মথি28
1সানুকো দিনকো নোইতা আইতাবারে হাপকুং হোহোইনুওয়া মরিয়োম মগ্দলিনি আসা দোসরা মরিয়োমহা ইশুহিং এওয়া তাম্যই কাংকো ওয়াংয়ে।2আত্রংহা টেবো নিংঙা হ্যায়ে, হাংপাতানাহা সেংজাকো ইচো পোইং লোডিংবাসো লিতা উইয়ে, আসা লেমসা লুংটুই ওয়েংপামসা আকু লুংটুইকো তোইতা গায়ে।3আকো য়ুওয়াইহা তাত্রাইওয়া ত্যাবাপা আসা আংদুংহা কাওয়া ত্যাবাপা হাংপাপা নিমি।4আকোসো চুসুংপুমসা আকু তোম্যই খুইওয়া দিংঙাবিহা ফিপুয়ে, আসা সিপুমবেপা জিংপুয়ে।5আদো লোডিংবাকো পোইংহা আকু মেমেবিহিংয়া জাংয়ে, “নাবিহা মাচ্ছুংগে, হাংপাতানাহা কাহা গেমি নিও, নাবিহা ক্রুসতা থ্যইমসা স্যাপুওয়া ইশুহিং মোদিংয়ো।6আকুহা ইতা মোতো, হাংপাতানাহা আকো জাংওয়া সেই আকুহা ঙারোনতেমি নিও। লেই, আকুহিং এওয়া জায়গা কাং।7আসা সেন্নেপা হোমসা আকো য়োংতোংবিহিং, ‘প্রভুহা সিপুওয়াসো ঙারোনতেমি নিও। আকুহা নাবিরোমা নাগাই গালীলতা হোদাংয়ে, আউতাহা নাবিহা আকুহিংয়া তিংরোওয়া’ তামসা দেরেং জাংপি! নেহা হোতু, কাহা নাবিহিংয়া জাংপুনতেমি নিও।”8আত্রংহা আবিহা চুসুংকোরে চুসুংপুয়ে আসা সিওপারাং গাগ্রুপুমসা সেন্নেপা তোম্যইসো নোপুমসা য়োংতোংবিহিং ই দেরেং হিংপাকো ঠুইপুয়ে।9ইশুহা আবিহিংপা একবিরি দোসুমসা জাংয়ে, “নাবিহিং তিমেপা জিংকো!” আত্রংহা আবিহা চুনুইসুমসা আকো কোকোইত্তা চুংসুমসা নোংসুয়ে।10আত্রংহা ইশুহা আবিহিং জাংয়ে, “মাচ্ছুংগে, কুং এবিহিং হোমসা গালীলতা হোকো জাংয়াপি, আসা আউতাহা আবিহা কাহিং তিংরোওয়া।”11হাত্রং আকু মেমেবি ন্যাতাতা নিমে, আত্রংহা লেরা তোম্যই খুইমবিহা শহরতা হোমসা মাটা পাউবিহিং আউতা হাই জিংপু আকু দেরেংবি হিংপায়ে।12আত্রংহা মাটা পাউবি, আসা দোসরা য়হুদি মাটা ওয়ারাংপাবিহা চাংসুমসা “নেহা য়াংবিহা হাং জোকোগা?” তামসা আবিহা হুইসুয়ে আসা আবিহা সিপাইবিহিং সিওপা ন্যাস্যা পিচামসা13“নাবিহা ‘লিসুং কাবি জিংজুনুকো নোইতা ইশুকো য়োংতোংবি ওয়াংমসা আকো সিপুওয়া জুপা কুচপুমসা পুচায়ে’ তামসা জাংকো তামসা জাংয়ে।14রোমি টেবো কাইজিমি ই নুওয়াং হিংনাহা কাবি আকুহিংপা য়্যইসুমসা নাবিহিংয়া বাচাইপিরোওয়া।”15আকু তোম্যই খুইমবিহা ন্যাস্যা য়ুচামসা মাটা পাউবিকো ঝিপামবেপা জাংসুয়ে। ই নুওয়াংহা নেচোইপা য়হুদিবিকো প্যাকোতাহা বেইদিংমি নিও।16এগারচো য়োংতোংবিহা ইশুকো জাংতেওয়া গালীল জায়গাকো য়্যাগ্যইতা হোসুয়ে।17ইশুহিং তিংতানি আবিহা আকো নাগাই চুনুইসুহে। আদো লেরা য়োংতোংবিহিংয়া ইশুরাং কোমমে-মোকোমমে তাওয়া সন্দেহ জিংপুয়ে।18আত্রংহা ইশু আবিকো আবেইতা লেমসা জাংয়ে, “লোডিংবাসো বাসিমতিকো তাংসা অধিকার কাহিং পিচামি নিও।19নেহা নাবিহা হোমসা তাংসা জ্যাকো দিংঙাবিহিং কুং য়োংতোং বানাই। আবিহিং আপা, চেংওয়া আসা পবিত্র লাংবেকো মিংতা বাপ্তিস্মা পিচা।20কুং নাবিহিং আজ্ঞা জোওয়া তাংসা হিংমসা পালন জোকো আবিহিং ঝিপাতু। কাং, কা হাত্রংদো বাসিমতিকো নোইস্যাকো দিন চোইপা নাবিহিংপারাং নিরোওয়া।”
The Seed Company