LUKA5
1Kɨro kɨgʉma, Yesʉ abyaga n'imene emʉsɨke w'engetsɨ y'iNgenesareti. Muhindano mʉnene wa bandʉ babyaga nɨabamʉyɨndɨrɨtsya balɨ abashondya ɨonvwa eKɨnwa kya Gongo.2Mwashʉnga matho abɨrɨ emʉsɨke w'engetsɨ, abarobi nɨbamathoka mʉwo, nɨabashʉga ehikira hyabo.3Yesʉ mwashambɨra mʉ bwatho bʉgʉma bw'oko matho abyagaho. N'obwatho obo bwabyaga bwa Simoni, Yesʉ mwamʉbwɨra athɨ: «Fʉnda obwatho b'omo ngetsɨ hale hake n'ekɨthaka.» Mwikala mo bwatho obo n'ɨthanga ɨkangɨrɨtsya omuhindano wa bandʉ.4Abere amamala ɨkangɨrɨtsya mwabwɨra Simoni athɨ: «Fʉnda obwatho bo ahalɨ metsi male, mʉgʉshe ehikira hyenyu mʉrobe ko mahere.»5Simoni mwamʉshʉbɨtsya athɨ: «Mʉkangɨrɨtsya, mothʉroba mo kɨro kyoshi he mothʉhɨna. He kʉshangwa wo wamanegena nyagʉsha ehikira.»6Mobagʉsha ehikira mo ngetsɨ. Mobitha mahere mangɨ kʉtsɨbʉ ihika ko kɨka ehikira hyabo niehishondya ɨbereka.7Mobakohetsya balikyabo bo babyaga mo bʉndɨ bwatho bahike bangɨrɨrebo. Balikyabo babere bahika mobotsutsya amatho abɨrɨ woshi hofɨ bashende.8Simoni Petero abere ashʉnga ebyo, mwafʉkama embere sa Yesʉ. Mwanegena athɨ: «Nyinya-kowethʉ, yɨfʉnde hale nangye, kʉshangwa nyɨrɨ mukoli w'ebɨtsɨbʉ!»9Simoni hagʉma na balikyabo boshi mobashweka kʉtsɨbʉ bʉshana n'obʉngɨ bw'amahere bithaga.10Yakobo na Yoani bagala ba Sebetayo barobi balikyabo Simoni, nabo mobashweka kʉtsɨbʉ. Hewethuwe Yesʉ mwabwɨra Simoni athɨ: «Ʉthʉbahaga! Ɨthanga munobwire wabya murobi wa bandʉ.»11Aho, mobakʉrɨra amatho wabo ko kɨthaka. Mobashiga ebyoshi n'ɨkwama Yesʉ.12Yesʉ abere analɨ mʉ mʉgʉma w'emiyi y'ekɨhʉgo ekyo, mohahika mʉndʉ alɨko bɨbenzɨ ko mʉbɨrɨ woshi. Omʉndʉ oyo abere ashʉnga Yesʉ mwafʉkama embere sɨwe n'obʉsʉ mobwahika ahishi n'ɨmʉshaba kʉtsɨbʉ athɨ: «Ee Nyinya-kowethʉ, wamashasha wanganyetsya.»13Yesʉ mwalambʉla okʉboko mwamʉkolako n'ɨnegena athɨ: «Nyishashire, were.» Aho n'aho ebɨbenzɨ ebyo mobyamʉthokako.14Yesʉ mwamʉhamʉla athɨ: «Ʉthabwɨraga mʉndʉ bʉshana n'ebi. Hewethuwe ʉgende uyayikangye ko muheri. Honyuma kw'aho uhulukye ebɨhembo ng'oko oMʉgomba wa Mʉsa ahamulire, kw'ikangania ko bandʉ boshi ko wamera. »15Mokɨthaleka engʉlʉ ya Yesʉ ɨthagenda mo bandʉ. Bandʉ bangɨ mobagenda abahindana bʉshana bonvwe ebyo Yesʉ agenda anegena na kandɨ balamibwe amakoni wabo.16Hewethuwe Yesʉ agenda ayɨhɨgʉla kʉbo, n'ɨya handʉ hathalɨ bandʉ bʉshana n'ɨyashaba Gongo.17Kɨro kɨgʉma Yesʉ agenda akangɨrɨtsya bandʉ. aBafarisayo n'abakangɨrɨtsya b'oMʉgomba bagʉma bo bathokaga mo miyi yoshi y'ekɨhʉgo ky'iNgalilaya, na ky'iYuteya, n'omo muyi w'ɨYerʉsalemʉ nabo babyaga nibikereho. Yesʉ agenda alamya abakoni mo maka wa Nyinya-kowethʉ Gongo.18Bandʉ bagʉma mobahika nibahekire kipoyi kɨrɨko mukoni wa makonongola. Niabashondya ɨmwɨngɨtsya mo nyʉmba bamuhire embere sa Yesʉ.19He mobabʉsha nzɨra y'imutsukyamo bʉshana n'abandʉ bangɨ. Bʉshana n'ebyo mobashamba ko luthwe lw'enyʉmba eyo. Mobathokya ko bikayi, mobamukimya mo bandʉ embere sa Yesʉ nɨanalɨ ko kipoyi kɨwe.Abandʉ abakimya mukoni ko luthwe lw'enyʉmba20Yesʉ abere ashʉnga olwɨkɨrɨtsyo lw'abandʉ abo, mwabwɨra omukoni oyo athɨ: «Mwiraye, ebɨtsɨbʉ byawe byamaganyɨrwa!»21Abakangɨrɨtsya b'oMʉgomba n'aBafarisayo abo, mobathanga ɨganɨtsya n'ɨyɨbʉtsya bathɨ: «Oyu nɨ ndɨ yo ʉhatsya kʉ Gongo? Nɨ ndɨ yo wangaganyɨra ebɨtsɨbʉ athalɨ Gongo yowene?»22Yesʉ mwamɨnya emɨganɨtsye yabo mwabʉtsyabo athɨ: «Bʉshana na ki omʉganɨtsya muthyo mo mɨthɨma enyu?23Ɨngo mʉnyɨbwɨre! Kɨhe kyo kyolo ɨnegena mbʉ: “Wamaganyɨrwa ebɨtsɨbʉ byawe,” kʉtse ɨnegena mbʉ: “Hangana ʉgende”?24Enyishondya mʉmɨnye kw'ingye Mʉgala w'oMʉndʉ nyiwithe amaka w'ɨganyɨra ebɨtsɨbʉ hano ishi.» Honyuma kw'aho Yesʉ mwabwɨra owamakonongola athɨ: «Ingye ngyo nyɨkʉbwɨra nyɨthɨ: Wimana! Tsɨmba ekipoyi kyawe ʉshʉbe eka.»25Kona kathambi ako omʉndʉ oyo mwahangana embere s'abandʉ mwatsɨmba ekipoyi ekyo abyaga agonzereko mwashʉba ewe nianemusingya Gongo.26Abandʉ boshi mobashukumana, mobatsɨmbwa n'obʉba, mobasingya Gongo, nɨabanegena bathɨ: «Munobwire thwamashʉnga ebɨthɨko-thɨko!»27Honyuma kw'aho, Yesʉ mwathoka mo nyʉmba eyo. Mwashʉnga kʉ mukarani mʉgʉma w'ekoli erɨtsɨna lɨwe nɨ yo Lawi. Lawi oyo abyaga n'ikere mo biro agenda alɨhɨsɨra Ekoli. Yesʉ mwamʉbwɨra athɨ: «Nyɨkwame.»28Lawi mwahangana, mwashiga ebyoshi n'ɨkwama Yesʉ.29Honyuma kw'aho Lawi mwakolera Yesʉ yo linye linene mo nyʉmba yɨwe. Mo nyʉmba eyo mwabyaga bakarani bangɨ b'ekoli na bandɨ bandʉ bagenda abalya hagʉma nabo.30aBafarisayo n'abakangɨrɨtsya b'oMʉgomba b'omo kɨkembe ky'aBafarisayo abo, babere bashʉnga ebyo mobayɨfweba, n'ɨbwɨra abɨga ba Yesʉ bathɨ: «Nɨ ki kyo kɨreka omulya n'ɨshoma hagʉma n'abakarani b'ekoli n'abakoli b'ebɨtsɨbʉ?»31Yesʉ mwashʉbɨtsyabo athɨ: «Abatsibuhire bathashondya mʉshake hewethuwe nɨ abakoni bobanamushondya.32Ingye nyithahikaga ɨbɨrɨkɨra abathʉnganene embere sa Gongo, hewethuwe nyahikaga ɨbɨrɨkɨra abakoli b'ebɨtsɨbʉ bʉshana babɨndʉke bathoke mo bɨtsɨbʉ byabo.»33aBafarisayo mobabwɨra Yesʉ bathɨ: «Abɨga ba Yoani n'abʉwethʉ kuthyo abanagenda abayima akalyo n'ɨshaba. Hewethuwe abʉwawe ɨbo abanagenda abalya n'ɨshoma.»34Yesʉ mwashʉbɨtsyabo athɨ: «Mwangabwɨra abo bathabɨrɨkɨrwa ko buheruki mʉthɨ bathalyaga n'oyo uthaherukya nɨakɨnalɨ nabo? Kiro!35Ebɨro byandahika oyo uthaherukya andathokibwa mʉbo. Nɨ mo bɨro ebyo mobandagenda abayima akalyo.»36Yesʉ mwashʉba tsɨrabo omushinga ono athɨ: «Hathalɨ mʉndʉ yo wangatsa kɨbandɨko ko lʉkɨmba luhyaluhya n'ɨlandɨrakyo ko lʉkɨmba lukulire. Kʉshangwa omʉndʉ amayɨra athyo nɨamaberenga olʉkɨmba luhyaluhya, n'ekɨbandɨko kyo kɨthathokako kɨthangatsɨmbana n'olʉkɨmba lukulire.37Kandɨ hathalɨ mʉndʉ oyo unahira etifayi nyihya-nyihya mʉ bɨrega bya ngobi sikulire. Oyo wangakola athyo angaleka etifayi nyihya nɨyaberenga ebɨrega ebyo, etifayi nɨyashesheka n'ebɨrega nɨbyabɨha.38Hewethuwe, lɨtholere etifayi nyihya-nyihya niyahirwa mʉ bɨrega bihya-bihya.39Kandɨ hathalɨ mʉndʉ wamashoma ko tifayi yihire yowangashʉba shondya tifayi ya kera. Kʉshangwa nɨanegena athɨ: “Eyihire yo yikwirire kʉtsɨbʉ!”»
The Seed Company