তিতোস3
1আউতা নিওয়া দিংঙাবিহিং সরকার আসা সরকারি দিংঙাবিকো অধিকারতা য়ুংনেরোওয়া তামসা ঝিপা। আসা আবিহা তাংসা এনতাওয়া কাম জোকো তৈয়ার জিংকো।2আবিহা হাংসুহিংনে বদনাম মোজোকো আসা হাংসুহিংপারে মাস্যাসুকো, আদো তাংসা দিংঙাবিহিংপা সিদা আসা নম্র জিংমসা য়ুংকো।3হাংপাতানাহা সেংজাকোতা দেংওয়ারোমা নাগাইহা কাবিরে তোউজি আসা জাংওয়া মামানেমসা ল্যইচপুওয়া নিমগা, কাবিহা মেংতাওয়া ইচ্ছাবি আসা তাংসা কিসিমকো য়াংতা-কেতাওয়াকো ডেইয়া জিংপুমি নিমগা। কাবিহা দোসরাবিকোতা মেংতাওয়া ওয়াংকো তামসা নোওয়া আসা মিচাওয়া দিংঙা নিমগা। দোসরা দিংঙাবিরে কাবিহিংয়া আচকাপা জোমগা আসা কাবিরে আবিহিংয়া আচকাপা জোচাংগা।4আদো হাত্রং য়াংবিহিং মুক্তি পিচাওয়া সেংজাকো লামতুওয়া, আসা জেজেংওয়া তিংরে,5আত্রংহা য়াংবি আপনিবি এনতাওয়া কাম জোওয়াকো সোতা মোকো, আদো সেংজারাং য়োংকো তোইতা লামতুপা জোমসা মুক্তি পিচামি নিও। আকুহা পবিত্র লাংবেসো য়াংবিহিং দুমসা চুবে কেপায়ে আসা চুবে সাদি পিচায়ে।6সেংজাহা য়োংকো উদ্ধার জোওয়া ইশু খ্রীষ্টকোসো কাবিকো তোইতা পবিত্র লাংবে সিওপারাং পিচামি নিও।7এপারাং আকো অনুগ্রহসো কাবিহা সেংজাকো নাগাইতা তাংজি জিংকো চুয়ো, আসা কাবিকো আশা জোওয়া হাত্রংরে মিসিওয়া সাদিকো হাক মুংমি নিও।8ই নুওয়াংহা আজিপ্পারাংগা। নাতিহা সেংজাকো তোইতা দেংওয়াবিহিংয়া চোসোওয়া কাম জোকো ধ্যান পিচাকো তামসা নাতিহা জোর জোওয়া কা ইচ্ছা জোরোওয়া, হাংপাতানাহা ই ঝিপাওয়া পিচাকোরাং তাংসা দিংঙাবিকো সোতা এনতাওয়া আসা ত্যইংদ্যা নিও।9আদো তোউজি নুওয়াংবি আসা আটা আজাবিকো মিংচিবিসো টানাং য়ুং, আসা য়হুদিবিকো লিংপাংকো তোইতা লুইসুওয়া আসা স্যাসুওয়া দিংঙাবিসোরে তানাং য়ুং, হাংপাতানাহা ই নুওয়াংসোহা হাইরে ত্যইংদ্যা মাজিংমগা। আকু নুওয়াংবিতাহা হাইরে ত্যইংদ্যা মোতো।10সেংজাহিং দেংওয়াবিকো প্যাকোতা ওয়েংসপাওয়া দিংঙাহিংয়া ইকোই নিহকো চোইপা কোইপাপি আসা আকুবেমি মোকোইনাহা আকোসো তানাং য়ুং।11এপাজিংওয়া দিংঙাকোহা নোচেংরাং দাংপুনতেমি নিও তাওয়া ই নুওয়াংবিহা নাতিরাং গেমি নিও, আসা আবিহা আপনিকো পাপসোহা আপনিরাং দন্ড মুংরোওয়া।12হাত্রং কা অর্তিমাস আসা টুকিকসহিং নাকোতা নিংপুদাং, আত্রংহা নাতিহা হেপা জোমসা জিংদো নিকোপোলিসতা কাহিং দোসপোংকো কোশিষ জো, হাংপাতানাহা সেইগু মেপেংচেহা কা আউতারাং য়ুংপুরো তামসা নির্ণয় জোমি নিও।13উকিল জেনাস আসা অপোলোসহিং ন্যাতাতা হ্যামরাপা মাজিংকো তামসা চুওয়া সেই য়ুজ্রু, আসা আবিহিং ন্যাতাতা ঘ্যইওয়া সোংসাবি কাইপ্পি।14য়োংকো দিংঙাবিহা এনতাপা কাম জোকো ঝিকো, ইবিহা ইচোহা ইচোহিং সিওপারাং ঘ্যইনুওয়া য়ুজ্রুওয়া কাম জোকো ছুকো। আসা ই সাদিহা হাইরে কাম মাতাপা মাজিংরোওয়া।15ইতা কাহিংপা নিওয়া তাংসা দিংঙাবিহা নাতিহিংয়া অভিবাদন কাইপুমি নিও। আউতা নিওয়া দেংওয়াবিহিংয়া, হাংসু কাবিহিং জেজেংপা জোমি নি, আবিহিংয়া তাংসাহিং অভিবাদন নিও তামসা জাংপি। নাবি তাংসাকোতা সেংজাকো অনুগ্রহ নিকো।
The Seed Company