লুক21
1য়হুদিবিকো দেমসাতা ইশু ন্যইদিংনুওয়া পুপুউ দিংঙাবিহা ন্যাস্যা এওয়া বাকোসিতা ভেটি ওয়্যাদিংনুওয়া2ইচো জোরোংরি মুরিংমুহিংনে তামাকো নিহসে টাংকা ওয়্যাওয়া তিংয়ে।3ই তিংমসা ইশুহা জাংয়ে, “কা নাবিহিংয়া আজিপ্পারাং জাংরোওয়া, ই জোরোংরি মুরিংমুহা হাংসুরোমা সিওপা ওয়্যামি নিও,4হাংপাতানাহা লেরাহা আপনিকোতা নিওয়াসো লাওয়া ওয়্যামি নিও, আদো ই জোরোংরি মুরিংমুহা আপনিকোতা নিওয়াসেইরাং তাংসা ন্যাস্যাবি ওয়্যাপুমি নিও।”5আত্রংহা লেরা য়োংতোংবিহা এনতা এনতাওয়া লুংটুইসো আসা দিংঙাবিকো সেংজাকো মিংতা পিচাওয়া ভেটিবিসো বানাইওয়া দেমসা হাসেকো এনতাক্যইমে তামসা জাংদিংওয়া নিমি। আদো ইশুহা আবিহিংয়া জাংয়ে,6“এপা জিংওয়া সময় ওয়াংরোওয়া, হানি সময় নেকো তিংদিংওয়া লুংটুইবিতাহা ইরুং লুংটুইকো তোইতা ইরুং লুংটুইরে মায়ুং, তাংসা হ্যাপুরোওয়া।”7আবিহা জাংয়ে, “উটকেওয়া, ইহা হাত্রং জিংকোগা? এপা জিংদাংওয়ারোমা নাগাইহা কাবিহা হেপাজিংওয়া চিহ্ন তিংকোগা?”8ইশুহা জাংয়ে, “হোশিয়ার য়ুং, নাবিহিংয়া হাংসুরে মোল্যহপাকো, হাংপাতানাহা উইসে দিংঙাবিহা কুং মিংতা কা খ্রীষ্টগা তামসা ওয়াংরোওয়া, আসা ‘সময় আবেইতা দেয়োংতেও’ তামসা জাংরোওয়া, আদো আবিকো নুনুই মুহুই।9নাবিহা স্যাসুয়ে লুইসুয়ে তাওয়া হিংমসা মাচ্ছুংগে, আদো বাসিমতি দাংপুনুরোমা নাগাই আকু তাংসা নুওয়াংবি জিংনেরোওয়া, আদো আত্রংরাং তাংসা মাদাংরোওয়া।”10ইশুহা ন্যাসারাং জাংয়ে, “জ্যাকো প্যাকোতা জ্যা লুইসুরোওয়া, ইচো রাজ্যহা দোসরা রাজ্যহিং মিচিপা জোরোওয়া।11জায়গা জায়গাতা চুসুং-মাইসুংক্যইওয়া নিংঙা হ্যারোওয়া, আসা চাকো আংকোরে মামুংপা জিংপুরোওয়া, আসা জায়গা-জায়গাতা টেরবো য়োংন্যাবি, আসা ডিংবাতা চুসুং-মাইসুংক্যইওয়া টেরবো টেরবো চিহ্নবি তিংরোওয়া।12“ই তাংসা জিংওয়ারোমা নাগাই দিংঙাবিহা নাবিহিংয়া কুং মিংকো সোতা প্যইমসা দুরোওয়া আসা জোংসুওয়া সাতা পুরামসা জেলতা সুংপুরোওয়া। ন্যাসারাং আবিহা নাবিহিংয়া জাইপু আসা মাটা কাইজিবিকো প্যাকোতা জাপারোওয়া।13আত্রংহা নাবিহা কুং তোইতা জাংকো মৌকা মুংরোওয়া।14আদো আপনিহিং বাচাইকো সোতা নাবিহা হাং জাংনেকোমে নাগাইসোরাং সিংদুমগ্যই,15হাংপাতানাহা কা নাবিহিংয়া য়্যইদিসো দুংজি পিচারোওয়া, আসা নাবিকো য়্যইওয়াতা মোসোংপা জোমবিকো নামুহিং কা য়্যইমকোইপা জোরোওয়া।16নাবিকো আয়ু-আপা আপু, এ আসা আপনিকো দিংঙাবি, আসা ব্যারোবি, নাবিহিংয়া মেংতাওয়া দিংঙাবিকোতা প্যইপারোওয়া, নাবিকো প্যাকোতাহা লেরাহিংয়া স্যাপুরোওয়া।17কুং সোতা তাংসা নাবিহিংয়া আচকাপা জোরোওয়া।18আদো ইগে পুরিংবিরে নাবিকো পোরোসো মোজ্যইরোওয়া।19আদো সহায়মসা য়ুং, নাবিহা সাদি মুংচারোওয়া।”