Yoani9
1Yesʉ abere anemʉtsʉka mo nzɨra, mwashʉnga mʉndʉ mʉgʉma yo wabyaga mbumi ɨthanga kw'ɨbʉthwa lɨwe.2Abɨga bʉwe mobamʉbʉtsya bathɨ: «Mʉkangɨrɨtsya, bʉshana na ki omʉndʉ oyu mwabʉthwamo mbumi? Nɨ bʉshana n'ebɨtsɨbʉ bɨwe kʉtse ebɨtsɨbʉ by'ababuthi bʉwe?»3Yesʉ mwashubya athɨ: «Omʉndʉ oyu athabʉthawa mbumi bʉshana n'ebɨtsɨbʉ bɨwe kʉtse n'ebɨtsɨbʉ by'ababuthi bʉwe. Hewethuwe abʉthawa athya bʉshana emɨkolano ya Gongo ɨmɨnyɨkale ɨtsʉkɨra ɨye.4Ko bʉkɨnatsene, lɨtholere nɨthwakola emɨrɨmo ya yo wanyɨthʉmaga. Kʉshangwa bwamakʉra, ko ndambi eyo omʉndʉ athangakotsya ɨshʉba kola.5Mo ndambi nyɨkɨnalɨ hano ishi, nyɨrɨ kyakakala kya hano ishi.»6Yesʉ abere amamala ɨnegena athyo, mwatsɨra mathandɨ w'ahishi, mwatsʉmba bɨtholo mo mathandɨ ayo, na mwahaka ebɨtholo ebyo ko mesho w'embumi eyo.7Yesʉ mwabwɨra embumi athɨ: «Genda ʉyanabe mo mesho ko kisima ky'iSiloamu .» Siloamu n'ɨnegena mbʉ: yo wathʉmawa. Aho embumi eyo moyaya naba mo mesho na moyashʉbʉla n'ɨyɨhera eyɨlola.8Abahimbani b'embumi eyo n'abo babyaga babegere ɨmʉshʉngako alɨahemeretsya, bagenda abanegena bathɨ: «Omʉndʉ oyu athalɨ yo wagenda ikala ahishi n'ɨshabɨrɨtsya?»9Bagʉma bagenda abanegena bathɨ: «N'ɨye!» Na bandɨ bathɨ: «Ɨhɨ, nɨ ʉndɨ amushoshire.» Hewethuwe omʉndʉ oyo mwanegena athɨ: «N'ingye.»10Aho, mobamʉbʉtsya bathɨ: «Amesho awe athatsɨbʉkala athɨ?»11Mwashubya athɨ: «Omʉndʉ yo unahʉlwamo Yesʉ mwakomya bɨtholo, mwanyɨhakabyo ko mesho na mwanyɨbwɨra athɨ: “Genda ʉyanabe ho Siloamu.” Monyɨyayo, monyɨnaba mo mesho na lɨno enyɨlola.»12Mobashʉba mʉbʉtsya bathɨ: «Omʉndʉ oyo alɨ hayi?» Mwashubya athɨ: «Nyithetsi.»13Mobathwala oyo wabyaga mbumi eyɨrɨ aBafarisayo.14Ekɨro Yesʉ atsʉmbaga ebɨtholo n'ilamya embumi, kyabyaga kɨro kya Sabato.15Aho, aBafarisayo nabo mobamʉbʉtsya ng'amesho ʉwe athatsɨbʉkala athɨ. Mwashʉbɨtsyabo athɨ: «Mwanyɨhaka bɨtholo ko mesho, nangye monyɨyanaba na lɨno enyɨlola.»16Bagʉma mo Bafarisayo mobanegena bathɨ: «Omʉndʉ oyu athathokaga ewa Gongo, kʉshangwa athashikitsye eSabato.» Hewethuwe abandɨ mobanegena bathɨ: «Omukoli w'ebɨtsɨbʉ anganakola bɨthɨko-thɨko bɨrɨ ng'ebi?» Aho, mobagabana.17aBafarisayo mobashʉba bʉtsya embumi yo yɨthalama bathɨ: «Nawe, oyo ʉthakʉtsɨbʉlako amesho, ʉmʉnegenako ʉthɨ ki?» Naye mwashubya athɨ: «Nɨ mʉmɨnyeretsɨ.»18Hewethuwe abakʉlʉ b'aBayuta mobathɨkɨrɨtsya kw'athalɨ mbumi ko na lɨno ahera alola, ihika ko kɨka mobabɨrɨkɨra ababuthi bʉwe,19n'ɨbʉtsyabo bathɨ: «Omʉndʉ oyu yo n'omwana enyu yo mwahʉla mʉthɨ abʉthawa mbumi? Aho, athɨ kw'amalola?»20Ababuthi bʉwe mobashʉbɨtsyabo bathɨ: «Kweneneko oyu nɨ mwana ethʉ na abʉthawa