Jeremia8
1CHAKRAMANG tek mih, “Nami khin khe dow Juda pren manguüa kowh hut hai maru iukuüa kowh hut, uamowuüa kowh hut hai risiuüa kowh hut, now Jerusalem maru-uüa kowh hut mih amatni kowh tadupra hownia nalauta pe kown.2Naiawngün hut dow sat, lama hai krek pur kowi natakuak pan kown. Amatni kowh hut dow amiapaw nakrawi kua pe kown nadowi, now dup paw naplan dup pe kown nadowi. Naiawng hown amatni kowh hut dow chia kih iawng krawng kowi natakuak hüah kown. Tawngplawng kowchow panow amatni dow mukuang kowi kowh naiawngün uanh kowi sakrau khai, chang pe lup khai, awr lü khowng khai, now chupiiaah khai.3Judauüa pungmadawng kowi kowh ta sing uowi miuüa kowi dow kür hown prenlang kowi ang nachinah kown. Nakhowk khe amatni dow sing uowi mih lak-e kowng kown mih nalang nau büah kown. Ang mukuang siphaiuüa kowh CHAKRAMANG mami laiklow ang tek khowk,” pakhai.4Juda maru-uüa kowi natek pe kownkow CHAKRAMANG tek ang mih,“Tim mih maru dow awr plan rü reng,now takuowng mih maru paw uang plan reng chekhai.5Tawkche Jerusalem maru-uüa dow tiama tawi kowi cham mang chepaw ang tut-e uang plan dowi chekhai,amatni dow angak kowi dowkta chen khai.6Amatni kowh laiklow dow kaneuma ang sünta khowk.Tawkche amatni dow tek lainowm dowi chekhai.Changta angak chepaw amatni dow taphuang dowi chekhai,‘Ow! Ang changta ngak khai!’ pahai amiapaw tek dowi chekhai.Cham tasen khe kowh kawrnga alenma iowm mih iawngamatni dow amatni kowh tiama ngak prakowi alenma mang büah khai.7Iammow uakaw dow alakma kowi nacham kowi kown mih khin tuk reng,now nauang plan kown mih akhin paw tuk reng chekhai.Kimtawn uatur, berbaw hai charak paw amatni kowh iow khin tuk reng.Tawkche ang maru-uüa dow ang kowh ari arow tuk dowi chekhai.8“Enni tek mih, ‘Anging dow chanlaima,now anging tut-e dow CHAKRAMANG kowh ari aiang uowi,’ pakhai.Tawkche enni kowh kawngmu sarauüa dow amatni kowh sangkrangra ngak vüi ari aiang laiklow klowita büah khai.9Naiawng mih tüngsang mih maru-uüa dow naka rukrai kown,amatni dow takrow reng, now tauowk reng chekhai.Tawngplawng kowchow panow amatni dow CHAKRAMANG kowh laiklow nuata khai.Naiawng rakowi amatni tut-e chanlaira uowi khai bow?10Amatni kowh masi hawmh dow akeng mih maru kowi ang napeah kown,now amatni kowh laih paw akeng mih maru kowi ang napeah kown.Amatni dow aiuk hai asowm bowkbowk lawpha khai,now risi hai uamowuüa khowm padow lawpha khai.11Risi hai uamowuüa dow ang maru-uüa kowh kramra uowima mih ma iawng mih angak iungta pe dowi chekhai;nami takcha kowi amatni daiah mih, ‘Iung kown taih, iung kown taih,’ pakhai.Tawkche amatni tek iawng iung dowi chekhai.12Amatni dow amatni kowh naiawngün suiiai kaniaima mih lup ngak rakowi mapaw rukrai dowi chekhai,amatni dow rukrai pami hing tuk büah dowi chekhai.Naiawng rakowi ang saiah mih maru ngakuüa pungmadawng kowi amatni paw natawi uowi kown.Nakhowk khe amatni kowi dow ang nape khamah sum kown.Ang CHAKRAMANG mami laiklow ang tek khowk.13 Amatni kowi dow ang napiakta ngengche kown.Nami kung kowi dow nakowi mih grep uih hai uidut uih nauowi kown nadowi bowt,now grep ruih hai uidut singh paw nauowi kown nadowi bowt.Amatni kowh uih singh dow nakowng bowk kown,now amatni kowi kowh ang peah mih maten namata büah kown,” pakhai.14Judauüa tatek mih, “Tawngplawng kowchow mami re-e a-i uowi rengreng tak?Chu, nakowtatung tanim kownkow tap tapat lut mih marow kowi a-i kowpowt lah, now nakowi a-i kowng lah.CHAKRAMANG a-i kowh Thurai dow a-i vüi khowmta a-i piakra khai bowt.Tawngplawng kowchow panow a-i dow CHAKRAMANG kowi kingküala mih angak changta khai.Naiawng rakowi aia dow pe kham a-i ket tui khai.15Thaulangma nauowi kown mih a-i owmsak chowdiah.Tawkche tawngpaw thaulangra uang ting dowi chekhai.Arau naiung kown mih a-i owmsak chowdiah.Tawkche kramra uowima mih takrow takraira uang ting khai.16A-i ransu-uüa kowh kawrnga sak hü klow dow Dan marow hownia ta khai bowt,amatni kowh kawrnga plak klow hown paprenma kram kowh chür khai bowt.Amatni uang mih dow pren hai pren kowi kowh uowi mih maten napiakta kownkow chekhai,now marow hai maru-uüa maten kowi nauang piak kownkow chekhai.17Sünta büa diah, nauang sen enni kownkowakru uowima mih rua iawng mih ransu-uüa kowi ang nauang chin enni kown.Naiawngün ransu-uüa dow rua iawng nachawt enni kown,amatni kowi dow amiapaw naia hangah kown nadowi,” pakhai.18Ang sak kowi rau mih dow nowng iung dowi bowt;ang kowh sak dow tapiak nak khowk chekhai.19Alakma mih pren hownia ang maru-uüa kowh kar klow ta khai bowt.Amatni dow kar se tek mih, “Zaiawn kowi CHAKRAMANG uowi dowi bow?Nakowi dow mang uowi dowi bow?” pakhai.Nakhowk khe Jeremia kowi CHAKRAMANG klangah mih,“Tawngplawng kowchow amatni kowh asung uowi dowi mih arup aren hown tuk towk ang kunmarau khai?Tawngplawng kowchow prenlang thuraiuüa hown tuk towk ang kunmarau khai?” pakhai.20Maru-uüa tek mih, “Chatua khin rawn khai bowt,now satma khin paw rawn khai bowt.Nachenganchepaw anging dow ka lawngra dowi tak chekhai,” pakhai.21Ang maru-uüa sak piak rakowi ang paw tawi sak piak khai bowt,ang sak kowi rau lai bowt kowh ang nowng lai dowi bowt.Lainowmma sak kowi rau hown ang uowi khai.22Gilead süng kowi chakhang uowi dowi bow?Nakowi maru rawk mih uowi dowi bow?Tawngplawng kowchow ang maru-uüa kowh arau iung dowi?
The Seed Company