LUKA2
1Ko bɨro ebyo, Ngosito Kaisari mwahamʉla abandʉ boshi babyaga mo bɨhʉgo byoshi agenda athegeka baye ko fishi. 2Efishi nyɨmbere eyo yakolekaga mo bɨro Kurenio abyaga mʉkʉlʉ w'ekɨhʉgo ky'eSuria.3Abandʉ boshi mobayakolera efishi eyo, obʉlɨ mʉndʉ ko muyi w'amabʉthwa ʉwe.4Yosefʉ naye mwathoka mo kɨhʉgo ky'iNgalilaya, ko muyi w'iNasareti. Mwɨrʉkɨra mo kɨhʉgo ky'iYuteya mo muyi w'ɨBetelehemʉ w'omwamɨ Tawiti abʉthɨrawamo; kʉshangwa naye abyaga w'omo lʉganda lwa Tawiti.5Mw'ɨya ko fishi mwagenda na Marɨa oyo agenda ahikya; naye abyaga mʉkʉle.6Mo mʉgʉlʉ babyaga ɨBetelehemʉ, Marɨa ebɨro bɨwe by'erɨbʉtha mobyahika.7Naye mwabʉtha mwana ʉwe mʉmbere wa bʉtsana. Amamuhira mo bɨralɨyo, amamʉlambɨka mo kiringa kʉshangwa mobathabona bʉgonzero mo nyʉmba y'abageni.8Mo kɨthambɨ ekyo mwabyaga balishya. Abalishya abo babyaga mo lʉlɨshɨtsyo nɨabatheya ebihyo byabo mo kɨro.9Malaɨka mʉgʉma wa Nyinya-kowethʉ mwahʉlʉkɨrabo, mo lʉkengerwa lw'ekyakakala kya Nyinya-kowethʉ mokyathimba kʉbo, nabo mobʉbaha kʉtsɨbʉ.Abalishya bamonvwa omwatsɨ w'ɨbʉthwa lya Yesʉ10Hewethuwe malaɨka mwabwɨrabo athɨ: «Mʉthʉbahaga! Kʉshangwa nyabalethera mwatsɨ mʉbʉya w'andaletha lʉmogo lʉnene ko bandʉ boshi.11Munobwire Mushabuli enyu amabʉthwa mo muyi w'omwamɨ Tawiti, naye nɨ Kirisito yo Nyinya-kowethʉ.12Na kɨno kyo kɨmɨnyɨkalo kyo kyabakangania: mweya lʉmekeke lʉlɨ mʉ bɨralɨyo lulambikire mʉ kiringa.»13Aho n'aho omʉmalaɨka oyo mwashʉngɨka nɨalɨ na kɨkembe kɨnene ky'abandɨ bamalaɨka ɨthoka elʉbʉla niabasingya Gongo nɨabanegena bathɨ:14«Gongo asingibwe mo lʉgʉlʉ kʉtsɨbʉ,n'abandʉ abo atsɨgɨre mo kɨhʉgo babye n'obʉholo!»15Honyuma kw'aho abamalaɨka abo mobamika abalishya, mobashʉba mo lʉbʉla. Aho abalishya mobabwɨrana bathɨ: «Thʉye ɨBetelehemʉ thʉlole nga yabere ki kyo Nyinya-kowethʉ amathʉbwɨra.»16Mobahuthukirayo, mobeya Yosefʉ na Marɨa n'olʉmekeke nilunalambikire mo kiringa.17Abalishya babere bashʉnga omwana, mobayafʉla omwatsɨ malaɨka athabwɨrabo bʉshana n'omwana oyo.18Abandʉ boshi bonvwaga omwatsɨ abalishya bafʉlaga mobashweka kʉtsɨbʉ.19Hewethuwe Marɨa mwabɨka ebyoshi ebyo mo mʉthɨma ʉwe na agenda aganɨkɨrabyo kʉtsɨbʉ.20Honyuma kw'aho, abalishya abo mobashʉbʉla. Mobagenda nɨabasɨma n'isingya