ni mbumi.21Hewethuwe thuthetsi ekyo kyamaleka nɨalola. Na thuthetsi oyo watsɨbʉlaga amesho ʉwe. Ɨye nɨ mʉndʉ mʉkʉlʉ, mʉmʉbʉtsye naye ababwɨra ebyo bithamuhikira!»22Ababuthi bʉwe banegenaga bathyo kʉshangwa babyaga n'ibubahire abakʉlʉ b'aBayuta. Abakʉlʉ b'aBayuta abo babyaga nibamalire ɨhʉlɨkɨrɨrana iriitha mo sinakoki obʉlɨ mʉndʉ woshi woshi yo wɨkɨrɨtsye ko Yesʉ nɨ Kirisito.23Ekyo kyo kyalekaga ababuthi bʉwe nɨbanegena bathɨ: «Ahera mʉndʉ mʉkʉlʉ mʉmʉbʉtsye.»24aBafarisayo mobabɨrɨkɨra yo wabyaga mbumi yo lya kabɨrɨ n'ɨmʉbwɨra bathɨ: «Negena ekwenene embere sa Gongo. Ithwe thwetsi kw'omʉndʉ oyu ni mukoli w'ebɨtsɨbʉ.»25Naye mwashʉbɨtsyabo athɨ: «Nyithetsi nga ni mukoli wa bɨtsɨbʉ kʉtse ɨhɨ. Hewethuwe nyetsi kɨndʉ kɨgʉma kuroshi: nyɨthalɨ mbumi, he lɨno enyɨlola.»26Mobashʉba mʉbʉtsya bathɨ: «Mwakʉkolera ki? Athɨ ko athakʉtsɨbʉla amesho?»27Mwashʉbɨtsyabo athɨ: «Nyamalire ɨbabwɨrabyo hewethuwe momʉthalɨ omʉnyonvwa! Bʉshana na ki omushondya nyɨshʉbe mʉbyo? Nemwe omushondya ibya bɨga bʉwe?»28Mobamuhangya n'ɨmʉbwɨra bathɨ: «Nɨ ɨwe wo mwɨga ʉwe! Ithwe thʉlɨ bɨga ba Mʉsa.29Thwetsi ko Gongo mwasɨmola na Mʉsa. Hewethuwe omʉndʉ oyu thuthetsi eyo athoka!»30Omʉndʉ oyo mwashʉbɨtsyabo athɨ: «Ko kwenene ekɨnwa eki nɨ ky'erishwekya. Omʉnegena mʉthɨ muthetsi eyo athoka, naho nɨ ɨye yo wamanyɨtsɨbʉlako amesho!31Thwetsi ko Gongo athonvwa abakoli b'ebɨtsɨbʉ. Hewethuwe Gongo anahʉlɨkɨrɨtsya obʉlɨ mʉndʉ yo umushikitsye n'ɨkola erishondya lɨwe.32Ɨthanga kera thʉthahera thwathonvwa mʉndʉ n'omʉgʉma yo watsɨbʉlaga mesho wa mʉndʉ yo wabʉthawa ni mbumi.33Omʉndʉ oyu athangakolire kɨndʉ alɨ athathokaga ewa Gongo.»34Mobamʉshʉbɨtsya bathɨ: «Ɨwe ʉlɨ mukoli w'ebɨtsɨbʉ ɨthoka kw'ɨbʉthwa lyawe. Ushondya ɨthʉkangɨrɨtsya!» Na mobamʉgʉsha embʉga.35Yesʉ mwonvwa ko mobathɨbɨtha ko mʉndʉ yo wabyaga mbumi. Aho, mwaya mushondya n'ɨmʉbʉtsya athɨ: «Wɨkɨrɨtsye oMʉgala w'oMʉndʉ?»36Naye mwashubya athɨ: «Nyinya-kowethʉ, nyɨbwɨre nga nɨ ndɨ bʉshana nyɨmwɨkɨrɨtsye.»37Yesʉ mwamʉbwɨra athɨ: «Wamamʉshʉnga, nɨ yo ʉnegena nawe.»38Aho, omʉndʉ oyo mwanegena athɨ: «Nyinya-kowethʉ, nyɨkɨrɨtsye.» Na mwafʉkama embere sa Yesʉ mw'imuramya.39Honyuma kw'aho Yesʉ mwanegena athɨ: «Nyahikaga mo kɨhʉgo bʉshana esohi ibye. Nɨ ɨnegena mbʉ: esombumi sɨlole, na bo balola babye mbumi.»40Bafarisayo bagʉma bo babyaga hofɨ na Yesʉ mobonvwa ebɨnwa ebyo agenda anegena, mobamʉbʉtsya bathɨ: «Nɨ ɨnegena mbʉ nethwe thʉlɨ mbumi?»41Yesʉ mwashʉbɨtsyabo athɨ: «Mwangabere mbumi mʉthangabere bakoli ba bɨtsɨbʉ. Hewethuwe kʉshangwa omʉnegena mʉthɨ omʉlola, aho mʉlɨ bakoli ba bɨtsɨbʉ.»
The Seed Company