü Saulu, hama duusu luéigiñe hóubadina lánigu Dawidi.16Aba lárügüdüni kada aban lágani lábulugugiñe aba láchourunu lefeinte lóubawagun, aba lubeiti hóunwegun súngubei úara. Ligía tuwübüri Eféin lubéi líribei fulasu ligía le uburugubei Gabaón.17Dereti wuribu ligía luagu weyu ligía, aba hagañeiruni lisudaranigu Dawidi wuribu luagu Ábünerü hau lisudaranigu Ísüraeli.18Ñéinñañu ǘrüwagubei lirahüñü Seruiá: Hoabü, Awisái luma Asaeli. Óufuti meha Asaeli,19aba léibaagun lárigi Ábünerü mígirunga chansi lun lesefurun.20Dan ladigiragunbei Ábünerü lárigoun, aba lagúaragun:
—Ma Asaeli buguya!
Lariñaga Asaeli lun:
—Anha, au!21Ábati lariñagun Ábünerü lun:
—Hebé béibaahanina. Ragüba aban hádangiñe musu, banügeime sun le lúmabei bánime.
Gama lumoun kei merede lan léibaahani Asaeli,22ábaya lariñagun Ábünerü lun:
—Hebé béibaahanina, anhein merede béibaahanina, náhuchurubadibu múarugun, kábameti nigibu lun Hoabü le bíbugaña?23Kei maha lubéi Asaeli lígiruni léibaahani, aba límiruni Ábünerü tau tígiri lefeinte luagun luragei, aba táfuridun luéigiñe lanagan, aba lounwen Asaeli ñein. Sunti ha achülürübaña lidoun fulasu le ñein lubéi lábürüha Asaeli ounwe, ábaha hararamun lun harihini.24Gama lumoun aba lasigirun Hoabü luma Awisái éibaahei Ábünerü. Dan larabachunbei weyu, ligía hachülürün luagu luwübüri Amá le ligibugiñebei Gia, luagu lémeri fulasu mageirawati le lani Gabaón.25Aba hóundaragun lánigu Benhamín luma Ábünerü ñein, aba hadügün hábiñe luagu lábulugu wübü.26Ábati lagúaragun Ábünerü ariñaga lun Hoabü:
—Magumuchagunbei san áfarahani le? Marihin bumuti san luagu igarigurügüba lan lanüga katei le woun? Ídaba san bariñaga houn bánigu lun lerederun héibaahaniña hábirigu?27Lariñaga Hoabü lun:
—Fiñutina bun luagu Wabungiute luagu lun lan hamuga mariñagun ban ítara héibaahamemeñanu lan hamuga nánigu hábirigu darí larugadun.28Lárigiñe aba lariñagun Hoabü lun tinwinrún fidu, aba lararamagun héibaahaniña gürigia Ísüraelina, rárama hageindagun hama.29Aba léibuguni Ábünerü hau lánigu fulasu mawübüriti le lani Arawá sun áriebu ligía, aba hadüraaguni üma luéigiñe Hordán luma Bitürón, aba hachülürün Manaímü.30Aba lerederun léibaahani Hoabü Ábünerü, aba lóundaruniña sun lisudaranigu, dan labahüdünbaliña, hilaguaaña disinéfu úfisigu bóugudin luéi Asaeli.31Gama lumoun áfaratiña lánigu Dawidi ǘrüwa-san-ǘrüwa-wein hádangiñe lánigu Benhamín luma Ábünerü.32Lárigiñe aba lanügǘn lúgubu Asaeli uburugun Belén, aba labunún ñein, lidan lumuaha lúguchi. Aba léibugun Hoabü hau lánigu sun áriebu ligía, larugan binaafin ligía hachülürün uburugun Ebürón.
Bible Society of Honduras