Gongo bʉshana n'ebɨnwa byoshi bathonvwa n'ɨshʉnga. Kʉshangwa mobeya ebɨnwa byoshi nga ko malaɨka abwɨragabo.21Omwana abere ahika ko kɨro ky'omʉnanɨ honyuma w'erɨbʉthwa lɨwe mobamumonia. Mobamʉlʉkamo Yesʉ. Erɨtsɨna eryo lyo malaɨka ahʉlaga embere Marɨa aheke obʉkʉle.22Honyuma kw'aho, ebɨro mobyahika byo Yosefʉ na Marɨa bangayeritsye ɨkwamana n'oMʉgomba wa Mʉsa nga kw'anegenire. Mobathwala omwana y'ɨYerʉsalemʉ bʉshana bamukanganie embere sa Nyinya-kowethʉ. 23Kʉshangwa bishakirwe mo Mʉgomba wa Nyinya-kowethʉ bɨthɨ: «Obʉlɨ mwana mʉmbere w'obʉtsana andabya wa Nyinya-kowethʉ. »24Kandɨ bahikaga bʉshana n'ɨhera obʉhere buthegekire mo Mʉgomba wa Nyinya-kowethʉ athɨ: «Hɨparara hɨbɨrɨ kʉtse makʉkʉ abɨrɨ owakɨrɨ malere. »25Mo mʉgʉlʉ oyo mo muyi w'ɨYerʉsalemʉ mwabyaga mʉndʉ mʉgʉma erɨtsɨna lɨwe nɨ yo Simioni. Simioni oyo abyaga mʉndʉ athʉnganene niubahire Gongo. Agenda alɨndɨrɨra Mushabuli w'ekɨhanda ky'aBaisiraeli. oMʉthɨma Mwerʉ abyaga hagʉma naye.26Kandɨ mwamukumbulira kw'athɨndafwe athetsi alola kʉ Kirisito yo wandathʉmwa na Nyinya-kowethʉ.27Simioni mwashondolwa n'oMʉthɨma Mwerʉ, mwɨngɨra mo Nyʉmba ya Gongo. Ababuthi ba Yesʉ mobamʉlethamo akolerwe ng'oMʉgomba wa Mʉsa kw'anegenire.28Simioni mwangɨrɨra omwana mo minwe yɨwe, mwasingya Gongo n'ɨnegena athɨ:29«Nyinya-kowethʉ, wamabereretsya endagane awe.Hano wahera wanganyirika ingye mʉgombe awe nyɨfwe mo bʉholo.30Kʉshangwa ingye owene-wene nyamayɨshʉngɨra mo mesho aye oMushabuli wamathʉma.31Wamamuthegekania abye Mushabuli embere s'abandʉ boshi32oMushabuli ono yo kyakakala kyandakoletsya ko bandʉ boshi abandʉ b'ebɨhanda,kandɨ n'ɨye yo wandaletha olʉkengerwa ko bandʉ bʉwe Isiraeli.»33Ebɨnwa Simioni anegenaga kʉ Yesʉ mobyashwekya ababuthi bʉwe.34Honyuma kw'aho, Simioni mwagashanɨrabo. He mwabwɨra Marɨa nyinya w'omwana athɨ: «Shʉnga! Omwana ono athabʉthwa bʉshana athoye bandʉ bangɨ mo Isiraeli n'imania bangɨ mʉbo. Kandɨ andabya kɨmɨnyɨkalo kyo kɨthoka kʉ Gongo kyo bandʉ bangɨ bandathɨnda.35Kʉshangwa emɨganɨtsye ya bandʉ bangɨ yo yibishire yandamɨnyɨkala. Nawe wowene Marɨa wandagalwa nga mʉndʉ bathathobola mʉthɨma mu muyali.»36Kandɨ habyaga mʉkekʉlʉ mʉmɨnyeretsɨ erɨtsɨna lɨwe nɨ yo Ana. Abyaga mwalɨ wa