گریند11
1اکہ دوٚہہ کٔر اسرائیلی لوٗکو یہُوواہسؔ نِش پننٮ۪ن مصیبتن ہنٛز شکایتھ۔ ییٚلہ یہُوواہنؔ تِمن ہُنٛد بوز سُہ سپُد غضبناک۔ لہٰذا سوز تٔمؠ لوٗکن درمیان اکھ نار یمؠ خٟمُک اکھ انٛد زول۔2پتہٕ کۅر لوٗکو موسیٰؔ ہس فریاد تہٕ تٔمؠ مونٛگ یہُوواہسؔ دُعا۔ پتہٕ گو نار ژھیٚتہٕ۔3لہٰذا تھوو تٔمؠ تتھ جایہ تبعیرہؔ ناو، یمیُک معنی نار چُھ، تکیازِ یہُوواہؔ سُنٛد نار اوس تِمن منٛز باگ دوٚدمُت۔4اکہِ دوٚہہ کٔر اکہِ فرہنگؠ لُکہ جمٲژ یۅسہ اسرائیلی لوٗکن سٟتؠ سفر کران ٲس بہتر کھیٚن چیٚنٕچ خٲہِش۔ تہٕ ییٚلہ تِمو یہ شکایتھ کٔر تہٕ اسرائیل یو تہِ لٲج شکایتھ کرٕنؠ۔ تِمو ووٚن، "کاش اسہِ آسہ ہے کھیٚنہٕ خٲطرٕ مازٕ ۂنا! 5اسہِ چھےٚ سۅ گاڈ یاد یۅسہ اسہِ کھیٚییہِ ییٚلہ أسؠ مِصرس منٛز ٲسؠ، سۅ گاڈ یۅسہ اسہِ کُنہ ماوضہ بغٲرے دِژٲکھ۔ تہٕ اسہِ ٲسؠ تِم سٲری چیز یمن منٛز لٲر، خربُزؠ، لیکس، گنٛڈٕ تہٕ رہُن اوس یُس أسؠ کھیٚتھ ہیٚکہٕ ہو۔6مگر وۅنؠ مۅکلییہِ اسہِ بۅچھے تکیازِ اسہِ چُھ وۅنؠ صرف یوٚہے مَنّ کھیٚنس۔7مَنّ چھِ یمے سفید بیلؠ پٔھلیاہ ہی۔8پرٛتھ دوٚہہ ٲسؠ لوٗکھ صبحٲے نیران تہٕ زمینہٕ منٛزٕ کہتام سوٚمبران۔ تہٕ پتہٕ ٲسؠ سُہ پیسان یا کنیٚن پٮ۪ٹھ دٔگِتھ تتھ اوٹ بناوان۔ پتہٕ تُروہس بانس منٛز آب تہٕ سِوُکھ، نتہٕ بنٲوؠ ہس روٹ۔ روٚٹُن اوس ژۅچن ہنٛدؠ پٲٹھؠ مزٕ یمہٕ زیتون تیلس پٮ۪ٹھ پینہٕ ٲسؠ آمٕتؠ۔9پرٛتھ رٲژ دوران اوس مَنّ زمینہٕ پٮ۪ٹھ شبنمٕکؠ پٲٹھؠ پیٚوان یتِتھ تہنٛدؠ خٟمہ لٲگِتھ ٲسؠ۔ 10موسیٰؔ ہن بوز تمام اسرائیلی لوٗکھ ٲسؠ شکایت کران ییٚلہ تِم پننٮ۪ن خٟمہ کیٚن دروازن پٮ۪ٹھ ۅدٕنؠ ٲسؠ۔ یہُوواہؔ سپُد سیٹھاہ ناراض، تہٕ موسیٰؔ تہِ سپُد واریاہ پریشان۔11سُہ گو مقدس خٟمس منٛز تہٕ پرژُھن یہُوواہسؔ، "توٚہہِ کیازِ ترٲوو مےٚ یعنی پننِس خٲدمس یہ پریشانی؟ مےٚ پٮ۪ٹھ کٔریٚو رحم! مےٚ کُس خطا چُھ کۅرمُت زِ توٚہہ تھٲوو یمن سارنی لوٗکن ہنٛزِ رٲچھ راوچہِ ہنٛز ذمہٕ دٲری مےٚ مٹہِ؟12بہٕ چُھس نہٕ یہُنٛد مول۔ توٚہہِ کیازِ ونو مےٚ زِ یہنٛز رٲچھ راوٹ کٔریٚو یتھ کنؠ اکھ موج پننِس بچس تلان تہٕ پالان چھےٚ؟ بہٕ کِتھ کنؠ ہیٚککھ یم تتھ ملکس منٛز نِتھ یمیُک وعدہ توٚہہِ میانِس مٲلِس تہٕ بُڈِ ببَس سٟتؠ کۅرمُت چُھ؟13بہٕ کتہِ انہٕ یمن سارنی لوٗکن ہنٛدِ باپتھ ماز؟ تِم چھِ مےٚ شکوٕ کران تہٕ ونان اسہِ دِیو کھیٚنہٕ خٲطرٕ ماز؟