LUKA4
1Yesʉ mwathoka ko lwitsi lw'eYorotani nɨalɨ na maka w'oMʉthɨma Mwerʉ. N'oMʉthɨma Mwerʉ oyo mwamʉthwala mo mbwarara.2Mwabya eyo yo bɨro makumi ane, Sitani agenda amʉlengako. Ebɨro byoshi ebyo mwathalya kɨndʉ. Ebɨro ebyo byabere byahwa, mwafwa nzala.3Aho Sitani mwamʉbwɨra athɨ: «Ɨwe, kwenene wamabya ʉlɨ Mʉgala wa Gongo, bwɨra eribwe eri lɨhɨndʉke mukati.»4Yesʉ mwamʉshʉbɨtsya athɨ: «Kushakirwe mo Mashako Abuyirire kʉthɨ: “Omʉndʉ athɨndabyeho bʉshana n'akalyo kuroshi. ”»5Honyuma kw'aho Sitani mwɨrʉkɨtsya Yesʉ y'elʉgʉlʉ kʉtsɨbʉ. Aho n'aho mwamʉkangya amamɨ woshi wa hano ishi,6n'ɨmʉbwɨra athɨ: «Nyakʉha obuthegeki boshi n'obushoki bw'amamɨ aya. Kʉshangwa ebyoshi ebyo nyahabawabyo, nangye nyangahabyo mʉndʉ woshi-woshi yo nyishashire.7Aho, wamanyɨfʉkamɨra mw'inyiramya ebyoshi ebyo nɨbyabya bɨwawe.»8Yesʉ mwamʉshʉbɨtsya athɨ: «Kushakirwe mo Mashako Abuyirire kʉthɨ: “Ʉgende uramya Nyinya-kowethʉ Gongo wawe, n'ɨmʉkolera ɨye mʉsha. ”»9N'oko nduli y'ebyoshi, Sitani mwathwala Yesʉ mo muyi w'ɨYerʉsalemʉ, mwamuhira ko mukuthu w'eNyʉmba ya Gongo n'ɨmʉbwɨra athɨ: «Wamabya ʉlɨ Mʉgala wa Gongo yɨgʉshe ahishi,10kʉshangwa kushakirwe kʉthɨ:“Gongo andahamʉla abamalaɨka bʉwe bakutheye.”11Kandɨ kushakirwe mo Mashako Abuyirire kʉthɨ:“Bakʉheka mo minwe yabo, bʉshana ekɨshando kyawe kɨthatsɨkalaga kw'ibwe. ”»12Yesʉ mwamʉshʉbɨtsya athɨ: «Kushakirwe mo Mashako Abuyirire kʉthɨ: “Ʉthagenda ʉlenga kʉ Nyinya-kowethʉ Gongo wawe. ”»13Sitani abere amala ɨlenga kʉ Yesʉ mo nzɨra soshi, mwathamʉleka, ihika kʉ ɨndɨ ndambi.14Yesʉ mwashʉba mo kɨhʉgo ky'iNgalilaya nɨalɨ n'akagala k'oMʉthɨma Mwerʉ. Engʉlʉ yɨwe moyahika mo kɨhʉgo kyoshi ekyo.15Agenda akangɨrɨtsya abandʉ b'omo sinakoki yabo. N'abandʉ boshi niabamusingya.16Yesʉ mwaya mo muyi w'iNasareti owɨshʉkɨragamo. Ekɨro ky'eSabato kyabere kyahika, mwɨngɨra mo sinakoki ng'oko abyaga abegere. Mwimana bʉshana asomere abandʉ bw'eKɨnwa kya Gongo.17Mwahabwa mʉbʉngo w'ekɨtabo ky'omʉmɨnyeretsɨ Isaya, naye mwabʉngʉlawo. Mwahikira ahashakirwe hathɨ:18«oMʉthɨma wa Nyinya-kowethʉ alɨ kw'ingye.Kʉshangwa amanyɨhaka mafʉtha nyɨgende nyɨyakangɨrɨtsye eNgʉlʉ Mbʉya ko batsene.Amanyɨthʉma nyɨfʉlɨre bo balɨ mo muliki bw'omwatsɨ ko bamɨnʉlwa.N'esombumi natho ko salola.Na bo banubibwa babye n'ɨyɨbwara.19N'ɨfʉlɨra abandʉ b'omwatsɨ k'omwaka amahika wo Nyinya-kowethʉ w'akanganiamo obʉbʉya bʉwe ko bandʉ. »20Honyuma kw'aho, Yesʉ mwabʉngabʉnga ekɨtabo mwahakyo omukoli w'omo sinakoki mwayikala. N'abandʉ boshi babyaga bikere mo sinakoki eyo, mobamʉhandako amesho.21Aho Yesʉ mwathanga ɨbwɨrabo athɨ: «aMashako Abuyirire mwamonvwa wo nyɨthoka ɨbasomera amabererera munobwire.»22Abandʉ boshi bagenda abamogera Yesʉ n'ɨshweka bʉshana n'ebɨnwa bɨbʉya ebyo agenda anegena. Mobathanga ɨnegena bathɨ: «Oyu ndɨ nɨ mʉgala wa Yosefʉ!»23Yesʉ mwabwɨrabo athɨ: «Nyetsi kundu mwandanyɨthega mo mushinga ono, owanegenire athɨ: “Mʉshake, yilamye wowene!” Kandɨ mwanyɨbwɨra mʉthɨ: “Mothwonvwa ebyoshi wakolaga ɨKaperenaʉmʉ, kolabyo n'omo muyi enyu ono.”»24Mwashʉba bwɨrabo kandɨ athɨ: «Kwenene hathalɨ mʉmɨnyeretsɨ yo unakokibwa kʉbʉya ko wabo.25Kwenene enyɨbabwɨra nyɨthɨ mo kɨhʉgo ky'iIsiraeli mwabyaga bashʉmbakatsɨ bangɨ mo mʉgʉlʉ w'omʉmɨnyeretsɨ Elia. Mo mʉgʉlʉ oyo envʉla moyamala mɨaka ishathu na myetsɨ ndathʉ bʉthawa. Mokwabya nzala nzɨbʉ mo kɨhʉgo kyoshi. 