Jeremia9
1Owh, ang lu che chowng mrawng tui khai panü,now ang mik che chowng tuikuam khai panü.Ang chenchap maru-uüa kowi saita mih vüi ni chut uar prowt ang nowng kar diah.2Owh, Süngrüp süngkangma kowi ang kowh uowi rah uowi lowk panü,ang maru-uüa kowi towla hüah now nakowi ang kowia powt diah.Tawngplawng kowchow panow ang maru-uüa dow Thurai kowi kingküa khai;amatni dow Thurai kaah sakowm dowi iawng uowi khai.3CHAKRAMANG tek pe Jeremia mih,“Judauüa dow tek dai lai kownkow rüata hüah mih leba sek iawng kamrütma uowi khai.Pren kowi dow mapaw asung uowi dowi chekhai,lainowm kowi paw dai lai hown nowng awng khai.Amatni dow angak klen kowi angak chang khai,ang kowi paw amatni kowh Thurai pahai kham büah dowi chekhai.4Amatni dow amatni kowh auiuauüa hownia pacham uowi kaneu lah,now amatni tainau-uüa kowi paw hangkow pacham owm lah.Tawngplawng kowchow panow tainau dow kowmatia tainau kowi kuan reng chekhai,now auiua dow kowmatia auiua kowi prawngren reng chekhai.5Maru maten lowkkowlowk takuan reng,now amiapaw tek lainowm dowi chekhai.Amatni dow tek dai lai kown mih kangowh tasang khai,amatni dow kawm dowi mowr chang ngak khai.6Amatni dow lowk kung kowi lowk chang angak khai,amatni dow lowk kung kowi lowk tek dai lai tek khai.Amatni dow ang tut-e uang tape büah dowi chekhai,” pakhai.7Naiawng rakowi mukuang siphaiuüa kowh CHAKRAMANG tek mih,“Judauüa kowi dow kri chaing iawng ang nachaingah kown.Ang maru-uüa kowi nami klen kowi tawng tak chow ang nachangah kown?8Amatni kowh dai dow kramra uowima mih salangba sek iawng chekhai,nami dai hown amatni dow krawi tek dai lai reng chekhai.Amatni dow amatni kowh nawr hown krawi kuan kownkowklowkchakuüa kowi krawi sowr lai iung reng chekhai.Tawkche amatni kowh sak kowi dow kuanla kown mih tuak kangowh chekhai.9Naiawng rakowi amatni kowi ang ripah dowi tham bow?Naiawng mih chenchap kowi ang sat pe klai dowi tham bow?” pakhai.10Hungma mawngma vüi kowi ang nakar kown,now süngrüp süngkangma kowi kowh tawncher thing rah vüi kowi ang nakar kown.Tawngplawng kowchow panow naiawngün dow piak bowk khowk chekhai;nakowi dow amiapaw len dowi bowt chekhai,tawncher hawmh klow paw ta dowi bowt chekhai.Mukuang kowi kowh iow mih uaklinguüa paw powt bowk khowk,now asaduauüa paw powt bowk khowk chekhai.11CHAKRAMANG tek mih, “Jerusalem marow dow ang napiakah hanow mawngchawng kuakra ang nachangah kown,now brenkhui hawmh tapetra ang nachangah kown.Judauüa kowh marow ün süngrüp süngkangma iawng naphaw kown;nahanow nakowi dow amiapaw nauowi kown nadowi bowt,” pakhai.12Naiawngün laiklow tukta mih prengia chakma mih maru uowi ne bow? CHAKRAMANG hownia kowh laiklow ta hanow akeng mih maru kowi nowng phuang mih maru uowi ne bow? Tawngplawng kowchow pren tuk piak bowk khai? Tawngplawng kowchow nami pren süngrüp süngkangma iawng tuk phaw khai? Tawngplawng kowchow nami pren iawng miapaw nowng mang dowi bowt?13CHAKRAMANG tek mih, “Naiawng phaw mih dow amatni kowi kowh ang peah mih ari aiang nuata büah rakowi chekhai, now ang tek iawng chün büah dowi rakowi chekhai.14Amatni dow ang tek iawng chün lak dow