ন্যায়কর্তা21
1ইস্রাইলিবিহা মিস্পাতা জমা জিংসুনুকো বেলাতাহা আবিহা প্রভুসেংজাহিংপা ইচো এপা জিংওয়া প্রতিজ্ঞা জোমি নিমি, “কুনেই বেন্জামীনীবিহিংয়া বিয়ৌ জোকো য়াংবিহা য়োংকো আপনিকো চেংমেবিহিংয়া মিচারোওয়া।”2বেথেলতা হোমসা সেংজাকো আবেইতা ইস্রাইলকো দিংঙাবিহা জিরুং চোইপা য়ুংয়ে। ঙা-ঙামসা আবিহা লোচোপেংগেংপা কাইসুয়ে।3আবিহা জাংয়ে, “ও প্রভুসেংজা ইস্রাইলকো সেংজা, হাংপাসা এপা জিংকো পিচামিগা? হাংপাসা নেহা বেন্জামীনীবিকো জিরি ইস্রাইলসো য়াংপুদাংতেংগা?”4জুকুং হাপকোংসো আকু দিংঙাবিহা লোয়ে আসা আউতা ইচো বেদী বানাইয়ে। আউতা আবিহা মেলবলি আসা হোমবলি চড়াইয়ে।5আবিহা উইয়ে, “ইস্রাইলকো তাংসা জিরিবিকো প্যাকোতা কুনাই ইচো এপা জিংওয়া পারা নিংগা, হাংসু সেংজাকো আবেইতা মিস্পাতা হাজির মেজিংমে?” মিস্পাতা প্রভুকোতা মাহ্যাওয়াহিংয়া আবিহা স্যানেরোওয়া তামসা নাপোইসুয়ে।6আপনিকো বেন্জামীনী এবিকো সোতা ইস্রাইলকো দিংঙাবিহা লোচোংপেগেংপা জোয়ে আসা জাংয়ে, “হিনিহা ইস্রাইলকো ইচো জিরিরাং য়াংপুমি নিও।7ল্যইতেওয়া বেন্জামীনী পোজাবিকো সোতা য়াংবিহা হানিসো মে পারাপিকোগা? য়াংবিকো চেংমে য়াংবিহা আবিহিংয়া বিয়ৌ জোকো মিচারোওয়া তামসা য়াংবিহা প্রভুসেংজাহিংপা প্রতিজ্ঞা জোমি নিমগা।”8ইস্রাইলকো জিরিসো প্রভুসেংজাকোতা মিস্পাতা মাহ্যাওয়া লেরা পারাবি নিমমে তামসা আবিহা মোস্যইয়ে। গিলাদকো য়াবেসসো হাংসুরে আউতা মাহ্যাওয়া আবিহা দোসুয়ে।9হাংপাতানাহা হাত্রং আবি দিংঙাবিহিং চেং, আত্রংহা য়াবেশ-গিলাদকো দিংঙাবিহিংয়া আবিহা হাংসুহিংনে মাদোসুতো।10আকো সোতা আকু সভাহা ১২,০০০ হাংসুরোমা অসল লুইসুওয়াবিহিংয়া এপা জিংওয়া আজ্ঞা জোমসা নিংপুয়ে, “হ্যাতু আসা য়াবেশ-গিলাদতা নিওয়া তাংসা পোজা, মেমে আসা চেংওয়া চেমেবিহিংয়া স্যা।11আদো বিয়ৌ মাজিংয়াংওয়া মেমেবিহিং মেংচে ল্যাপি আসা তাংসাহিং স্যাপুই।”12য়াবেশ-গিলাদতা য়ুংওয়াবিকো প্যাকোতা চারশো জনা বিয়ৌ মাজিংওয়া মেমেবি দোসুয়ে। আকু মেমেবিহিংয়া আবিহা কনান দেশতা শীলোকো তাম্বুতা পারায়ে।13আকো নোইতা ইস্রাইলিবিকো আকু সভাহা রিম্মোন পাত্যারুংতা য়ুংওয়া তাংসা বেন্জামীনীবিহিংয়া লুইসুওয়াহা ত্যইয়ে তাওয়া দেরেং কাইপুয়ে।