Yoani10
1Honyuma kw'aho, Yesʉ mwanegena athɨ: «Kwenene, kwenene enyɨbabwɨra omʉndʉ yo uthatsukire mo lukyo lw'olʉgʉthʉ lw'esombuli , hewethuwe nɨashamba n'ɨkɨrʉkɨra mo lʉgʉthʉ ko lʉndɨ lʉnda, oyo nɨ mwɨtsɨ na mushamuli.2Hewethuwe omʉndʉ yo wɨngɨrɨra mo lukyo nɨ omulishya w'esombuli.3Omutheya w'olʉgʉthʉ anamʉkɨngʉlɨra oluyi n'esombuli esɨnonvwa omʉlenge ʉwe. Naye anabɨrɨkɨra esombuli sɨwe obʉlɨ ngʉma mw'ɨtsɨna lyaro n'ɨthwalatho embʉga.4Anabya amamala ihulukya esombuli sɨwe, nɨashondoleratho natho nɨsamʉkwama enyuma kʉshangwa sietsi omʉlenge ʉwe.5Esombuli etho sɨthangakwama mugeni, hewethuwe nɨsamʉshaga, kʉshangwa sithetsi omʉlenge ʉwe.»6Yesʉ mwabwɨrabo omushinga ono, hewethuwe mobathamɨnya ebɨnwa anegenaga.7Aho Yesʉ mwashʉbabwɨrabo athɨ: «Enyɨbabwɨra ekwenene, ingye nyɨrɨ luyi lw'olʉgʉthʉ lw'esombuli.8Aboshi bahikaga embere kw'ingye nɨ bɨtsɨ na bashamuli, na bʉshana n'ekyo esombuli mosɨthonvwabo.9Ingye nyɨrɨ luyi lw'olʉgʉthʉ. Omʉndʉ amɨngɨra mʉlo kw'ɨnyɨtsʉkɨrako, andashabʉlwa, naye andabona kalyo .10Omwɨtsɨ ɨye anahika bʉshana n'ɨya iba, itha n'ibihya kuroshi. H'ingye nyamahika bʉshana abandʉ babone bʉyɨngo, obʉyɨngo bw'ekwenene kundu.11Ingye ngyo mulishya mʉbʉya. N'omulishya mʉbʉya anahana obʉyɨngo bʉwe bʉshana n'esombuli sɨwe.12Hewethuwe omukoli yo ʉnahembwa, ɨye athalɨ mulishya kandɨ n'esombuli sɨthalɨ sɨwe. Bʉshana n'ekyo anabya ashʉnga olʉnyambwe lwahika, anamika esombuli n'ɨshaga. Aho olʉnyambwe nɨlwatsɨmba esombuli n'ɨpanzatho.13Ndɨ ɨye athatsomene esombuli kʉshangwa akolera lʉhembo lʉsha.14Ingye nyɨrɨ mulishya mʉbʉya. Nyetsi esombuli saye n'esombuli saye natho sinyetsi,15nga ko Thatha anyetsi, nangye kuthyo ko nyimwetsi. Enyɨhana obʉyɨngo bwaye bʉshana n'esombuli saye.16Nyiwithe kʉ sɨndɨ mbuli so sɨthalɨ s'omo kihyo kɨno. Nyɨtholere kuthyo nɨnyalethatho, natho sandonvwa omʉlenge aye, n'esoshi sandabya kihyo kɨgʉma na mulishya mʉgʉma.»17Thatha anyitsiire kʉshangwa enyɨhana obʉyɨngo bwaye bʉshana honyuma kw'aho nyɨshʉbabonebo buhya-buhya.18Hathalɨ mʉndʉ yo wanganyɨshamʉla obʉyɨngo bwaye, hewethuwe enyɨhanabo kw'ɨshasha lyaye ingy'owone. Nyiwithe amaka w'erɨhana obʉyɨngo bwaye n'amaka w'erɨshʉba bonabo. Ni bathyo ko Thatha anyɨhamʉlaga.19Bʉshana n'ebɨnwa ebyo, mokwabya ɨgabana mo kathɨ k'aBayuta.20Bangɨ mo kathi kabo mobanegena bathɨ: «Alɨko mʉtsɨmʉ! Nɨ mʉsɨre! Bʉshana na ki omʉmʉhʉlɨkɨrɨtsya?»21Hewethuwe abandɨ mobanegena bathɨ: «Omʉndʉ yo ʉlɨko mɨtsɨmʉ mɨbɨ athanganegena