14بہٕ ہیٚکنہٕ یمن سارنی لوٗکن یہ بار ویترٲوِتھ! تِم چھِ میانہِ خٲطرٕ اکھ بوٚڈ بوجھ، تہٕ بہٕ ہیٚکہٕ نہٕ مذید یہ گوٚب بار تُلِتھ۔15اگر توٚہؠ مےٚ سٟتؠ یوٚہے سلوک کرُن یژھان چُھو تیٚلہ ژھنیٚو مےٚ وُنؠ مٲرتھ۔ وۅنؠ اگر توٚہہِ پٔزؠ پٲٹھؠ میانؠ فِکر چھےٚ، تیٚلہ کٔریٚو مےٚ پٮ۪ٹھ مہربٲنی تہٕ مےٚ ژھنیٚو مٲرتھ تاکہ یہنٛز رٲچھ راوٕٹ کرنٕچہ پریشانی نشہٕ گژھٕ بہٕ آزاد!16پتہٕ ووٚن یہُوواہنؔ موسیٰؔ ہس، "ژٕ انُکھ ستتھ نفر یمہٕ ژےٚ پتاہ چھی زِ تِم چھِ اسرائیل ین ہنٛدؠ سردار۔ تِمن ون زِ ژےٚ سٟتؠ روزن مقدس خٟمس نیٚبرٕ کنہِ کھڑا۔17بہٕ وسہٕ بوٚن تہٕ کرٕ تِمن برُونٛہہ کنہِ ژےٚ سٟتؠ کتھ۔ پتہٕ تُلہ بہٕ پنُن کینٛہہ روحٲنی طاقت ژےٚ نِش یُس ژےٚ چُھے تہٕ سُہ طاقت تراوٕ بہٕ تِمن پٮ۪ٹھ تہِ۔ تِم کرنے ژےٚ کینٛژن چیزن ہُنٛد خیال تھاونس منٛز مدد یمہ سٟتؠ لوٗکھ پریشان چھِ۔ تاکہ ژےٚ پیی نہٕ کُنسےٕ زٔنِس تہِ ویتراوُن۔18امہِ مذید ون یِمن لوٗکن یتہ، پنٕنؠ پان بنٲیو میانِس قبولیتس لایکھ، تہٕ پگاہ میلیٚو توٚہہ کھیٚنہٕ خٲطرٕ ماز۔ یۅسہ توٚہؠ شکایت کران چُھو، تہٕ یہُوواہنؔ بوز تُہنٛد ییٚلہ توٚہؠ ونان ٲسیٚو، "أسؠ چھِ ماز کھیٚون یژھان۔ اسہِ اوس مِصرس منٛز بہترین کھیٚن چیٚن!" وۅنؠ دییہِ یہُوواہؔ توٚہہ کینٛہہ ماز تہٕ توٚہؠ کھییو سُہ۔19توٚہؠ کھیٚیو نہٕ صرف اکِس یا دوٚن دوٚہُن بلکہ پانٛژن، دہن یا وُہن دوٚہُن تہِ ماز۔20توٚہؠ کھیٚیو اکِس ریٚتس پرٛتھ دوٚہہ ماز تہٕ پتہٕ گژھیٚو توٚہہِ أمِچ نفرت تہٕ بیٚیہِ پھیرنو توٚہہِ امہِ سٟتؠ درۅکہٕ۔ یہ سپدِ اوٕ کِنؠ تکیازِ توٚہہِ تھوون یہُوواہؔ یُس یتہِ توٚہہ درمیان موجود چُھ نظر انداز تہٕ توٚہہِ وُنو تس برُونٛہہ کنہِ ودان ودان زِ اگر نہٕ اسہِ مِصر تروومُت آسہ ہے اسہِ آسہ ہے کھیٚنہ باپتھ بہترین کھیٚن۔"21مگر موسیٰؔ ہن دیُت یہُوواہسؔ یورٕ جواب، "یتہِ چھِ مےٚ سٟتؠ شےٚ لچھ مرد، زنہٕ تہٕ شُرؠ، تہٕ توٚہؠ کیازِ چُھو ونان زِ بہٕ دمہٕ یمن کِس ریٚتس پرٛتھ دوٚہہ ماز کھیٚون؟22اگر أسؠ سٲری تیر ژھاوِلؠ تہٕ گٲو تہِ مارووکھ توتہِ ہیٚکہ نہٕ یمن سارنی سُہ ماز پوشِتھ۔ حطاکہِ اگر أسؠ سمندرچہ سارے گاڈٕ رٹہٕ ووکھ تہٕ یمن دِمو تمہٕ تہِ پوشن نہٕ!23مگر یہُوواہنؔ ووٚن موسیٰؔ ہس، "کیاہ ژٕ چُھکھا زانان زِ مےٚ چُھنہٕ کانٛہہ طاقت؟ وۅنؠ وُچھکھ ژٕ بہٕ ہیٚکا تہِ کٔرِتھ یہ کرنُک بہٕ ونان چُھس۔24پتہٕ دراو موسیٰؔ مقدس خٟمہ منٛزٕ نیٚبر تہٕ ونُن اسرائیلی لوٗکن یہ یہُوواہنؔ ووٚن۔ پتہٕ کٔرؠ تٔمؠ ستتھ زِٹھؠ جمع تہٕ ونُن تِمن مقدس خٟمس نِش ۅدٕنؠ روزنہٕ باپتھ۔25پتہٕ آو یہُوواہؔ تتھ ابرس منٛز یُس خٟمس پیٚٹھؠ کِنؠ اوس تہٕ سپُد موسیٰؔ ہس سٟتؠ ہمکلام۔ یہُوواہنؔ نیٚو موسیٰؔ ہس کینٛہہ روحٲنی طاقت واپس یُس تٔمؠ تس دیُتمُت اوس تہٕ دِتُن ستتھن سردارن۔ تِمن منٛز یُس روحٲنی طاقت آو تمہِ سٟتؠ دِژ تِمو نبوت انجام، مگر تِمو کۅر یہ صرف اکہِ پھرِ۔26تمو ستتھَو زِٹھیٚو منٛزٕ ٲسؠ زٕ زِٹھؠ یمہٕ موسیٰؔ ہن منتخب کٔرؠ، اکھ الدادؔ تہٕ بیٚیہِ میدادؔ ٲسؠ نہٕ تمہِ تتہِ ییٚلہ باقی لوٗکھ تتہِ جمع ٲسؠ۔ تِمو ترُوو نہٕ پنُن خٟمہ أتی تہٕ گے مقدس خٟمس برُنٛہہ کنہِ کھڑا۔ مگر یہُوواہؔ سُنٛد روحٲنی طاقت گو تِمن پٮ۪ٹھ تہِ نٲزل تہٕ تِم تہِ لٔگؠ نبوت ورتاونہِ۔27أکؠ نوجوان نفرن أنؠ دور تہٕ ونُن موسیٰؔ ہس، "الدادؔ تہٕ میدادؔ چھِ پننٮ۪ن تمام خٟمن منٛز نبوت کران۔"28یسوعؔ یمؠ موسیٰؔ ہس لۅکچارٕ پٮ۪ٹھٕ مدد کۅر ووٚن، "جناب، تِمن ؤنیٚو زِ تِم کرن نہٕ یہ۔"29مگر موسیٰؔ ہن دِتُس جواب، "کیا توٚہہِ چھا یہ فِکر زِ تِم واتناون میانِس عزتس نقصان؟ کاش یہُوواہؔ سنٛدؠ تمام لوٗکھ ہیٚکہٕ ہن نبوت کٔرِتھ۔ کاش یہُوواہؔ دییہِ ہے تِمن سارنی پنُن روحٲنی طاقت! 30پتہٕ گے موسیٰؔ سنٛدؠ تمام قٲید پن پننٮ۪ن خٟمن منٛز واپس۔31پتہٕ سوز یہُوواہنؔ سمندری واوٕ طوفان۔ تٔمؠ وُڈٕنٲوؠ کمپس انٛدؠ پٔکؠ سٲری کَکو بٹیر، تہٕ کَکو پیٚے زمینس پٮ۪ٹھ ؤسؠ ؤسؠ۔ یمہٕ گے زمینہِ پٮ۪ٹھ اکھ میٹر تام تٔھدؠ جمع۔ 32لہٰذا دراے لوٗکھ نیٚبر تہٕ اتھ دوٚہس تہٕ راتس تہٕ دویمہِ دوٚہہ تہِ سوٚمبراوِکھ یمہٕ کَکو۔ باسان اوس زِ پرٛتھ کانٛسہِ نفرن کٔرؠ لگ بگ زٕ کیوبِک میٹر جمع! تِمو ترٲوؠ سٲرسےٕ کیمپس انٛدؠ پٔکؠ کَکو وہرِتھ، تاکہِ تِم کَکو گژھن خوشک۔33پتہٕ لٲگؠ تِمو رٔنِتھ تمہٕ کھیٚنؠ۔ مگر ییٚلہ تِم ماز کھیٚوان ٲسؠ تہٕ یہُوواہنؔ کۅر پننہِ ناراضگی ہُنٛد اظہار۔ تٔمؠ سوز تِمن وُبا یمہِ سٟتؠ واریاہ نفر مودؠ۔34یمہٕ لوٗکھ مودؠ تہٕ دفن سپدؠ تِم ٲسؠ تِمے یمو ونمُت اوس زِ تِم چھِ ماز کھیٚون یژھان یتھٕ پٲٹھؠ أسؠ مِصرس منٛز کھیٚوان ٲسؠ۔ لہٰذا تھوو تِمو تتھ جایہ قبرُوت ہتاوہؔ ناو، تمیُک مطلب گو خٲہش کرن والیٚن ہنٛزٕ قبرٕ۔" 35تتہِ پٮ۪ٹھٕ دراے اسرائیل لٕکؠ لوٗکھ مشرِقس کُن یۅتام تِمہ حصیراتؔ وٲتؠ، تتہِ ٹھہریاے تہٕ پتہٕ بیٹھؠ واریہس وقتس تٔتی۔
Bridge Connectivity Solutions Pvt. Ltd.