মথি2
1ইশু য়হুদিয়াকো বেথলেহেম তাওয়া লোইতা কেমি নিমি। আত্রংকো সময়তাহা হেরোদহা আকু য়হুদিয়া জায়গাকো জাইপু নিমি। ইশু কেনতেনুকো নোইতা জ্যােতিষিবিহা নুসো আকুহিং মোপামসা য়রুশালেমতা ওয়াংয়ে।2আবিহা দিংঙাবিহিং উইয়ে, “আম্যই নাগাই কেওয়া য়হুদিবিকো জাইপুহা হাংতা নিংগা? আকো কেওয়া নুওয়াং প্যারাতাংপাওয়া পুইমাহিং কাবিহা নুসো ত্যইওয়া তিংয়ো আসা আকুহিং দোসপামসা চুনুইমসা নোংকো তামসা ওয়াংমি।”3ই নুওয়াং হিংমসা হেরোদ জাইপুহা তুংসিং চিচপুয়ে, আসা য়রুশালেমকো দিংঙাবিরে হাং জোকোমে মোজোকোমে মাইপা জিংপুয়ে।4আসা হেরোদ জাইপুহা আউতা মাটা পাউবিহিং আসা তাংজিকো উটকেওয়াবিহিং মোউমসা “মুক্তি পিচাওয়া জাইপু খ্রীষ্টহা হাংতা কেকোমে?” তামসা উইয়ে।5আবিহা জাংয়ে, “য়হুদিয়াকো বেথলেহেম লোইতা কেনেরোওয়া, হাংপাতানাহা তাংজিকো হিগাতা অগমবক্তাহা ইকো তোইতা এপা লাতেমি নিও,6‘ও য়হুদিয়াকো বেথলেহেম,নাতিহা য়হুদিয়া শহরকো প্যাকোতাহা হাই জোমসারে আত্যইচিংপা মাতো।হাংপাতানাহা নাকোসো ইচো টাবো জাইপু নোমসা লেরোওয়া,আসা আকুরাং গোইত্র ত্যাবাপা কুং দিংঙা ইস্রাইলিবিহিং ল্যাচোইরোওয়া’।”7ই হিংমসা হেরোদহা আকু নুসো ওয়াংওয়া জ্যোতিষিবিহিং ইদ্যাতা পুরামসা উইয়ে, আসা পুইমা হাত্রং তিংমমে, আকুহা আবিকোসো সিদা চ্যইয়ে।8আকো নোইতাহা আকুহা আবিহিং বেথলেহেমতা নিংপুমসা জাংয়ে, “নাবিহা হোমসা চেংকো তোইতা তাংসা নুওয়াং সেন্নেপা সিদা চ্যইপামসা কাহিং দেরেং হিংপারে, আসা কারে আকুহিং চুনুইমসা নোংকো হোরোওয়া।”9হেরোদ জাইপুকো জাংওয়া হিংমসা আকু জ্যোতিষিবিহা বেথলেহেমতা হোয়ে। ন্যাতাসো হোনুওয়া আবিহা নুসো তিংওয়া পুইমাহা ন্যাসারাং তিংয়ে। আকু পুইমাহা আবিকো নাগাই নাগাই হোয়ে আসা আকু চেং নিওয়া সাকো তোইতা জাকায়ে।10হাত্রং আবি ই পুইমাহিং তিং, আত্রংহা আবিহা সিওপারাং য়াংতাসুয়ে।11আকু সাতা দেকানতেনুওয়া আবিহা নাপোতা হোয়ে আসা চেংহিংয়া আয়ু মরিয়োমকো নুইতা তিংয়ে। আসা আবিহা আকো কোকোইতা চুইনুইসুমসা নোংসুয়ে, আসা আপনি আপনিকো চোংবেসো সুন, ওহও্যহপা মেনাংওয়া সাং আসা উইসে এনতাপা মেনাংওয়া চুইতি নোপামসা পিচায়ে।