মর্কুস4
1ইশুহা ন্যাসারাং গালীল দাব্রিকো আরিতা হোমসা দিংঙাবিহিং ঝিপায়ে। আকো হুরাপা দিংঙাবিহা উইসে জাসুদিংওয়া নিমি, আকো সোতা ইশুহা ইচো নোওয়াইতা ল্যইমসা গায়ে, আসা দিংঙাবিহা ঝাহাদিকো আরিতা গাসুয়ে।2আকুহা দিংঙাবিহিংয়া উইসে মিংচি ল্যামসা ঝিপায়ে। আসা আকুহা এপা জাংয়ে,3“হিং, ইচো দিংঙাহা অংটি মিকো নোয়ে।4অংটি মিদিংনুওয়া লেরা অংটিহা ন্যাতাতা হুইয়ে। আসা জিয়া-জিপেইবি লেমসা য়োমসা চাপুয়ে।5লেরা অংটিবিহা লুংটুইবিরিতা হুইয়ে, আউতাহা মোংটো আসোইমি মোতোমকো সোতা অংটিহা সেন্নেপা নিংয়ে।6আদো সিওপা সানি বোনুওয়া আকু কুটিবিহা দেবে নাপোতা জুইমক্যইওয়াকো সোতা য়োংপুমসা সেংপুয়ে।7লেরা অংটিবিহা সোসাবিরিতা হুইয়ে, সোসাবি দেপুনুহা আকু সোসাসো দাচাপুমসা কুটিহা দেমক্যইতো। আসা আকু কুটিতাহা অংসে সেমক্যইতো।8আদো লেরা অংটিবিহা এনতাওয়া মোংটোতা হুইয়ে, আসা সিংতেং লোমসা টেবো জিংপুয়ে, সিংতেংতা অংসে সেহে, লেরাতাহা তিশ গুনা, লেরাতাহা সাঠি গুনা, লেরাতাহা একশো গুনারোমা সিওপা সেহে।”9আকো নোইতা ইশুহা জাংয়ে, “হাংসুকো নানুং নি, আকুহা হিংমসা কোইকো।”10উইসে দিংঙাবি হ্যাপুনতেনুওয়া ইশুকো বার্চো য়োংতোংবিহা ইশুকো ল্যাওয়া মিংচিহা হাংমমে তামসা আকুহিং উইয়ে,11ইশুহা আবিহিংয়া জাংয়ে, “নাবিহিংয়া সেংজাকো রাজ্যকো নাপোকো নুওয়াং কোইকো পিচামি নিও, আদো বাইরেকো দিংঙাবিহিংয়া মিংচি ল্যামসারাং কোইপানেমগা।12পবিত্র তাংজিকো হিগাতা লাওয়া নিওয়াবেপা আবিহা ন্যইকোহা ন্যইমগা, আদো মাতিংমগা, হিংকোহা হিংমগা, আদো মোকোইমগা। মোকোনাহা আবিহা সেংজাকোতা ওয়াংকোগা আসা আকুহা আবিহিংয়া ছমা পিচাকোগা।”13ইশুহা আবিহিংয়া জাংয়ে, “নাবিহা ই থ্যাহপামসা জাংওয়া মোকোইনাহা, দোসরা নুওয়াংবিহা হেপা কোইকোগা?14অংটি মিওয়া দিংঙাহা সেংজাকো য়্যইদিহিং হিংপাওয়াগা।15লেরা দিংঙাকো তুংসিংহা ন্যাতাতা হুইওয়া অংটি বেপারাংগা। জিয়া-জিপেইবি য়োচাপুমবেপা, শয়তানহা তাত্রিংপা লেমসা সেংজাকো য়্যইদিরে য়োচপুমগা।16লেরা দিংঙাকো তুংসিংহা আকু লুংটুইবিরিতা হুইওয়া অংটি বেপারাংগা। সেংজাকো য়্যইদিহিংয়া হিংমসা য়াংতামসা তুংসিংতা এমগা।17আদো ই য়্যইদিহা তুংসিংকো নাপো চোইপা হোমক্যইওয়াকো সোতা আবিহা আম্যই চোইপা মেংচে দেংমগা। আসা হাত্রং ই য়্যইদিকো সোতা দিংঙাবিকোসো মেংতাওয়া কোইচ্যাওয়াবি ওয়াং, আত্রংরাং আবিহা নুনুই ওয়েংপুমগা।18আসা লেরা দিংঙাকো তুংসিংবিহা আকু সোসাবিরিকো নাপোতা হুইওয়া অংটিবেপা জিংমগা।19আবিহা সেংজাকো য়্যইদি হিংকোহা হিংমগা, আদো ই বাসিমতিকো সিংদুওয়া, পুংজিবিহিং জেজেংওয়া আসা এপা জিংওয়া উইসে হাইক্রি ঘ্যইরো তাওয়াকো সোতারাং য়্যইদিহা য়াংপুমসা হ্যাপুমগা আসা অংটিবিতা হাইরে অংসে সেপামক্যইমগা।20আদো লেরাকো তুংসিংহা, এনতাওয়া মোংটোতা হুইওয়া অংটিবেপা জিংমগা। আবিহা সেংজাকো জাংওয়া নুওয়াং হিংমসা তুংসিংতা এমগা আসা তিশ গুনা, সাঠি গুনা আসা একশো গুনারোমা সিওপা অংসে সেপামগা।”