ফিলেমন1
1ইশু খ্রীষ্টকো সোতা কৈদি জিংপুওয়া কা পাউল, আসা তিমোথীকোসো, কাবিকো জেজেংওয়া ব্যারো ফিলিমনহিং,2আসা কাবিকো হুম্রি অপ্পিয়া আসা কাবিহিংপা সেওয়া জোওয়া অর্খিপ্পস, আসা নাকো সাতা জমা জিংওয়া সেংজাতা দেংওয়াবিহিং কা ই চিঠি লাদাংয়ো।3য়োংকো সেংজা আপা আসা প্রভু ইশু খ্রীষ্টহা নাবিহিং অনুগ্রহ আসা তিমেওয়া পিচাকো!4ও কুং এ ফিলিমন, কুং পাচাইওয়াবিতা নাতিহিং প্যারাপামসা কা কুং সেংজাহিং হাত্রংদো গারানি তারোওয়া,5হাংপাতানাহা প্রভু ইশুকোতা নিওয়া নাকো দেংওয়া আসা সেংজাকো পবিত্র দিংঙাবিকো তোইতা জেজেংপা জোয়ো তাওয়াকো তোইতা কা হিংয়ো।6নাকো দেংওয়াকো সেওয়াসো কাবি খ্রীষ্টকোতা য়ুংনুওয়া কাবিকোতা নিওয়া তাংসা ছোসোওয়া নুওয়াংহিং নাপোসো গেকো চুওয়া সে পিচাকো তামসা কা পাচাইরোওয়া।7ও কুং এ, নাকো জেজেংওয়াসো কাহিংয়া সিওপা গাগ্রুওয়া আসা সাডুংওয়া মুংচামি নিও, হাংপাতানাহা নাকোসোহা সেংজাকো পবিত্র দিংঙাবিকো তুংসিংহা গাগ্রুমি নিও।8আকো সোতা খ্রীষ্টকোতা নাকো সাডুংওয়া ডুওয়া জিংমসা নাতিহা হাং জোনেকোমে তামসা কা আজ্ঞা জোকো চুকোগা,9আদো জেজেংওয়াকো সোতা নাতিহিং জাংচারোওয়া। ওয়ারাংপুওয়া দিংঙা আসা ইশু খ্রীষ্টকো সোতা কৈদি জিংপুওয়া কা পাউলহা10অৗনেসিমোসহিং লামতুপা জোপি তামসা কা নাতিহিং জাংচারোওয়া, আকুহা কা জেলতা নিনুহা দেংমসা কুং চেংওয়া ত্যাবাপা জোমসা কাহিং এমি নিও।11নাগাইহা আকুহা নাকো সোতাহা হাইরে কাম মালাগেওয়া বেপা নিমগা। আদো নেহা আকুহা নাকো আসা কুং নিহসোকোসারাং কাম জোওয়া জিংপুমি নিও।12কা আকুহিংয়া ন্যাসারাং নাকোতা নিংপুদাংমি নিও। আকুহিংয়া কা সিওপারাং জেজেংপা জোমগা।13এনতাওয়া দেরেং হিংপাপুওয়াকো সোতা কা জেলতা নিনুহা নাতি মাতানুওয়া আকুহিংনাং কাহিং কাংকো এপুকোগা।14আদো নাতিহিং মাজাংপা এপা এচাকোহা কাহিংয়া এনতাপা মাজিংতো। আকো সোতা কাহিং লামতুপা জোকো নাতিহিং সুজামেপা মাজিংকো, আদো ইহা নাকো ইচ্ছাসো জিংকো তামসা কা নোমি।15অৗনেসিমোসহা নাতিহিংপা হাত্রংদো য়ুংকো সোতা আম্যইম্যই তানাং জিংপুমদোওয়া।16নেহা আকুহা ডেইয়া ত্যাবাপা মোকো, ডেইয়ারোমা জেজেংওয়া কুং দেংওয়া এগা। আকুহা কুং সোতাহা সিওপারাং জেজেংপা নিও। জুপাতা আসা প্রভুতাহা আকুহা ঝান নাকো সোতাহা হাসেকো জেজেংওয়া নিকোগা।17আকো সোতা নাতিমি কাহিং আপনিকো ব্যারো নোনাহা, আকুহিংনে কাহিং ত্যাবাপা গ্রহন জোপি।18আকুমি হাইক্রি মেংতাপা জোমি নিনাহা আসা হাইক্রি তাকো নিনাহা কুং মিংতা হিসাব এপি।19কা পাউল আপনিকো খুইসো লামসা জাংরোওয়া, আকুহা কারাং তাপুরোওয়া। নাকো আপনিকো সাদিরে কুংসো য়ুচাওয়াহা কা জাংওয়া জাংওয়া জোমগ্যইরোওয়া।20আকো সোতা ও কুং এ, প্রভুতা কুং সোতা জিংদো ই জোপ্পি। খ্রীষ্টকোতা কুং তুংসিংহা গাগ্রুওয়াসো মেইপুকো।21নাতিহা কুং জাংওয়া জোপিরোওয়া আসা সিওপারাং জোপিরোওয়া তামসা লাওয়াতা কা ভরসা জোরোওয়া।22আসা ন্যাসারাং ইচো নুওয়াং, নাকো পাচাইওয়াসো কারে নাকোতা ওয়াংচোং মুংকোদোওয়া তাওয়া আশা এমি নিও, আসা কুং সোতারে য়ুংদু সিরি তৈয়ার জোয়েপি।23খ্রীষ্ট ইশুকো সোতা কাহিংপা কৈদি জিংপুওয়া কুং ব্যারো ইপাফ্রাসরে নাতিহিংয়া অভিবাদন কাইপুমি নিও।24এপারাং কাহিংপা কাম জোওয়া মর্কুস, অরিস্তাখর্স, দেমাস আসা লুকরে অভিবাদন তাদিংয়ো।25প্রভু ইশু খ্রীষ্টকো অনুগ্রহ নাকো লাংবেহিংপা হাত্রংদো নিকো।
The Seed Company