athya. Emɨtsɨmʉ mɨbɨ yanganakotsya ilamya amesho w'esombumi?»22Ebɨro bagenda abakolamo elinye ly'erɨbʉka erɨkɨngʉlwa ly'eNyʉmba ya Gongo ɨYerʉsalemʉ mobyahika. N'ebɨro ebyo byabyaga bya mbeho nzɨbʉ.23Yesʉ agenda athimba-thimba mo Nyʉmba ya Gongo, mo mbarasa yo yagenda eyahʉlwamo «mbarasa ya Solomona.»24aBayuta mobamuthimbako n'ɨmʉbwɨra bathɨ: «Wandathulungya-lungya ihika kɨro ki? Wamabya n'ɨwe Kirisito, thʉbwɨre kʉbʉya-kʉbʉya.»25Yesʉ mwashʉbɨtsyabo athɨ: «Nyamalire ɨbabwɨrabyo, hewethuwe mʉthɨkɨrɨtsye. Ebyo enyɨkola mw'ɨtsɨna lya Thatha ebikangania kʉbʉya-kʉbʉya nga nyɨrɨ ndɨ.»26Hewethuwe mʉthɨkɨrɨtsye kʉshangwa imwe mʉthalɨ mbuli saye.27Esombuli saye esɨnonvwa omʉlenge aye. Nangye nyetsitho, natho esɨnanyɨkwama.28Ingye enyɨhatho obʉyɨngo bw'ekera n'ekera, natho sɨthɨndahere na hake, na hathalɨ mʉndʉ yo wangathokyatho mo minwe aye.29Thatha yo wanyɨhaga esombuli esi nɨ mʉkʉlʉ kʉlenga aboshi, na hathalɨ mʉndʉ yo wanganyagʉlatho mo minwe ya Thatha.30Ingye na Thatha thʉlɨ mʉndʉ mʉgʉma.31Aho kandɨ aBayuta mobathola mabwe bʉshana bagʉshangewo kʉ Yesʉ.32Aho Yesʉ mwabwɨrabo athɨ: «Nyamalire ibakangya mɨkolano mɨngɨ mɨbʉya ko maka wa Thatha. Ewono, nɨ mʉkolano ohɨ mo kathi k'eyoshi ow'aleka nimwashondya ɨnyɨgʉshangako mabwe?»33aBayuta mobamʉshʉbɨtsya bathɨ: «Thʉthalɨ othushondya ikwitha mu mabwe bʉshana na mʉkolano mʉbʉya wakolaga, hewethuwe nɨ bʉshana n'erɨhatsya kʉ Gongo. Ɨwe ʉlɨ mʉndʉ mʉsha, hewethuwe oʉyɨyɨramo Gongo.»34Yesʉ mwashʉbɨtsyabo athɨ: «Ndɨ bishakirwe mo mʉgomba enyu ko Gongo mwanegena athɨ: “Monyɨnegena, mʉlɨ bo gongo!” 35Gongo mwahʉla abandʉ bo bangɨrɨraga eKɨnwa kɨwe mo bo gongo. Na thwetsi ko Amashako Abuyirire athangathokibwako.36Thatha mwanyɨshombola na mwanyɨthʉma mo kɨhʉgo. Ewono, mʉthɨ ko mwanganegena mʉthɨ enyɨhatsya kʉ Gongo kʉshangwa monyɨnegena nyɨthɨ nyɨrɨ Mʉgala wa Gongo?37Nyamabya nɨnyɨthalɨ enyɨkola emɨkolano ya Thatha, mʉthanyɨkɨrɨtsaya.38Hewethuwe nyamabya nɨenyɨkolabyo, na momʉthananyɨkɨtsye, ewo mwɨkɨrɨtsye emɨkolano aye, bʉshana mʉmɨnye ko kwenene ko Thatha alɨ mw'ingye, nangye, nyɨrɨ mw'ɨye.»39Aho mobashondya ɨmʉtsɨmba kandɨ, hewethuwe mwaromboka kʉbo.40Aho Yesʉ mwashʉbaya ko ʉndɨ mʉnda w'eYorotani, aho Yoani agenda abatisirya abandʉ kera, na mwabya eyo.41Bandʉ bangɨ mobamuhikira n'ɨnegena bathɨ: «Yoani mwathakola kɨmɨnyɨkalo n'ekɨgʉma, hewethuwe ebɨnwa byoshi anegenaga ko mʉndʉ oyu byabyaga bya kwenene.»42N'eyo bandʉ bangɨ mobɨkɨrɨtsya Yesʉ.
The Seed Company