মথি18
1আত্রংকো সময়হা য়োংতোংবিহা ইশুকোতা ওয়াংমসা উইয়ে, “সেংজাকো রাজ্যতাহা হাংসুরোমা টেবোহা হাংসুগা?”2আকুহা ইচো আপেচাওয়া চেংহিং মোউমসা আবিকো প্যাকোতা জাপায়ে,3আসা জাংয়ে, “আজিপ্পারাং কা নাবিহিং জাংরোওয়া, আপনিকো তুংসিংসো মেংতাপা নোওয়া ল্যামসা আপেচাওয়া চেং ত্যাবাপা জিংমক্যইনাহা হাত্রংরে সেংজাকো রাজ্যতা হোমক্যইরোওয়া।4হাংসু ই আপেচাওয়া চেং ত্যাবাপা আপনিহিং আপেচপা নো, আকুরাং সেংজাকো রাজ্যতা টেবো জিংরোওয়া।5হাংসু কুং মিংতা এপা জিংওয়া আপেহিং গ্রহন জো, আকুহা কাহিং গ্রহন জোওয়াগা।6“আদো হাংসু কুং তোইতা দেংওয়া ই আপেবিতাহা ইচোহিং পাপ জোপানাহা, আকুরোমাহা আকো নেটোংতা ওয়াংটাকো লুংটুই জিংমসা আকুহিংয়া ঝাহাদিকো চমেংতা বাডোই পুওয়ারাং এনতারোওয়া।7“টেবো পাপ ওয়াংকো ই বাসিমতিতা! হাংপাতানাহা ই বাসিমতিতাহা দিংঙাবিহিংয়া পাপতা পুরাওয়া নুওয়াংবি নিও, এপা জিংওয়া নুওয়াংবিহা ওয়াংকোহা ওয়াংমগা, আদো টেবো দুঃখ ওয়াংকো আকু দিংঙাকোতাহা, হাংসু দোসরাহিং পাপতা পুরামমে!8নাকো খুই আসা কোকোইমি নাতিহিং পাপ জোপানাহা আকুহিংয়া ঠেমসা বাদোইপুই। কোকোই আসা খুই নিপা নরককো মেহতা বাডোইচাপুমরোমাহা, খুই কোকোই মাতাপা হাত্রংরে মিসিওয়া সাদিতা হোকো নাকো সোতাহা এনতারোওয়া।9নাকো মিচোমি নাতিহিং পাপতা পুরানাহা আকুহিংয়া নোপামসা বাডোইপুই। নিহসো মিচো নিপা নরককো মেহতা বাডোইচাপুমরোমাহা মিচো মিতিংওয়া জিংমসারাং সাদি নিওয়াতা হোকো নাকো সোতাহা এনতারোওয়া।”10“হোশিয়ার য়ুং, নাবিহা ই আপেবিহিংয়া ইচোহিংনে মিছিমেপা মোজো, হাংপাতানাহা কা নাবিহিংয়া জাংরোওয়া, ইবিহিংয়া য়ারাপাওয়া পোইংবিহা লোডিংবাতা কুং আপাকো নাগাইতা নিও।11[হাংপাতানাহা কা দিংঙাকো চেংওয়াহা য়াংপুমবিহিংনাং বাচাইকো লেমগা।]12“নাবিহা হাং নোংগা? নাকাইপু লুকাবি নিওয়া দিংঙাকো ইপু লুকামি য়াংপুনাহা আকু দিংঙাহা হাং জোকোগা? আকুহা লেরা নিরানব্বই লুকাবিহিংয়া ল্যাচোইওয়াতারাং হুইতেমসা আকু য়াংপুওয়া ইপু লুকাহিং মোমোকাকোগা?13আকুমি য়াংপুওয়া লুকাহিং দোচানাহা, আজিপ্পারাং কা নাবিহিং জাংরোওয়া, আকু মায়াংয়াংওয়া নিরানব্বই লুকাবিরোমাহা আকু ইপু লুকাকো সোতা আকুহা সিওপারাং য়াংতারোওয়া।14এপারাং লোডিংবাতা নিওয়া নাবিকো আপাকোহা ই ইচ্ছা নিও, ই আপেবিতাহা হাংসুরে মাদাংকো।15“নাকো ইচো দেংওয়া এমি নাকো তোইতা মেংতাপা কাম জোনাহা, নাতি ইচোদাং হোমসা আকো দোষ তিংপাপি। আকুমি নাকো নুওয়াং হিংনাহা, নাতিহা আকুহিংয়া আপনিকো কাটুতা লাপোংমসা পারা।16আদো আকুমি মাহিংনাহা, তাংজিকো হিগাতা জাংমি ত্যাবাপা নাতিহিংপা ইচো নিহসো দিংঙাবি পুরাতু আসা নিহসো সুংচোকো প্রমানতা তাংসা নুওয়াং সল্লাতা জিংকো।17ন্যাসারাং আকুহা নাবিকো নুওয়াংরে হিংকো ইন্কার জোনাহা, মন্ডলিহিং জাং। আকুহা মন্ডলিকো নুওয়াংরে হিংকো মেকেংনাহা, আকুহা নাকো সোতাহা তাংজি মাতাওয়া আসা তোংক্যা জুমবি ত্যাবাপা জিংপুকো।