20“য়রুশালেম শহরহিং সিপাইবি হুরাপা য়োইওয়া তিংনুওয়া নেহা আকুহা দাংপুরো তাওয়া সময় দেয়োংতেয়োং তামসা কোইকো জো।21আত্রংহা য়হুদিয়া জায়গাতা নিওয়া দিংঙাবিহা য়্যাগ্যইতা ক্যাচপু, শহরতা নিমবিরে শহরহিং হুইতেমসা ক্যাচপু, লোইতা নিমবিহা শহরতা মোহো।22হাংপাতানাহা তাংজিকো হিগাতা লাওয়া তাংসা নুওয়াংবিহা জিংনেকো সোতা শাস্তিকো দিনবি জিংরোওয়া।23আত্রংহা চেং বুংওয়া আসা নুইতা চেংনিওয়া আয়ুবিহিংয়া চুসুংমাইসুংপা জিংরোওয়া, তাংসা দেশবিতা চুসুংমাইসুংপা জিংপুরোওয়া, আসা সেংজাকো সেদ্রাংহা ই জ্যাকো দিংঙাবিকো তোইতা হুইরোওয়া।24আবিহিংয়া পাটাংসো ছেরোওয়া, মোকোনাহা প্যইমসা লোই-লোইতা পুরাচারোওয়া, দোসরা জ্যাকো দিংঙাবিকো সময় মেদেয়োংচেহা আবিহা য়রুশালেমহিংয়া হিংদ্যা-চিদ্যা সুরোওয়া।”25“সানি, তারি আসা পুইমাবিতাহা টেরবো চিহ্ন তিংরোওয়া। ঝাহাদিকো খ্যাওয়া আসা চুসুং-মাইসুপা চুরা লোওয়াসো বাসিমতিকো তাংসা দিংঙাবিহা চুসুংপুমসা লোচোপেংঙেংপা জিংপুরোওয়া।26বাসিমতিতা জিংপাদাংওয়া নুওয়াংবিসো চুসুংমসা দিংঙাবিহা পিপিং-দোদোউপুরোওয়া, হাংপাতানাহা ডিংবাতা নিওয়া তাংসা সেবিহা দিদিপুরোওয়া।27আকো নোইতাহা দিংঙাকো চেংওয়াহা ডিংবাসো টেবো সেতা আসা মহিমাতা লেপাওয়া তিংরোওয়া।28হাত্রং এপা জিংওয়া নুওয়াংবি জিংদাং, আত্রংহা মাচ্ছুংপা জামসা তোইতা ন্যই, হাংপাতানাহা নাবিকো উদ্ধারহা দেপাদাংতেও।”29আকো নোইতা ইশুহা ই মিংচি আবিহিং হিংপায়ে, “মুইরা আসা দোসরা সিংতেংবিহিং কাং,30হাত্রং আকু সিংতেংবিতাহা নোইচু নুইওয়া তিং, আত্রং নাবিহা বোওয়া সময় আবেইতা দেয়োংতেয়ো তামসা গেমগা।31এপারাং কুং জাংওয়া তাংসা নুওয়াংবি তিংনুওয়া নাবিহা সেংজাকো রাজ্যহা আবেইতা দেয়োংতেয়ো তামসা গেরোওয়া।32“আজিপ্পারাং কা নাবিহিং জাংরোওয়া, ই তাংসা মাজিংনু চোইপা নেকো দিংঙাবিহা মাদাংরোওয়া।33ডিংবাসো বাসিমতি দাংপুমসা হ্যাপুরোওয়া, আদো কুং জাংওয়া নুওয়াংহা হাত্রংরে মাদাংরোওয়া।”34“হোশিয়ার য়ুং, সিওপা চাওয়া আংওয়া, আসা গাইমসা মেতেই, ই জুপাকো সোতা নাবিকো তুংসিংতা সিংদুমগ্যই। মোকোনাহা একবিরি জিয়া-জিপেইবি জেরেতা লুচপুমি ত্যাবাপা আকু দিনহা নাবিকোতারে দেরেরোওয়া।35এপারাং একবিরি জেরেতা লুচপুমবেপা বাসিমতিকো তাংসা দিংঙাবিকোতা দেরেরোওয়া।36আকো সোতা হোশিয়ার য়ুং, আকু তাংসা চুসুংমাইসুং-ক্যইওয়া নুওয়াংসো বাচেমসা দিংঙাকো চেংওয়াকো নাগাইতা জাকো চুওয়া সে কাবিহিং পিচা তামসা সেংজাকোতা হাত্রংদো পাচাইমসা য়ুং।”37আকু দিনবিতাহা ইশুহা দেমসাতা ঝিপাচাংমি, আসা লিসুংহা শহরসো নোমসা জেইতুন তাওয়া য়্যাগ্যইতা জিংয়াকো হোচাংমি।38তাংসা দিংঙাবিহা হাপকুংসো আকো ঝিপাওয়া হিংকো দেমসাতা ওয়াংচাংমি।
The Seed Company