মর্কুস7
1সাইয়ু য়রুশালেমসো লেওয়া ফরিসিবি আসা লেরা তাংজিকো উটকেওয়াবিহা ইশুকোতা লেহে।2আবিহা ইশুকো লেরা য়োংতোংবিহিংয়া য়হুদিবিকো লিংপাংতা নিওয়া সেই খুই মাদুপা আমা চাকো গাওয়া তিংয়ে।3[ফরিসি আসা য়হুদিবিহা তাইবিকো আটা আজাবিকো লিংপাংসো ওয়াংওয়াহিং নোমসা আপনিহিং সাং মাতাংপা হাইরে মাচামি।4আবিহা হাতিসো ওয়াংমসা আপনিহিং সাং মাতাংপা হাইরে মাচামি। ই ল্যামসারে আবিহা উইসে লিংপাংবিহিংনে মানেমি। এপারাং বারাং, চোপোই, আসা য়োতি-কোওয়াইবিরে সাং মাতাংপা মাচালাইমি।]5আকো সোতা ফরিসি আসা তাংজিকো উটকেওয়াবিহা ইশুহিং উইয়ে, “নাকো য়োংতোংবিহা আজা-আটাকো লিংপাংতা নিমবেপা আপনিকো খুইহিং সাং মাতাংপা হাংপা চামগা?”6ইশুহা আবিহিংয়া জাংয়ে, “অগমবক্তা এশাইয়াকো হিগাতা লাওয়াহা নাবি তেপিবিহিংয়া তিতিইয়ে, আকো হিগাতা এপা লাওয়া নিও:‘ই দিংঙাবিহা নুওয়াংসো মেংচে কাহিং তাচামগা,আদো আবিকো তুংসিংহা কুংসো তানাং নিও।7আবিহা অ্যাজ্যাপাকো সোতা মেংচে লে-য়াংমগাআসা দিংঙাবিকোসো নোপাওয়া লিংপাংবি মেংচে ঝিপামগা।’8নাবিহা সেংজাকো আজ্ঞাহিং ল্যামসা দিংঙাবিকো নোপাওয়া লিংপাংহিং মেংচে ঝিইমগা।”9ইশুহা ন্যাসারাং আবিহিং জাংয়ে, “নাবিহা গেমসুং জোমসা আপনিবিকো লিংপাংহিং নাগাই গ্যইপাকো সেংজাকো লিংপাংহিংয়া ওয়েংপামগা।10হাংপাতানাহা মোসাহা জাংতেমি নিও, ‘আপনিকো আয়ু আপাহিং আদর জো। আসা হাংসু আপনিকো আয়ু আপাহিং সিপুকো উদ্যাই, আবিহিংয়া স্যানেরোওয়া’11আদো হাংসু লেরা দিংঙাবি আপনিকো আয়ু আপাহিং কুংসো হাই হাসে মাদাদ নাবিহিং মুংচানেকোমে ‘আকু নুওয়াংহা কাহা সেংজাহিংনাং পিচাপুনতেও’ তানাহা।12এপারাং নাবিহা দিংঙাবিকো আয়ু আপাহিং য়ুজ্রুওয়া কামহিং য়োইমগা।13এপা জোমসারাং নাবিহা আপনিকো লোচ্যই-পোচ্যইকো নুনুই হুইমসা সেংজাকো লিংপাংতা জাংওয়াহিং ল্যাপুমগা। আসা নাবিহা এপা জিংওয়া নুওয়াংবিহা উইসে জোমি নিও।”14আকো নোইতা ইশুহা ন্যাসারাং দিংঙাবিহিং আপনিকোতা মোউমসা জাংয়ে, “নাবিহা তাংসা কুং নুওয়াং হিং, আসা কোই।15নামুসো চাওয়াহা নাপোতা হোমসা দিংঙাবিহিংয়া পাপ মোজোপামগা। আদো তুংসিকো নাপোসো বাইরেতা নোওয়া নুওয়াংবি মেংচে দিংঙাবিহিংয়া পাপ জোপামগা।16[হাংসুকো নানুং নি, আকুহা হিংকো!”]17আকো নোইতা ইশুহা দিংঙাবিহিং হুইতেমসা হাত্রং সাকো নাপোতা হো, আত্রংহা য়োংতোংবিহা ই মিংচিতা জাংওয়াহা হাংমমে তামসা ইশুহিং উইয়ে।18ইশুহা আবিহিং জাংয়ে, “নাবিহা মোকোইমগা? নামুসো চাওয়াবিহা দিংঙাবিহিং পাপ মোজোপামগা, হাংপতানাহা চাওয়া-আংওয়াবিহা দিংঙাকো নামুসো হোমসা জুপাসো নোপুমগা।19ই চাওয়াহা তুংসিং নাপোতা মোহোমগা। আদো ফেমাতা হোমসা নোইতাহা জুপাসো নোপুমগা।” ই নুওয়াংসোরাং তাংসা চাওয়াবিহা এনতামুং তামসা ইশুহা কোইপায়ে।