18“আজিপ্পারাং, কা নাবিহিংয়া জাংরোওয়া, নাবি বাসিমতিতা হাই মেই, আকুহা লোডিংবাতা মেইচাপুরোওয়া। আসা নাবি বাসিমতিতা হাই ওয়ে, আকুহা লোডিংবাতা ওয়েচপুরোওয়া।19“ন্যাসারাং কা নাবিহিংয়া জাংরোওয়া, বাসিমতিতা নাবিহা নিহসো চিত্তা গাসুমসা ইচো তুংসিং জিংমসা হাইক্রি য়ানাহা, নাবিকো লোডিংবাতা নিওয়া আপাহা নাবিহিংয়া পিচারোওয়া,20হাংপাতানাহা হাংতা নিহসো মোকোনাহা সুংচো কুং মিংতা চিত্তা য়ুংসু, আউতাহা কা নাবিহিংপা নিরোওয়া।”21পত্রসহা ওয়াংমসা ইশুহিংয়া উইয়ে, “প্রভু, কুং ইচো দেংওয়া এমি কুং তোইতা পাপ জোদিংনাহা কাহা আকুহিংয়া হাসে ইকোই চোইপা মাপ পিচানেকোগা? নীকোই চোইপাগা?”22ইশুহা আকুহিংয়া জাংয়ে, “কা নাতিহিংয়া জাংরোওয়া, নীকোই মোকোমি, সত্তরি গুনা নীকোই চোইপা।23“আকো সোতা সেংজাকো রাজ্যহা ইচো জাইপুহা আপনিকো ডেইয়াবিকোতা হিসাব লাংওয়া ত্যাবাপাগা।24হাত্রং আকু হিসাব লাংকো কেং, আত্রংহা দশ হাজার সুনকো টাংকা ঋণ য়ুওয়া দিংঙাহা আকোতা সারেয়ে।25আদো আকু দিংঙা তাকো মাচুনুওয়া আকো জাইপুহা আকুহিং আসা আকো মে, আকো চেংচুংবি, আসা আকোতা নিওয়া তাংসা পিচামসা ঋণ তাকো তামসা আজ্ঞা জোয়ে।26“আত্রংহা আকু ডেইয়াহা আকো কোকোইকো নাগাই কাটুসো তুরুই চুনুইমসা জাংয়ে, ‘উটকেওয়া, সাইয়ু নিহয়ু খুইপি, কা নাকো তাংসা ঋণ তাপিরোওয়া।’27আত্রংহা আকু ডেইয়াকো জাইপুহা লামতুপুমসা আকুহিংয়া ল্যাপিয়ে, আসা আকো তাংসা ঋণ মাপ জোপিয়ে।28“আদো আকু ডেইয়াহা নোপুমসা হ্যাদাংনুওয়া আপনিকো ব্যারো ডেইয়াবিতাহা ইচোহিং দোসুয়ে। আকু ব্যারোহা আকোসো একশো জাতাংকো টাংকা য়ুওয়া নিমি। আকুহা আকুহিংয়া গোংটোতা প্যইমসা জাংয়ে, ‘নাকো ঋণ তাকো জো।’29“আদো আকো ব্যারোহা চুনুইমসা আকুহিংয়া জাংচায়ে, ‘সাইয়ু-নিহয়ু খুইপি, কা নাতিহিংয়া তাংসা ঋণ তাপিরোওয়া।’30আদো আকুহা মামানেতো, আসা হোমসা ঋণ মাতানু চোইপা আকুহিংয়া জেলতা সুংপুইয়ে।31হাত্রং আকো ডেইয়া ব্যারোবি ই তাংসা তিং, আত্রংহা আবিহা সিওপারাং তুংসিং চিচাপুয়ে। আবিহা হোমসা ই তাংসা নুওয়াংবিহা আপনিকো জাইপুকোতা জাংয়াপুয়ে।32আত্রংহা আকু জাইপুহা আকু ডেইয়াহিংয়া আপনিকোতা মোউমসা জাংয়ে, ‘ও মেংতাওয়া ডেইয়া, নাতিহা কাহিং জাংচায়ে, আসা কাহা নাকো তাংসা ঋণ মাপ জোপিয়ে।33কাহা নাকো তোইতা লামতুপা জোমি ত্যাবাপা নাতিরে নাকো ব্যারো ডেইয়াবিকো তোইতা লামতুপা জোনেকো মোকোতা?’34আসা আকু জাইপুহা সেদ্রাংপুমসা আকুহিংয়া তাংসা ঋণ মাতানু চোইপা জেলতা সুংকো তামসা আজ্ঞা জোয়ে।”35ইশুহা আকো য়োংতোংবিহিংয়া জাংয়ে, “নাবিহা আপনিকো ইচো দেংওয়া এহিংয়া আপনিকো তুংসিং নাপোসোরাং মাপ মিচানাহা, লোডিংবাতা নিওয়া কুং আপারে নাবিহিংয়া এপারাং জোরোওয়া।”
The Seed Company