Basahin ang Pauro saro peba owera ie Iesu urubia aboto Tesaronika ato na-irowomidirotiti 2

Pauro saro peba owera ie Iesu urubia aboto Tesaronika ato na-irowomidirotiti2

Ubauba ia tanaro dubu ro amadi-orowapotai-ri.

¹Nimo Abera Naramu Iesu Keriso korowameai tau sapuwo to, ibose nimo Godi ro nou aboto kidabuai sapuwo to, nio nou sapuwo to imowauti rie. Mo niramio,²nirimagare babio, arua urubia ro karasaubuti owera obodorouti-dioumo. Nedi karasaubuti owera ro ibo iamo Abera Naramu nedi sopu duriomoro ro neito ta-gorowameai-die. Mea se! Nedi owera ro neibi owera to ararapoi rie, ibo Pauro bi aboudo ou-diomo. Kaupoti neibi aboudo ou pua. Nedi karasaubuti owera ro neio ro erere mino to obodorouti-dumo, idaibo ipusu owera to, kimowauti owera to, o peba titi owera to obodorouti-dumo. Kaupoti idaibo owera sapuwo to mibo kimaragoidiro iworohuti mamo, ibose nou sapuwo to tere eremati mamo!³Mea se! Neio edi karasaubuti owera ro nio modobo pua kimuruai. Nio modobo pua arua urubia ro erere mino to kisaubuti.
Mabu Iesu ido to amadi-orowameai-ri, tauo tanaro teibo kebase amadi-ororosioidiro-ri. Urubia sirio Godi edi morobise gabo ro neido amadima-aragarewado-ri, ina iedi dubu ro sabi auna se na-isebotiti, nu simara sosoro nato amadi-orowapotai-ri. Nedi dubu ro Godi ro kebase ta-gemapoi womu tato womu tato ubauba kowea aboto.

⁴Imese beda mutu kemowaibiti tanaro urubia ro na-isioidiro-dumo, nedi dubu ro neio nou ro ama-iwaruriauti-ri. Nou auna se ama-orowiourio-ri, ina beda urio ra, o beda orora ra, urubia ro na-irorutiti-dumo, neio nou ro sopu to amadi-iauri-ri. Ina noudo ie nu Godi edi Tarena Moto ro nato ama-omidiro-ri, nu ibo ama-eremowabu-ri, ‘Mo Godi kaupoti nou se ie, mo se demowabu-rimo.’

⁵Mo nio mutu na-nimidirotiti, nio mo ro nedi dubu ro nou sapuwo to owera ta-nimowautiti, nio ro a-emaragoidiro-dumo ra?⁶Nio abora umoro ie nedi ubauba dubu ro korowapotai moro rido etou ro odiobuti. Nu tau Godi ro keba se ta-gemohodowa, sosoro nato amadi-owapotai-ri.⁷Mabu nedi tau ro nato Godi edi sabi kisebo tanaro ro piro se tororosioidiro-dumo, ina nedi sabi kisebo tanaro ro urubia ubi nou ro imowaititi ubauba tanaro aise isioidiro ri. Ina nou etu ro odiobuti, saiki ata nu Godi ro gabo humo rido ama-owatateai-ri.⁸Iato tuturu to owamo-ri pua, nedi ubauba ia tanaro dubu urubia ro sosoro nato amadimo-owea-ri. Kaupoti Abera Naramu Iesu namadi-ou-ri, nedi ubauba ia tanaro dubu Iesu ro ama-atodai-ri, iato nu masiro aise ama-oroporeai-ri. Nou ro Iesu nama-owea-ri beneniobenenio se namadi-orowapotai-ri, nu edi benenio ro nou ro ama-opia-ri.

⁹Tauo keba se ubauba ia tanaro dubu nu pupuwo korosa Satani ro ama-omio-ri, nu woko Satani pupuwo to ama-osioidiro-ri. Nou ro erere pupuwo korosa tanaro ama-isioidiro-ri, duriomoro urubia isaubuti rie. Nou ro ibose aborabora tanaro ama-isioidiro-ri.¹⁰Nou ro nedi ubauba karasaubuti tanaro sirio ro nama-isioidiro-ri, urubia etio ra urio pamo namadimi-iauri-ri, neio nou ro idaibo mino to ama-imatigi-ri. Nedi urubia ro urio pamo amadimi-iauri-ri mabu neio ubi tato keba se goi-rimo morobise owera ibodoro ri. Neio ro nedi morobise owera ro kimibiria rasiri ie, neio Godi ro ubauba aboudo ba-giapopo-ro.¹¹Neio ubi tato goi-rimo kamade ro kiwati Godi edi morobise owera ro nou sapuwo to. Ina noudo ie neio Godi ro ubi imaremo bagea karasaubuti owera aise imibiria ri. Neio ro nedi karasaubuti owera ro namadimi-imibiria-ri¹²neio Godi ro koto aise ama-iwai-ri ina ubauba wisa ama-imio-ri. Mabu nedi urubia ro neio ro morobise owera Iesu sapuwo to imibiria pua, ubauba tanaro kisioidiro sapuwo to kamade auna se erematiti-dumo.

Kimibiria maumo ato koko se dorowotoi

¹³Mo niramio, Abera Naramu ro nirimagare na-imatiti, neibi ro eso owera nio sapuwo to aise niarotiti-bimo, ina neibi ro modobo ie idaibo tanaro sirio tau aise kisioidiro. Mabu Godi ro duriomoro ido to gosioidiro, nio nou ro nato gihodowa ubauba aboudo iapopo ri. Nio Tarena Urio ro tarena ia tiwaititi, ina nou edi woko ro neito nio Godi ro nato giapopo-ro. Ibose nio na-imibiria-dumo morobise owera Iesu sapuwo to, nio Godi ro ubauba aboudo neito giapopo-ro.¹⁴Neibi ro nedi mea owera ro na-nimowautiti-bimo, nio Godi ro neito girapoi-ro. Mabu Godi ubi ie nio awawo to orowomidiro ri, nimo Abera Naramu Iesu Keriso Adiri sabowa ato beda sosoro omidiro-die auna to.

¹⁵Ina noudo ie niramio koko se ba-dorowotoi, neibi ro keba se beda kitamudiro niwou-birimo, koko se dirobidiro-mo. Neibi matagoro rido beda owera ro gosuruwo-rimo, ibose nio aboto beda peba owera nisioidiro-birimo, nou se ba-dibodoro-mo.

¹⁶Nimo Abera Naramu Iesu Keriso nakara se nou se ie, nimo Abera Godi mutu, neitiro ro nio pupuwo aise ba-mimowaititi-do meamea tanaro kisioidiro sapuwo to, ina sirio tau mea owera se korowauti urubia aboto. Godi auna nirimagare ie nimo aboto, nou edi wisa tato nirimagare ro nou maumo ato, nimo nou ro pupuwo womu tato se aise nimowaititi, ibose nimo nou ro umoro ti-niwaititi-die ibo nimo womu tato keremiro anamadimo-owea-ri.