য়াকুব1
1প্রভু ইশু খ্রীষ্ট আসা সেংজাকো ডেইয়া কা য়াকুবহা ই চিঠি তাংসা জায়গাতা নিওয়া ইস্রাইলকো বার্চো জিরিহিং লাংদাংয়ো। নাবিহিংয়া কুং অভিবাদন নিও।2কুং ডুওয়া এবাই আসা হুম্রিবাই, তাংসাসো জাঁচ ওয়াংনুওয়া গাগ্রুপা জিং।3নাবিহা গেদিংমি নিও, হাত্রং নাবিকো দেংওয়াকো জাঁচ জিং, আত্রংহা নাবিকো সহায়ওয়া সেহা সাডুংপা জিংরোওয়া।4আদো হাইক্রি নুওয়াংতারে কমজোর মাজিংপা সাডুংপা আসা নির্দোষ জিংকো আকু জাঁচবিহা সহায়মসা স্থির য়ুংকো ঝিকো জো।5নাবিকো প্যাকোতাহা হাংসু-হাংসুহিং দুংজিকো অভাব নি, সেংজাকোতা য়াচা, আকুহা পিচারোওয়া, হাংপাতানাহা মেসেদ্রাংপা সিওপা জিংপক্যইপা পিচাওয়া সেংজাহা আকুহিংয়া দুংজি পিচারোওয়া।6আদো য়ানুওয়া সন্দেহ মোজোপা দেংওয়া এমসা য়ানেরোওয়া। সন্দেহ জোওয়া দিংঙাহা বিংঙাকো ভরতা তেইওয়া ঝাহাদিকো চুরা লোওয়া ত্যাবাপাগা।7এপা জিংওয়া দিংঙাবিহা প্রভুকোসো হাইক্রি নুওয়াং মুংচারো তামসা মোনোদো ক্যাচিংরোওয়া।8এপা জিংওয়া দিংঙাহা নিহদ্যা তুংসিং জিংওয়া আসা তাংসা নুওয়াংতা জোজোকেকেপা জিংমগা।9জোরোংওয়াতা নিওয়া ডুওয়া এবাই, হাত্রং নাবিহিং সেংজাহা তোরোই, আত্রংহা নাবিহা পুংটা মোজো।10এপা জোমসারাং পুপুউ এবিরে জোরোংনেদো গর্ব জো, হাংপাতানাহা পুপুউহা য়োংপুমসা জ্যইপুওয়া চুংচাকো মাইবে ত্যাবাপাগা।11সিনি বোমসা খরেতি জিংনুওয়া মাইবেকো সিংতেংহা সেংপুমসা সিপুমগা। এপা জোমসারাং কাম-কাজকো ব্যবস্থাতা পুংজিকো গিরিওয়ারে আপনিকো সাদি য়াংপামগা।12জাঁচকো সময়তা সহায়কো ছুওয়া দিংঙারাং আশিষিত নিও। দুঃখকো সময়তা স্থির য়ুংওয়ারাং সেংজাহিং জেজেংপা জোওয়াবিকো সোতা আকো প্রতিজ্ঞা জোওয়াকো সাদিকো মুকুট মুচারোওয়া।13এপা জিংওয়া জাঁচতা পরেনুওয়া হাংসুরে কাহিংয়া সেংজাহা পরিকছা জোয়ে তামসা মাজাংকো। সেংজাহা দুষ্ট নুওয়াংকো পরিকছাতা মাপুরামগা আসা আকুহা আপনিরে হাংসুহিংনে পরিকছা মোজোমগা।14তাংসা দিংঙাবিহা আপনিকো মেংতাওয়া ইচ্ছাসো লোভ জিংপুমসা পরিকছাতা পরেমগা।15আকো সোতা আপনিকো মেংতাওয়া ইচ্ছাসো পাপ কেমগা, আসা আকু পাপরাং পুরা ডেপুমসা সিদিং পারামগা।16ও কুং জেজেংওয়া ডুওয়া এবাই আসা হুম্রিবাই, নাবিহা আপনিহিং ধোকা মাপিচা।17তাংসা আসল আসা ছোসোওয়া ঙেরোংহা তোইসো লেমগা। ডিংবাতা হাহাইওয়াবি দিংওয়া সেংজাকোসো ই ঙেরোং লেমগা। আকুহা হাত্রংরে বদলি মাজিংমগা, আসা আকুহা বদলি জিংচাংওয়া লোদোং ত্যাবাপারে মোকো।18য়াংবিহা সৃষ্টিকো নাগাইকো ফলবি ত্যাবাপা জিংকো ছুকো তামসা আকুহা আপনিকো ইচ্ছাসো আজিপ্পাকো য়্যইদিসো য়াংবিহিংয়া চুবে দিংমগা।19ও কুং জেজেংওয়া ডুওয়া এবাই আসা হুম্রিবাই, ই নুওয়াং নাবিহা প্যারাপাকো জো। হিংওয়াতা সেন্নেপা, য়্যইওয়াতা হোশিয়ার আসা সেদ্রাংওয়া লিয়োপা জো,20হাংপাতানাহা দিংঙাকো সেদ্রাংওয়াসোহা সেংজাকো তাংজিকো কামতা বাধা জোমগা।21আকো সোতা এপাজিংওয়া আচকাক্যইওয়া নুওয়াং আসা তাংসা দুষ্ট নুওয়াংসো তানাং য়ুং। নম্র জিংমসা নাবিকো তুংসিংতা এওয়া সেংজাকো য়্যইদিহিং আপনিকো বানাই, হাংপাতানাহা নাবিহিং উদ্ধার জোওয়াহা আউসোরাংগা।22আদো ই য়্যইদিহিং পালন জোওয়া জিং, হিংমসা মেংচে আপনিহিং ধোকা মাপিচা।23য়্যইদি হিংমসা পালন মোজোওয়াহা আইনাতা আপনিকো য়ুওয়্যাই ন্যইওয়া দিংঙা বেপাগা।24আকুহা আইনাতা ন্যইনু চোইপা আপনিকো য়ুওয়্যাই তিংমগা, ন্যইওয়া ল্যাপুনতেনুওয়া আপনি হেপা নিমমে তাওয়া নুওয়াংহা সেন্নেপা লারিংপুমগা।25আদো হাংসু দিংঙাহিং ছুটকারা পিচাওয়া সিদ্ধ লিংপাং হিংমসা মালারিং, আদো এনতাপা ন্যইমসা ধ্যান আসা পালন জো, আকো তাংসা কামতা সেংজাহা আশিষ পিচামগা।26হাংসু দিংঙা আপনিহিং তাংজি নো, আদো আপনিকো লেবেহিং লগাম লাগাইকো মাছুনাহা আকুহা আপনিকো তুংসিংহিং ধোকা পিচারোওয়া, আসা আকো ধর্ম-কর্মহা ব্যর্থ জিংরোওয়া।27সেংজা আপাহিং মন পরেওয়া আজিপ্পা ধর্ম-কর্মহা দুঃখতা পরেওয়া মুরিংবি আসা ত্যগ্যইবিহিং কাং-য়োওয়া আসা বাসিমতিকো মেংতাওয়া নুওয়াংবিসো তানাং য়ুংওয়াগা।
The Seed Company