Read Pauro saro peba owera ie Iesu urubia aboto Tesaronika ato na-irowomidirotiti 1

Pauro saro peba owera ie Iesu urubia aboto Tesaronika ato na-irowomidirotiti1

¹Mo masiro Pauro ie, nedi peba titi owera ro neibi ro nisioidiro-birimo Sairasi ra Timoti ra mutu. Nio Iesu urubia iato na-orowomidiro Tesaronika sabowa ato nio aboto nisioidiro-birimo nedi owera ro. Nio imese Abera Godi urubia ie, ibose Abera Naramu Iesu Keriso nou urubia ie.²Abera Godi, Abera Naramu Iesu Keriso mutu nio neitiro ro wisa tato se ba-miwarebidirotiti-do, ibose neitiro edi miro ro nio niro turi ato aise ba-miamotiti.

Iesu amadi-orowameai-ri urubia wisa imio ri

³Niramio iato na-orowomidiro, nio sapuwo to eso owera neibi ro aise niarotiti-bimo. Ina neibi ro sirio tau idaibo tanaro modobo ie aise kisioidiro. Mabu nio Godi ro kimibiria auna aise imowaititi, ina nio abato edi nirimagare ro na-owamo nio neito irematiti-dumo, iedi nirimagare ro nio abato iroromai.⁴Ina noudo ie nio neibi ro a-nimowabutiti-bimo Iesu urubia abato arua duriomoro ato na-orowomidiro. Mabu nio koko se beda mino to irowotoititi, nio arua urubia aboudo temeteme na-iaurititi-dumo ina koko tau na-iauri-dumo, nio kimibiria aise iamotiti.

⁵Nio aboto edi tanaro ro na-irorosioidiro-dumo, nio neio ro iwapotaidiro-dioumo ibo Godi ro edi kimeouti tanaro ro, imese tuputupu ia se imeoutiti-die. Nedi mabu ro noudo ie nio Godi ro masiro nato amadi-iasoro-ri ibo nio modobo ie Godi edi kiwaboi tanaro ro neito aise kodoro. Mabu nio ro koko tau, temeteme na-iauri-dumo, Godi edi kiwaboi tanaro ro nou sapuwo to iaurititi-dumo.⁶Godi mea tuputupu dubu e, nou ro tuputupu tanaro se isioidirotiti. Ina noudo ie nio temeteme etio ro imiotiti-dumo, wisa neio aboto Godi ro ama-iwame-ri.⁷Nio abora mibo maumo ato na-orowomidiro, ido nio neibi mutu atu se Godi ro mibo aboudo anama-iwagarewado-ri, mabu Godi mea tuputupu tanaro dubu e. Nedi tanaro ro Godi ro nato amadi-isioidiro-ri, Abera Naramu Iesu Adiri sabowa rido edi tau ato namadi-orowapotai-ri. Abera Naramu korowameai tau ato, nou edi pupuwo sowake urio sirio ro neio mutu, era se amadimi-irarubiauti-ri.⁸Etio ra ubi tato na-iamo Godi aboto, neio nou ro ubauba wisa ama-imio-ri. Ibose etio ra Iesu edi mea owera ro ibodoro tato, wisa Abera Naramu ro ama-imio-ri nou korowameai tau ato.⁹Neio womu tato womu tato ubauba imese aise ama-iwaititi-ri, Abera Naramu sosoro gabo rido musomuso imese amadimo-oititi-ri, ibose nou edi auna ia pupuwo ro nou aboudo.¹⁰Abera Naramu edi tau ato namadi-orowameai-ri, nu edi tarena urubia ro neio ro amadime-emowabu-ri. Imese sirio urubia nou sapuwo to na-gimibiria-rimo ro nou neio ro amadime-emowabu-ri. Nio nedi soirio ro nato ama-orowotoi-ri, Abera Naramu nio ro atu se nato amadime-emowabu-ri. Mabu nedi mea owera ro neibi ro na-nimowautiti-bimo, nio ro ta-gimibiria-rimo.

¹¹Ina noudo ie nio sapuwo to neibi ro Godi sirio tau aise naratorotiti-bimo, nio Godi ro modobo iwaititi ri nu ubi beda sosoro owamo-die nio mea se korowomidiro aboto. Godi edi pupuwo ro neito nio ba-miwarebai, nio abato beda meamea ubi ro iamotiti durupi to isioidiro ri. Nedi meamea ubi ro nio abato iamotiti, mabu nio Iesu Keriso edi mea owera ro ta-gimibiria-rimo.¹²Neibi ro nedi kararatoro owera ro Godi sirio tau aise nararatorotiti-bimo, mabu neibi ubi ie arua urubia ro nimo Abera Naramu Iesu masiro kowoubua, nio neio ro kiauri ato. Ibose nio nou ro ama-imowabu-ri. Nedi tanaro sirio ro Abera Godi, Abera Naramu Iesu Keriso mutu, neitiro ro amadi-isioidiro-ri neitiro edi wisa tato nirimagare ro neito.