21ইশুহা ন্যাসারাং জাংয়ে, “দিংঙাবিহা দিব্রি লারাইপামসা হাং জোমগা? তোপাকো লিতা এমগা, না জিংওয়া খাটকো লিতা এমগা? দিব্রি লারাইপামসা তোলোংওয়া তিরাতা এমকোতা?22আকু বেপারাং নাপোতা নিওয়া নুওয়াংবিরে তাংসা বাইরেতা নোরোওয়া আসা তাংসা মোকোইওয়া নুওয়াংবিরে কোইকো চুরোওয়া।23হাংসুকো নানুং নি, আকুহা হিংমসা কোইকো।”24ইশুহা আবিহিংয়া ন্যাসারাং এপা জাংয়ে, “হিংওয়া নুওয়াংতা এনতাপা হিং। হাসে নাবি কোইচ্যা আউসেরাং মুংচারোওয়া, আকুরোমা সিওপা নাবিহিংয়া পিচারোওয়া।25হাংপাতানাহা হাংসুকোতা নি, আকুহিংয়া ন্যাসারাং পিচারোওয়া, আদো হাংসুকোতা মোতো, আকোতা হাইনি আকুরে আকোসো গিংচাপুরোওয়া।”26ইশুহা ন্যাসারাং জাংয়ে, “সেংজাকো রাজ্যহা ইচো দিংঙাকো লুংনিংতা অংটি মিওয়া বেপারাংগা।27আকুহা লিশুং জিংপুদো, অংটিবিহা হিপপিরিতা হেপা নিংমে, আকুহা সিদা মোচ্যইমগা।28মোংটোহা আপনিরাং কুটি নিংপামগা, আসা সিংতেংতা সেপামগা। নাগাইহা নোইচু নুইমগা আসা মোইপ্যা নোমগা, আকো নোইতা মেংচে অংসে সেমগা।29মোইপ্যা মিংতেনুওয়া গিরিওয়াহা কাচি পামসা মোইপ্যা চ্যারেকো লেমগা, হাংপাতানাহা মৌইপ্যা চ্যাকো সময় জিংতেও তামসা আকুহা গেমগা।”30ন্যাসারাং ইশুহা জাংয়ে, “কা হাংহিংপা সেংজাকো রাজ্যহিং নোওকোগা? হানি মিংচিহিংপা নোওমসা ঝিপাকোগা?31আকু লোইহা এপা নিও, তৌরিহা বাসিমতিতা হাংসুরোমা চিয়োওয়া অংটিগা। ইচো দিংঙাহা আকু অংটিহা লুংনিংতা মিয়ো।32আদো অংটি মিইনুকো নোইতাহা হাত্রং নিংমসা টেবো জিং, আত্রংহা দোসরা স্যাম্যা-সুতিকো লাপারোমা টেবো জিংপুমগা। আসা টেরবো টেরবো গেইবেবি নোমগা, আসা জিয়া-জিপেইবিরে আকো লিতা লেমসা বাসা বানাইমসা য়ুংমগা।”33দিংঙাবি সেংজাকো নুওয়াংবি কোইকো তামসা ইশুহা এপা জিংওয়া উইসে মিংচিবি ল্যায়ে।34দিংঙাবিহিং ঝিপানুওয়া ইশুহা মিংচি মাল্যাপাহা হাইরে মাঝিপাতো। আদো আপনিকো য়োংতোংবি নিনু মেংচে ইশুহা তাংসা মিংচিবি ল্যাওয়াতা জাংওয়াহা হাংমমে তামসা কোইপাপিচাংমি।35আত্রংকো জিরুং ইশুহা আপনিকো য়োংতোংবিহিং জাংয়ে, “লেই, নেহা য়াংবিহা দাব্রিকো নুবাইতা হ্যাকো।”36য়োংতোংবিহা দিংঙাবিহিং হুইতেমসা ইশুকো গাদিংওয়া নোওয়াইতা বাইপুমসা আকুহিং পুরামসা হোপুয়ে। আবিহিংপাহা দোসরা নোওয়াইবিরে হ্যায়ে।37নোওয়াইহা দাব্রিতা বাংদিংনুওয়া আত্রংহা দাব্রিতাহা টেবো বিংঙা হ্যায়ে, আসা দাব্রিতাহা চুরা লোমসা নোওয়াইতা তি হোপুয়ে, আসা নোওয়াইতা তি মেইপুদাংয়ে।38ইশুহা নোওয়াইকো নোইস্যা কাটুসো পুকুংতা পোরো এমসা জিংদিংমি। য়োংতোংবিহা আকুহিং টুসুয়ে, “উটকেওয়া, য়াংবিহা ইতা সিকোমে নিকোমে বেপা জিংপুনতেনা নাতিহা সিদা মোচ্যইংগা?”39ইশুহা লোমসা বিংঙাসো চুরা লোওয়াহিংয়া চিংচাইমসা জাংয়ে, “সাং, চিচ্চোপা জিংপু।” আত্রংতারাং বিংঙাহা সাংপুয়ে, আসা চুরা লোওয়াবিরে চিচ্চোপা জিংপুয়ে।40আকুহা য়োংতোংবিহিং জাংয়ে, “নাবিহা হাংপা চুসুংসুমগা? হানি, নাবিকো দেংওয়াহা?”41ই তিংমসা য়োংতোংবিহা আজিপ্পারাং চুসুংসপুয়ে আসা তাইবিলারাই জাংসুয়ে, “ইহা হাংসুমেতা? বিংঙাসো ঝাহাদিবিরে ইকো নুওয়াং হিংকোইমি!”
The Seed Company