Fanʉele w'omo lʉganda lwa Aseri. Ye Ana oyo mwamala omwe mo mɨaka ɨrɨnda bʉsha, iba ʉwe mwafwa.37Honyuma kw'aho, mwabya mʉshʉmbakatsɨ ihika kʉ mɨaka makumi mʉnanɨ n'ine. Athagenda athoka mo Nyʉmba ya Gongo, omo agendaga akolera Gongo kɨro na mwɨshɨ n'iyima akalyo n'ɨshaba.38Ana oyo mwahika mo kathambi ako, mwathanga ɨsɨma Gongo. Agenda asɨmola emyatsɨ ya Yesʉ ko bandʉ boshi bagenda abalɨndɨrɨra ko Gongo andashabʉla abandʉ b'ɨYerʉsalemʉ mo malɨgo wabo.39Ababuthi ba Yesʉ mobamala ɨkola ebyoshi ɨkwamana n'ebithegekirwe mo Mʉgomba wa Nyinya-kowethʉ. Honyuma kw'aho, mobashʉba n'omwana mo kɨhʉgo ky'iNgalilaya, mo muyi wabo w'iNasareti.40Yesʉ agenda ɨshʉka n'ɨyɨra kagala. Abyaga niotswiremo bwenge n'olʉkogo lwa Gongo nɨlʉlɨ hagʉma naye.41Ko bʉlɨ mwaka ababuthi ba Yesʉ nɨabanaya ɨYerʉsalemʉ ko kɨro kɨkʉlʉ ky'ePasaka.42Yesʉ abere amayɨra mɨaka ikumi n'ibiri mwɨrʉkɨra ɨYerʉsalemʉ hagʉma n'ababuthi bʉwe ko linye ɨkwamana n'emɨbere y'aBayuta. 43Ebɨro by'elinye y'ePasaka byabere byahwa, ababuthi ba Yesʉ mobashʉba ewabo. Hewethuwe omwana Yesʉ mwashiba ɨYerʉsalemʉ ababuthi bʉwe mobathamɨnya.44Bagendaga abaganɨtsya bathɨ analɨ mo kathi k'abandɨ bagendania. Babere bamala ɨgenda lʉgendo lwa mʉthobero mʉgʉma, mobamʉshondya mo lʉganda lwabo na mo balikyabo.45Hewethuwe mobathamʉbona. Bʉshana n'ekyo, mobashʉba ɨYerʉsalemʉ nibanemumushondya.46Honyuma wa bɨro bɨshathʉ, mobamweya mo Nyʉmba ya Gongo, n'ikere mo kathi k'abakangɨrɨtsya b'oMʉgomba nɨahʉlɨkɨrɨtsyabo n'ɨbʉtsyabo.47Aboshi bagenda abamʉhʉlɨkɨrɨtsya nɨabashweka bʉshana n'obwenge bʉwe n'emɨshʉbɨtsye yɨwe.48Ababuthi bʉwe babere bamʉshʉnga mobashweka kʉtsɨbʉ. Nɨmo nyinya amʉbwɨra athɨ: «Mbe mwanaye! Bʉshana na ki wamathʉkolera ebi? Lola ingye na sho thwamakushondya emɨthɨma nɨyɨthalɨ mo nda!»49Naye mwashʉbɨtsyabo athɨ: «Mʉthanyɨshondetsya ki? Muthetsi ko lɨtholere ninyabya mo Nyʉmba ya Thatha?»50Hewethuwe eby'agenda abwɨrabo mobathonvwabyo.51Ko nduli y'ebyoshi ebyo, Yesʉ mwandagala hagʉma n'ababuthi bʉwe mw'ɨshʉba iNasareti, abyaga niashikitsyebo. Ebɨnwa byoshi ebyo nyinya nɨanabɨkabyo mo mʉthɨma ʉwe.52Yesʉ agenda ɨshʉka mo bwenge na mo lʉgero n'omo lʉkogo embere sa Gongo n'embere s'abandʉ.
The Seed Company