তিতোস2
1আদো নাতিহা আজিপ্পা ঝিপাওয়াতা নিওয়া নুওয়াংবিরাং, ঝিপাকো জো।2ওয়ারাংপাবিহিংয়া আপনিকো মেংতাওয়া ইচ্ছাহিং য়োইমসাসা এওয়া, ইজ্জত মুংওয়া য়োগ্য়্যতা, নোচেংতা, চোসোপা দেংওয়াতা, জেজেংওয়াতা, আসা সহায়ওয়াতা সাডুংপা য়ুংকো ঝিপা।3এপারাং পবিত্র সাদিতা য়ুংওয়াবিহা হেপা য়ুংনেকোমে তাওয়া নুওয়াংহা মেরেংমা মেমেবিহিং ঝিপা। আবিহা কারণ মোতোপা দোসরাবিহিং দোষ মালাগাইকো, আবিহা পুটকুই আংওয়া লোংস্ত্যাইওয়াতা মোপোরেকো, আদো দোসরাবিহিং এনতাওয়া নুওয়াংবি ঝিপাকো।4এপাবেমি জিংনাহা আবিহা নামেরি মেমেবিহিং আপনিকো ওয়া আসা চেংবিহিং জেজেংপা জোকো তালিম পিচাকো ছুরোওয়া।5আসা আবিহা নামেরিবিহিংয়া আবিকো জুপাকো ইচ্ছাহিংয়া য়োইওয়া, পবিত্র তুংসিং জিংওয়া, লামতুওয়া, সাহিং এনতাপা কাংওয়া আসা ওয়াকো জাংওয়াবি হিংকো তামসা তালিম পিচাকো চুরোওয়া। এপামি জিংনাহা সেংজাকো ঝিপাওয়াহা বদনাম মাজিংরোওয়া।6এপারাং ওয়াংটেংটেংগেংবিহিংনে আপনিকো ইচ্ছাহিং য়োইমসা য়ুংকো ঝিপা।7নাকো জোওয়া তাংসা কামতা উদারণ জিংমসা আপনিহিং তিংপা, আসা নাকো ঝিপাওয়াতাহা, ইমানদার, গম্ভীরতা নিকো,8আসা হাংসুরে নিন্দা জোকো মোমুংওয়া আজিপ্পা য়্যইদি ঝিপা, আত্রংহা এপামি জিংনাহা য়োংকো তোইতা হাইরে মেংতাওয়া নুওয়াং য়্যইমক্যইওয়াকো সোতা তাইবি লারাইরাং লেফেপুরোওয়া।9ডেইয়াবিহিংনে আপনি আপনিকো গিরিকো জাংওয়া নুওয়াংবি মানেমসা তাংসা নুওয়াংবিতা গিরিহিং গাগ্রুপা জোকো তামসা ঝিপা, আবিহা গিরিবিহিংপা লাডু মোয়্যইকো।10আবিহা গিরিওয়াকো জিনিসিবি মুকুইকো। আদো হাত্রংদো আবিহা চোসোপা আসা দেংওয়াতা নিও তামসা আপনিহিং তিংপাকো। এপাবেমি জোনাহা দোসরা দিংঙাবি কাংনুরে য়াংবিহিং মুক্তি পিচাওয়া সেংজাকো ঝিপাওয়াকো ইজ্জত জিংরোওয়া।11হাংপাতানাহা তাংসা দিংঙাবিহিং মুক্তি পিচাকোরাং সেংজাকো অনুগ্রহহা তিংরেমগা।12ই অনুগ্রহসোরাং য়াংবিহিংয়া আপনিকো মেংতাওয়া সাদি আসা বাসিমতিকো কেপা পাংওয়াহিং ল্যাপামগা, আসা ই অনুগ্রহকো সোরাং য়াংবিহা আপনিকো ইচ্ছাহিং য়োইমসা ই বাসিমতিতা তাংজি আসা এনতাওয়া সাদি পেংপাকো চুরোওয়া।13এপারাং আশা এওয়া নুওয়াং তাংসা জিংওয়া দিনকো ন্যাতা কাবি কাংদিংয়ো। আত্রংকো দিনহা টেবো সেংজা আসা য়াংবিহিং মুক্তি পিচাওয়া ইশু খ্রীষ্টকো মহিমা তিংরোওয়া।14ইশু খ্রীষ্টহা য়াংবিহিংয়া তাংসা পাপসো ছুটকারা পিচাকো তামসারাং য়োংকো সোতা সিপুমগা, আকুহা য়াংবিহিংয়া চোসোপা জোকো, আপনিকো বানাইকো আসা চোসোওয়া কামতা ইচ্ছা জোকো সোতা এপা জোমগা।15নাতিহা ই নুওয়াংবি ঝিপা, পুরা অধিকার নিপা দেংওয়াবিহিং হোসলা পিচা আসা য়েং। হাংসুহিংনে নাতিহা মেংতাপা হেলা জোকো মৌকা মিচা।
The Seed Company