saktuak khawtma uowi büah khai. Now amatni pipu-uüa tüngsangah iawng Baal thurai kowi chupiia büah khai.15Naiawng rakowi ang mukuang siphaiuüa kowh CHAKRAMANG Israeluüa kowh Thurai mami laiklow ang tek khowk. Sünta büa diah, ang maru-uüa kowi dow akhakma mih chakkham hai akru uowi mih tui ang nape khamah kown.16Amatni kowi dow amatni tukah dowi mih chenchap hai amatni pipu-uüa paw tukah dowi mih chenchap dawng kowi ang nacham uetah kown. Asaima piak dowi mowr amatni kung kowi dow saidawng nakrawiah kown,” pakhai.17Mukuang siphai kowh CHAKRAMANG tek mih,“Kawmat maiawngün lawnguan kowi tuak büa diah.Nakar kownkow cham krawi haw masiuüa hawmh büa diah,now klangiungma tuk kar mih masiuüa kowi nauang hawla kownkow cham chin maru büa diah.18Naiawngün masiuüa hawmh mih alenma uang hanow pacham kar lah,a-i kowh mik tui vüng bunlun dowi mowr a-i vüi pacham kar büah lah.19Zaiawn hungh hownia dow maiawng ta kar klow khai bowt,‘Tawng iawng chow a-i tuk piak khai?Tawng iawng chow naiawng khowt pat a-i tuk ka rukrai khai?A-i kowh kim ün dow piak bowk khowk.Naiawng rakowi pren hownia a-i powt kown takla,’ pabüah khai,” pakhai.20Aw Juda masiuüa hawmh, CHAKRAMANG laiklow sünta diah;aia kowh laiklow nasünta kownkow enni kowh param uowah büa diah.Tawng iawng chow nakar kown mih enni chowlowkkow chamauüa kowi tüngsangla diah,now akeng miuüa kowi paw kar meng natek kown mih tüngsangla büa diah.21Kowngra dow anging kowh tawngpawk hownia uang pün khai bowt.Nami dow anging kowh mang kim kowi uang kup khai bowt.Nami kowngra dow tiama kowi kowh ngawk mih ngeuüa hawmh kowi kowngta bowk khowk,now marow viadawng kowi kowh uowi mih klanguüa hawmh kowi paw kowngta bowk khowk chekhai.22CHAKRAMANG tek mih,“Maru kawmuüa kowh uak dow chia kih iawng dowm kowi natakuak hüah kown;amatni kowh uak dow cha ngen kung cha cheng ta tamawng hüah mih iawng nata takuak hüah kown.Amatni kowi dow amiapaw nakuaah kown nadowi,” pakhai.23CHAKRAMANG tek mih, “Chanlaima mih maru-uüa dow amatni kowh chanlaira hown hang pacham chang bawri lah, akürma mih maru-uüa paw amatni kowh kür hown hang pacham chang bawri lah, now kurengma miuüa paw amatni kowh kurengra hown hang pacham chang bawri lah.24Tawkche chang bawri kown nau miuüa dow maiawng mih lawnguan hown pacham chang bawri lah: Aia dow ang CHAKRAMANG pami tuk rakowi pacham chang bawri lah. Aia dow ang kowh achur uowi dowi mih sakraura, lusa kowi ang kowh lup anowmma mih hai achinawmma mih tuk rakowi pacham chang bawri lah. Tawngplawng kowchow panow ang dow sakraura, anowmma mih hai achinawmma mih kowi awmrawm reng chekhai. Ang CHAKRAMANG mami laiklow ang tek khowk,” pakhai.25CHAKRAMANG tek mih, “Buk nga kowi kowh hiah khampha uanpik krowngchow miuüa kowi ang naripah kown mih khin nauang ting kown. Nami khin khe dow Aiguptauüa, Edawmuüa, Amawnuüa, Moabuüa, süngrüp süngkangma kowi kowh kep ngeupa sam mih maru-uüa hai Judauüa kowi ang naripah kown. Tawngplawng kowchow panow amatni dow sak hownia hiah khampha uanpik dowi chekhai. Israeluüa maten paw sak hownia hiah khampha uanpik dowi chekhai,” pakhai.
The Seed Company