Aibraniyi5
1A knyi Pirisiti dnagbmai dəhodəhoi n aza atasni nu, jesnu a n woi knyignyi nabai wa gnyi n aza apitaɓwi nu, n aɓo n ɓa to Shekwoyi, wa ga anyaga jesnu wa ga anyakwnukwnu ntu n aleifyi ɓo.2Wo myi wa vyi n aza yii pəceye n ɓa to n gənyikpei lo m jesnu ɓai ɓwu zokwo, shikwonyi əwo n wohni wo ɓa myi wa gbakalá.3Cenuzhni kwonyi zhni ɓəshishi nu wa ga anyakwnukwnu ntu əwohni aleifyi ɓo, n kwnusnu n aza aleifyii.4Njesnu əzaho to lo n wo la mwamwa ye ga əwohni m, ama wo gwo kwo əsa n Shekwoyi nu yi wo n ɓwasnu shi a ɓə yi Haruna nyi.5N ɓwasnu n zokwo ye, Kirisiti to ɓə la mwamwa ye ga əwohni nge wo la zè pirisiti dnagbmai m. Ama Shekwoyi wa gna wo,“Ho zhni əmi Nugwnu nu;N naiye mi la zhni əho Dada.”6Ngye shi wo ncei da lo n ɓwado,“Ho zhni pirisiti nu nyalonyalo,n kwo vyi Myelkizedek ofye.”7Fyi n Yeisu anyipyei anyìgyi nya dna n əknyi, wo ɓə kwu aduwazhni n awyegyii n ɓwucii n awyenyii ga əza n wo ɓə ɓa myi wa gnyi wo n əfyi, jesnu a kwu əwo aduwazhni wo, ntu n əwohni gaga ɓo dna n tukwogba.8Kwo shikwonyi wo ɓə zhni Nugwnu nu, wa tu ɓəgbetuvyi mwi n əɓo n wo ɓə gyeazhnì n əkwo ɓo nyi,9jesnu, shi a ɓə zè n əwo nunui zhnii, waa zè zokwo gnyignyi nyalonyalo nya ga aza vnyanya n ɓa vyi wo ɓəgbetu.10Njesnu Shekwoyi ɓə n woi knyignyi ntuge waa zhni pirisiti dnagbmai vyi Myelkizedek ofye.
Ɓəkwnukwnù ntu myimyiya ɓo
11Yi n aɓoi lo n mwa n yi ɓa da tu n ɓəye tukwo, ama kwo dnaɓo lo, n yi ɓa wu fye kwo pəipəi ntuge fye to ye yì əfyehni lo fya ɓwa awyega m.12Ɓəhnihni, fye kwnuce lo, fye ye zhni anyawuyi nu nsaiye, ama fye ye n apmai lo əzaho wa wu fye aɓoɓyiɓyii Shekwoyi ɓədagbma nya n shnasnusnu. Fye ye ɓeɓegbma nu, toge nyagyi kpokəloi m!13Zahozahoyi n wo ye yé ɓeɓelo, wo ye zhni əɓyi-pwutu nu, wo too dami n nyawui tu n ɓəfyece tukwo m.14Ama nyagyi kpokəloi zhni aza akpikwoi nya nu, aza n ɓa zhni apma n kwoi ciici, ɓa la əɓahni ta nabai ɓa kpe əɓo manai n kakayi n əɓo nukwoii.Biblica, Inc.