তিতোস1
1কা পাউল সেংজাকো ডেইয়া আসা ইশু খ্রীষ্টকো জেংওয়া পোইং ই চিঠি লাদাংয়ো। সেংজাকো জেংওয়া দিংঙাবিহিং দেংওয়াতা য়ুজ্রুকো আসা কাবিকো তাংজিতা ঝিপাওয়া আজিপ্পাতা তেপোইকো সেংজাহা কাহিং জেংয়ো।2ই আজিপ্পাসোহা নাবিহিংয়া হাত্রংরে মিসিওয়া সাদি পিচারো তামসা ভরসা পিচামি নিও, হাত্রংরে প্যায়োং মোয়্যইওয়া সেংজাহা বাসিমতি দিংওয়ারোমা নাগাইসোরাং য়াংবিহিং ই সাদি পিচারো তামসা নাপোইমি নিমগা।3ঠিক সময়তারাং আকুহা ই এনতাওয়া দেরেংহা তিংকো ছুওয়া বানাইয়ে। ই এনতাওয়া দেরেং হিংপাওয়া চিহ্নহা য়াংবিহিং মুক্তি পিচাওয়া সেংজাকো আজ্ঞা সেই কাহিং পিচামি নিও।4কাহিংপা দেংওয়াতা ইচো নিওয়া কুং চেংওয়া তিতোসহিং কা ই চিঠি লাদাংয়ো। সেংজা আপা আসা য়াংবিহিং মুক্তি পিচাওয়া ইশু খ্রীষ্টহা নাতিহিংয়া অনুগ্রহ আসা তিমেওয়া পিচাকো।5ক্রেটতা মোত্যইয়াংওয়া কাম তাংসা জোকো আসা তাংসা শহরতা মাটা ওয়ারাংপাবিকো কাম চি ত্যইকো কাহা নাতিহিংয়া আউতা এতেমগা।6এল্ডারকোতাহা হাইরে দোষ নিমতুরোওয়া, আকোহা ইচো মেংচে মে নিনেরোওয়া, আসা আকো চেংওয়া চেমেবিরে এনতাওয়া লোংস্ত্যাইওয়া নিনেরোওয়া, জাংওয়া নুওয়াং হিংমসা জোওয়া আসা দেংওয়াতা নিনেরোওয়া।7মন্ডলিকো এল্ডারহা সেংজাকো কামকো চি লাংমি নিমগা। আকো সোতা আবিকোতাহা হাইরে দোষ নিমতুরোওয়া। আবিহা পুংটা জোওয়া, সেন্নেপা সেদ্রাংপাওয়া, য়ু আংমসা গাইওয়া, স্যাসু-ডুসুওয়া আসা ন্যাস্যাকো তেইপি জিংমতুরোওয়া।8আকুহা, সাতা আরসিং ওয়াংবিহিং পিচা চোচাওয়া আসা এনতাপা কাম জোওয়া, এনতাওয়া নুওয়াংহিং জেজেংওয়া আসা এনতাপা নোমসা কাম জোওয়া, ন্যায় জোওয়া, পবিত্র আসা আপনিকো মেংতাওয়া ইচ্ছাহিং য়োইকো চুওয়া জিংনেরোওয়া।9আকুহিং ঝিপাওয়া দেংকো ছুওয়া য়্যইদিতা আকো দেংওয়াহা সাডুংপা নিনেরোওয়া, তাকি আকুহা দোসরাহিং ই ঝিপাওয়াতা নিওয়া সেই ঝিপাকো ছুকো, আসা আকু নুওয়াংবিকো বিরোধ জোমবিহিংয়া প্যায়োংগা তামসা তিংপাকো ছুকো।10হাংপাতানাহা উইসে দিংঙাবিহা অধিকারতা মায়ুংওয়া, ত্যইংদ্যা মাতাওয়া নুওয়াং য়্যইওয়া, আসা ধোকা পিচাওয়াবি নিরোওয়া। ইবিকো প্যাকোতাহা আজিপ্পারাং খতনা জোমবিহা এপারাং জিংমগা।11আবিকো নামুহিংয়া মেমেইপাহা মাতু, হাংপাতানাহা আবিহা ঝিপামতুওয়া প্যায়োং নুওয়াংবি ঝিপামসা তাংসা দিংঙাবিহিং দুদুইপামি নিও। ন্যাস্যা কামাইকো সোতা মেংচে আবিহা এপা জোমগা।12ক্রেট বৗইদাতা আবিকো আপনিকো ইচো অগমবক্তাহা এপা জাংমি নিও, “ক্রেটকো দিংঙাবিহা হাত্রংদো প্যায়োং য়্যইমগা, ইবিহা মালামতুওয়া সেংচেংবি বেপাগা। ডুমক্যইওয়া মায়াওয়াবিগা।”13ই নুওয়াংহা আজিপ্পারাংগা। আকো সোতা আবিহিংয়া সিওপা য়েং, আবিকোতা সাডুংপা দেংওয়া ওয়াংকো ছুকো।14নেহা য়হুদিবিকো বানাইওয়া মিংচিতা আসা আজিপ্পাহিং মামানেওয়া দিংঙাবিকো আজ্ঞাবিহিং হিংকোরে মাহিংঘ্যই।15চোসোওয়া দিংঙাবিকো সোতাহা তাংসারাং চোসোপা নিও। আদো চোসোপা মাতোওয়া আসা মাদেংবিকো সোতাহা হাই নুওয়াংরে চোসোপা মোতো, হাংপাতানাহা আবিকো তুংসিং আসা নোচেংরাং চোসোপা মাতামগা।16আবিহা সেংজাহিং নাইমি নিও তামসা জাংমগা, আদো আবিকো কামসোহা সেংজাহিং মানাইমি তামসা তিংপামগা। আবিহা আজকাক্যইওয়া, আসা আজ্ঞাহিং মাহিংওয়াবিগা, হাংসুরে চোসোওয়া কাম জোকো য়োগ্য়্য মোতো।
The Seed Company