14বেন্জাঙিনীবিহা লায়োংয়ে আসা ইস্রাইলিবিকো পারাওয়া মেমেবিহিংয়া পিচাপুয়ে। আবিহা আকু মেমেবিহিংয়া মাস্যাপা এওয়া নিমি। আদো আউসে মেমেবিতারে আউতা নিওয়া তাংসা বেন্জামীনীবিহিংয়া মাতেংতো।15তাংসা বেন্জামীনীবিকো সোতা লোচোপেংগেংপা জোয়ে, হাংপাতানাহা ইস্রাইলিবিকো জিরিবিকো প্যাকোতাহা প্রভুসেংজাহা লুইসপাপুমি নিমগা।16আকো সোতা জোংসুওয়াকো মাটাবিহা জাংয়ে, “বেন্জামীনী জিরিতা মেমেবিহা মোতোতো। লেরা পোজাবিহিংয়া হেপা মেমে মোমসা পারাপিকোগা?17ইস্রাইলকো ইচোরে জিরিরাং সিমতুরোওয়া। বেন্জামীনী জিরিহিং বাচাইকো কাম জোনেরোওয়া।18আদো য়োংকো চেংমেবিহিংয়া আবিহিংপা বিয়ৌ জোকো পিচাকোহা মোছুরোওয়া, হাংপাতানাহা লেরা বেন্জামিনীহিংয়া আপনিকো চেংমেবিহিং বিয়ৌ পিচাওয়া দিংঙাহিংয়া য়াংবিহা শ্রাপেমি নিও।”19আদো আবিহা নোয়ে, “শীলোতা লোপোলেরে জিংওয়া প্রভুকো সোতা জিংওয়া চারহা নেহা আবেইতা নিও।” (শীলোহা বেথেলকো দাংব্যা কাটুতা লাবানোনকো ম্যাব্যাতাহা আসা বেথেলসোহা সাকেম হ্যাওয়া ন্যাতাকো নুব্যাই কাটুতা পরেমগা।)20আবিহা বেন্জামীনীবিহিংয়া জাংয়ে, “আংগুরবিরিতা হ্যাতু আসা আউতা গুংমসা গা।21চারকো দিন হাত্রং শীলোকো মেমেবিহা য়ৗকো তামসা লেমগা আবিহা আংগুরবিরিসো নোমসা আকু মেমেবিহিংয়া টোটোউসি প্যইমসা আসা তাংসা ইচো ইচো জোমসা মে জেংমসা এচাকো। মেমেবিহিংয়া আপনিহিংপা আপনিকো দেশতা পুরামসা হ্যাকো।22আবিকো আপা আসা ডুওয়া এবি লেমসা আবিহিংয়া য়োইনাহা আবিহিংয়া এপা জাংকো, ‘ইবিহিংয়া কাবিহিংপা হুইতে, কাবিহা ইবিহিংয়া বিয়ৌ জোরো তামসা নাবিকোসো লুইসুওয়াতা জিয়োওয়া মোকো। ইবিহিংয়া নাবিরে কাবিহিংয়া পিচাওয়া মোকো, ই জোওয়াতাহা নাবিহিংয়া প্রতিজ্ঞাহিং পুরা মোজোওয়াকো দোষরে মালাগাইরোওয়া।”23বেন্জামীনীবিহা ওইপারাং জোয়ে। শীলোতা য়ৗওয়া মেমেবিতাহা ইচো ইচো মে তাংসারাং জেংয়ে আসা আকুহিং পুরামসা হ্যাপুয়ে। আবিহা আপনিকো লুংবিতা হোয়ে, আপনিকো শহর ন্যাসা চুবে জোমসা বানাইয়ে আসা আউতা য়ুংসুয়ে।24দোসরা ইস্রাইলিবিরে আত্রংরাং আউসো ওয়েংসপুয়ে। আপনিকো জিরি আসা প্যাপ্যাম্যাম্যাতা আসা আপনিকো পুংজি নিওয়া জায়গাতা তাংসা দিংঙাবিহা লাকাপুয়ে।25আত্রংহা ইস্রাইলতাহা জাইপু মোতোমি। হাংসুহিং হাই জোদাংবে, আকুহা আকুরাং জোচাংমি।
The Seed Company