12আকো নোইতাহা আবিহা মাংবুইওয়াতা “হেরোদ জাইপুকোতা মাল্যাকাগ্যই” তাওয়া লোডিংবাকো প্যইংকোসো জাংওয়া হিংয়ে, আসা আবিহা দোসরা ন্যাতা জিংমসা আপনিকো লোইতা লাকাপুয়ে।13আকু জ্যোতিষিবি হোপুনতেনুকো নোইতাহা য়োসেফহা মাংবুইওয়াতাহা প্রভুসেংজাকো পোইংহিং তিংয়ে আসা পোইংহা আকুহিংয়া জাংয়ে, “সেন্নেপা আয়ুসো চেংওয়াহিং পুরামসা মিশ্র লোইতা ক্যাপু, আসা কা মাজাংনু চোইপা নাবিহা আউতারাং য়ুং, হাংপাতানাহা হেরোদহা চেংওয়াহিং স্যাকো মোদিংয়ো।”14এপা মাংবুইওয়াতা তিংনুওয়া য়োসেফহা আয়ুসো চেংওয়াহিং পুরামসা লিসুংতারাং মিশ্র লোইতা ক্যারাপুয়ে,15আসা হেরোদ মাসিনু চোইপা আবিহা আউতারাং য়ুংয়ে। এপারাং প্রভুসেংজাহা অগমবক্তাহিং নাগাইসো জাংপাওয়া ই নুওয়াং পুরা জিংরেমগা, “কাহা মিশ্র লোইসো আপনিকো চেংওয়াহিং মোউয়ে।”16জ্যোতিষিবিহা আপনিহিং ল্যহপাপুয়ে তাওয়া নুওয়াং সিদা চ্যইমসা হেরোদ জাইপুহা সেদ্রাংপুয়ে। আসা জ্যোতিষিবিকোসো সিদা চ্যইওয়া সময় অনুসার হেরোদহা বেথলেহেম লোইকো আসা আউতা হুরাপা নিওয়া জায়গাকো লো নিহনিংকো লিকো তাংসা চেংবিহিংয়া স্যাপাপুয়ে।17আত্রংহা য়র্মিয়া অগমবক্তাকো নাগাইসো জাংওয়া নুওয়াং তাংসা পুরা জিংয়ো,18“রামা শহরতা ইচো ক্যা হিংয়ে,কাইসুওয়া, আসা পিংচ্যাসুওয়া।রায়েলহা আপনিকো চেংওয়াবিকো সোতা কাইদিংয়ো।আকুহা সিওপা কাইমসা দোসরা নোইপাদো ঙাকোরাং মেকেংতো,হাংপাতানাহা তাংসা চেংবিহা সিপুমি নিও।”19হেরোদ সিপুনতেনুওয়া প্রভুসেংজাকো লোডিংবাকো পোইংহা মিশ্র লোইতা য়োসেফহিং মাংবুইওয়াতা তিংরেমসা জাংয়ে,20“লো, নেহা আয়ুসো চেংওয়াহিং পুরামসা ইস্রাইল লোইতা লাকাতু, হাংপাতানাহা চেংওয়াহিং স্যাকো কেংওয়া দিংঙাহা সিপুনতেয়ো।”21আকো নোইতাহা য়োসেফহা আয়ুসো চেংওয়াহিং পুরামসা ইস্রাইল লোইতা লাকাপুয়ে।22আদো হেরোদ জাইপু সিপুনতেনুকো নোইতাহা আকো চেংওয়া অর্কিলাউস তাওয়া আকু জায়গাতা য়হুদিয়াকো জাইপু জিংমি নিও তাওয়া হিংমসা য়োসেফহা আউতা হোকো চুসুংপুয়ে। আসা ন্যাসারাং লোডিংবাকো পোইংকো মাংবুইওয়াতা জাংওয়া হিংমসা আবিহা গালীলতা হোয়ে,23আসা আকুহা নাসরত তাওয়া শহরতা হোমসা য়ুংপুয়ে। এপা জোমসারাং অগমবক্তাকো জাংওয়া নুওয়াংহা তাংসা জিংয়ো “আকুহিংয়া নাসরি তানেরোওয়া।”
The Seed Company