20ইশুহা ন্যাসারাং জাংয়ে, “দিংঙাকো নাপোসো হাই নুওয়াং বাইরে নো, আকুরাং দিংঙাহিং পাপ জোপামগা।21হাংপাতানাহা দিংঙাকো তুংসিংকো নাংপোসোরাং তাংসা এপা জিংওয়া মেংতাওয়াবি নোমগা: মেংতাপা নোওয়া, নুংনাংসুওয়া, কুইওয়া, দিংঙাহিং স্যাওয়া, হাংসুহিংপা জিংদো নুংনাংসুওয়া,22বাংওয়া, মেংতাওয়া কাম জোওয়া, ল্যহপাওয়া, লাংচ্যা জোওয়া, মিচাওয়া, লামুইওয়া, পুংটা আসা তোউজি জোওয়া নোমগা।23ই তাংসা মেংতাওয়াবিহা দিংঙাকো তুংসিং নাপোসো নোমগা আসা দিংঙাহিং পাপ জোপামগা।”24আকো নোইতা ইশুহা আকু জায়গা হুইতেমসা তুরোসসো সিদোন শহরকো আবেইতা হোয়ে। আকুহা ইচো সাতা হোয়ে আসা হাংসুরে সিদা মোচ্যইকো তামসা নোয়ে, আদো আকুহা গুংমসা য়ুংমক্যইতো।25আউতাহা ইচো মেমে নিমি আসা আকো চেমেহিং জেসাং দ্যইংচপুওয়া নিমি। আকু মেমেহা ইশু লেনা তাওয়া হিংতানি লেমসা ইশুকো কোকোইতা নোংরেহে।26আকু মেমেহা য়হুদি মোকোমি, আকুহা সিরিয়া লোইকো ফৌনিকিত তাওয়া লোইকো গ্রিক মেমে নিমি। আকুহা ইশুহিং জাংচায়ে, “কুং চেংকো জুপাসো আকু জেসাংহিং নোপাপিকো তামসা।”27ইশুহা আকুহিংয়া জাংয়ে, “নাগাইহা য়হুদিবিকো চেংবিহিং গাইপা চাকো পিচা, হাংপাতানাহা চেংবিকো চাওয়া কোব্রেং গিংমসা কিয়াবিহিং পিচাওয়ারে এনতাওয়া মোকো।”28আসা আকু মেমেহা জাংয়ে, “প্রভু, নাতিহা আজিপ্পারাং জাংমগা। আদো কিয়াবিরে চেংবিকো চাওয়া চোংব্রাবি কেংপ্রাকো লিতা হুইওয়াবি য়োমসা চামগা।”29ইশুহা আকু মেমেহিংয়া জাংয়ে, “নাকো ই নুওয়াং জাংওয়াসোরাং নাকো চেমেকোসো জেসাংহা নোপুনতেহে নেহা সাতা হোতু, আসা কাং,30আকু মেমেহা সাতা চোইয়ানুওয়া চেংহিং খাটতা জিংদিংওয়া তিংয়ে, আসা আকো জুপাসো জেসাংহা নোপুনতেওয়া তিংয়ে।”31আকো নোইতা ইশুহা তুরোসসো তেইপামসা সিদোন শহর জিংমসা ত্যাচো শহরকো প্যাকোসো গালীল দাব্রিতা লেহে।32আউতা দিংঙাবিহা নানুং মিহিংওয়া আসা য়্যইকো মাচুওয়া ইচো দিংঙাহিং ইশুকোতা পারায়ে, আসা আবিহা ইশুহিং ইকো তোইতা খুই ওইপি তামসা জাংচায়ে।33ইশুহা আকু দিংঙাহিংয়া উইসে দিংঙাসো আসোই তানাং পুরায়ে। আসা আকো নানুংতা ক্ররই ওয়্যায়ে আসা তোতি তোতোমসা আকো লেবেতা সুয়ে।34আসা ইশুহা ডিংবাতা তিয়ে, আসা সাসিমসা জাংয়ে, “এফফাতা” ই জাংওয়াহা “ওয়েচপু।”35আত্রংতা আকু দিংঙাকো নানুংরে হিংয়ে, আসা য়্যইকোরে চুওয়া জিংমসা চোসোপা য়্যইয়ে।36ইশুহা “ই নুওয়াং হাংসুহিংনে মাজাংকো” তামসা আবিহিং জাংয়ে। আদো আকুহা হাসে মাজাংকো জাং, আওসেরাং আকুহা দিংঙাবিকোতা হিংপায়ে।37ই কাম তিংওয়া দিংঙাবিহা আআংপেপেচপুমসা জাংয়ে, “ইহা এসেপাকো এনতাওয়া কাম জোতা? ইহা নানুং মাহিংবিহিংনে হিংপাকো চুমগুং আসা য়্যইকো মাচুমবিহিংনে য়্যইপাকো চুমগুং।”
The Seed Company