26Mo bashʉmbakatsɨ boshi abo, Gongo mwathathʉma Elia awathikye mʉgʉma wa kʉbo. Hewethuwe mwamʉthʉma kʉ mʉgʉma w'oko muyi w'ɨSarepata mo kɨhʉgo ky'eSitona. 27«Kandɨ mo kɨhʉgo ky'iIsiraeli mwabyaga babenzɨ bangɨ mo mʉgʉlʉ w'omʉmɨnyeretsɨ Elisha. Hewethuwe mohathabya n'omʉgʉma wa kʉbo w'etsɨbwaga, he Namani mʉsha w'omo kɨhʉgo ky'eSuria. »28Abandʉ boshi bo babyaga mo sinakoki eyo babere bonvwa ebyo mobakapɨkɨra.29Mobimana, mobaligitha Yesʉ mo muyi, mobamʉkʉrɨra ko kathwa k'omuyi oyo abyaga ahimbireko. Niabashondya bamukunire mo muthiri.30Hewethuwe Yesʉ mwasheshera mo kathi-kathi kabo, n'ɨyɨgendera.31Honyuma kw'aho Yesʉ mwandagalɨra mo muyi w'ɨKaperenaʉmʉ mo kɨhʉgo ky'iNgalilaya. Ekɨro ky'eSabato kyabere kyahika mwakangɨrɨtsya abandʉ.32Abandʉ mobashweka kʉtsɨbʉ bashʉnga emɨkangɨrɨtsye yɨwe, kʉshangwa ebɨnwa bɨwe byabyaga nibishikire.33Mo sinakoki eyo mwabyaga mʉndʉ nɨalɨko mʉtsɨmʉ mʉbɨ. Omʉndʉ oyo mwahambala kʉtsɨbʉ athɨ:34«Ahaaa! Yesʉ w'iNasareti mbe uthushondyako ki? Wahikaga bʉshana n'ithubihya? Nyikwetsi kʉbʉya. Ɨwe ʉlɨ Mubuyirire wathʉmawa na Gongo!»35Yesʉ mwakemera kʉtsɨbʉ omʉtsɨmʉ oyo athɨ: «Tsɨra! Na ʉthoke ko mʉndʉ oyu!» Aho n'aho omʉtsɨmʉ oyo mwahuma omʉndʉ oyo yo ahishi mo kathi k'abandʉ, mwamʉthokako bʉthamwagatsya.36Abandʉ boshi mobashweka kʉtsɨbʉ nɨababwɨrana bathɨ: «Kɨnwa mʉhanda ki eki? Omʉndʉ oyu abɨnga emɨtsɨmʉ ko bandʉ mo maka na kagala athɨ bathoke kʉbo aho n'aho nabo nɨbathoka!»37Bʉshana n'ekyo engʉlʉ ya Yesʉ moyagenda mo kɨhʉgo kyoshi ekyo.38Yesʉ mwathoka mo sinakoki eyo, mwaya omwa Simoni. Abere ahikamo, mweya nyatsala wa Simoni niathithimana bʉshana n'akapururu. Mobashaba Yesʉ amʉlamye.39Yesʉ mwunama niabindukire eyɨrɨ omʉkatsɨ oyo, mwakemera akapururu ako, nako kamamulika. Aho n'aho omʉkatsɨ oyo mwimana n'ɨthekerabo kalyo.40Erɨtsʉba lyabere lyalenga, mobalethera Yesʉ yo abakoni boshi bo bagenda abagalwa n'amagali mɨnamɨna. Yesʉ mwagenda ahira ko bʉlɨ mʉgʉma wa kʉbo kw'eminwe n'imulamya.41N'emɨtsɨmʉ moyathoka ko bandʉ bangɨ nɨeyɨhambala yɨthɨ: «Ɨwe ʉlɨ Mʉgala wa Gongo!» Hewethuwe Yesʉ mwakemeraro n'ɨkagaro ɨthanegenaga, kʉshangwa yabyaga niyetsi kw'ɨye nɨ Kirisito.42Bwabere bwakya, Yesʉ mwathoka mo muyi, mwaya ahathalɨ bandʉ. Omuhindano mwathanga imushondya. Babere bamʉshʉngako mobashondya ɨmʉkɨkɨra bʉshana athashʉba mikabo.43Hewethuwe Yesʉ mwabwɨrabo athɨ: «Nyɨtholere nɨnyafʉla eNgʉlʉ Mbʉya y'oBwamɨ bwa Gongo y'omo yɨndɨ miyi naro. Kʉshangwa Gongo anyɨthʉmaga bʉshana n'ekyo.»44Aho Yesʉ agenda afʉlɨra abandʉ bw'eNgʉlʉ Mbʉya y'omo so sinakoki s'omo kɨhʉgo ky'iYuteya.
The Seed Company