ন্যায়কর্তা19
1আকু দিনবিতা ইস্রাইলতাহা জাইপু মোতোমি। আত্রংহা এফ্রাইমকো য়্যাগ্যইকো দেশকো নাপোতাহা ইচো লেবী য়ুংমি নিমি। য়হুদাকো বেথলেহেমসোহা ইচো মেমে পুরামসা আকুহা আপনিকো হুইমে বানাইমসা এহে।2আদো আকু মেমেহা ওয়াহিংপা সেদ্রাংপামসা বেথলেহেমতা পামিবিকো সাতা লাকাপুয়ে আসা আউতা তারি দিরি চোইপা য়ুংয়ে।3আত্রংহা লাপামসা পারাকো আকু দিংঙাহা আকো সাতা হ্যাকো নির্নয় জোয়ে। আপনিকো ডেইয়া আসা নিহপু গাদা পুরামসা আকুহা হ্যায়ে। আকু মেমে আকুহিংয়া আপনিকো সাতা পুরায়ে আসা আপাহা আকুহিংয়া তিংমসা স্বাগত জোয়ে।4জুওয়াকো জাংওয়া সেই আকুহা আউতা সাসুংয়ুং চোইপা য়ুংয়ে, আকু নিহসো ওয়াসো মেহা আউতা চিত্তা য়ুংসুয়ে, চায়ে আসা লিশুংরে আউতারাং য়ুংসুয়ে।5সাদিয়ুতাহা আবিহা হাপকোংসো লোয়ে আসা হ্যাকো তৈয়ার জিংয়ে। আদো জুওয়াহা লেবীহিংয়া জাংয়ে, “নাগাইহা হাইক্রি চা। আকুহা নাবিহিংয়া এনতাপা জোরোওয়া। আকো নোইতাহা নাবিহা হ্যাপুদো তুরোওয়া।”6আসা আকু নিহসো দিংঙাবিহিংপা গামসা চায়ে আসা আংয়ে। আত্রংহা মেমেকো আপাহা জাংয়ে, “ন্যাসা সাইয়ু লিশুং য়ুংমসা য়াংতা।7লেবীহা হ্যাকো তামসা লোয়ে আদো জুওয়াহা সুজাওয়াকো সোতা আকুহা ন্যাসা আউতা সাইয়ু লিশুং য়ুংয়ে।8সাঙায়ুকো হাপকোংহা হ্যাকো তৈয়ার জিংয়ে, আদো আকো জুওয়াহা জাংয়ে, হাইক্রি চা, স্যাক্যাপা হ্যাপুদো তুরোওয়া।” আসা আবি নিহসোহা চিত্তা চাকো তামসা গাসুয়ে।9আত্রংহা আপনিকো হুইমে আসা ডেইয়া লেমসা পুরাকো তামসা ইকোই আকুহা ন্যাসা লোয়ে, আদো জুওয়াহা ন্যাসা জাংয়ে, “কাং, জিরুং জিংপুনতেও। হিনি লিশুংরে ইতারাং য়ুংপুই। সেন্নেপা মিরি মোপুরোওয়া। ইতারাং য়ুংমসা গাগ্রুপা জো। জুকুং হাপকোংসো লোমসা সাতা হ্যাপুদো তুরোসা!”10আদো দোসরা সাইয়ু লিশুং আউতা য়ুংতাপা মোজোতো। আকো সোতা আকুহা আপনিকো হুইমেহিংপা ন্যাতা দোমসা হোপুয়ে। আবিহিংপাহা ব্যা লাগাইওয়া নিহপু গাধাবি নিমি। সানিহা হুইপুদাংতেমি নিমি। আবিহা য়বুস (অথবা য়রুসামেলকো) আবেইতা দেয়োংয়ে। ডেইয়াহা আকুহিংয়া জাংয়ে, “উটকেওয়া, হিনিকো লিশুংহা য়বুসীবিকো শহরতা য়ুংপুকোগা?”12আদো আকো গিরিহা আকুহিংয়া জাংয়ে, “মোকোমি, ইস্রাইলিবি মোতোওয়া ই পরদেশি জায়গাতা মাহ্যাসি,13আকুরোমাহা “লে, গিবা কিতা রামা চোইপা দেকাকো কোশিস জোসি, আসা আউতারাং লিশুংহা য়ুংসি।”14য়ুবুসহিং হুইতেমসা আবিহা নাগাই গ্যইয়ে, বেন্জামিন জিরিকো জায়গা, গিবাতা দেয়োংনুওয়া সিনি হুইপুনতেমি নিমি।15ন্যাতা হুইতেমসা আবিহা গিবাতা হোয়ে। শহরতা চোইয়ামসা আবিহা খুলা চৌপাতিতা গাসুয়ে। আবিহিংয়া লিশুংহা আউতা য়ুংকোহা হাংসুরে মাপুরাতো।16আবিহা চৌপাতিতা য়ুংদিংওয়া সময়তাহা ইচো ওয়ারাংপা দিংঙাহা হিমিসিং লুংনিংতা কাম জোমসা আউতা দেরেয়ে। আকুহা নাগাইহা এফ্রাইমকো য়্যাগ্যইতা য়ুংচামি, আদো নেহা আকুহা গিবাতা য়ুংমগা। (আকো লেরা দিংঙাবিহা বেন্জামিন জিরিতা নিমি।)17ওয়ারাংপাহা চৌপাতিতা গাদিংওয়া আকু দিংঙাবিহিং উইয়ে, “নাবিহা হানিসো ওয়াংমগা? হাংতা হ্যাদাংগা?”18লেবীহা জাংয়ে, “কাবিহা য়হুদাকো বেথলেহেমতা হ্যামি নিমি। নেহা আপনিকো সাতা লাকাদাংমি। কাবিকো সাহা এফ্রাইমকো য়্যাগ্যইকো নাপোতাগা। কাবিহিংয়া হাংসুরে লিশুং জিংকো য়ুংকো মিচাতো।19কাবিহিংপাহা চাওয়া আংওয়া তাংসা নিও। গাদাহিংয়া পরাল আসা কা, কুং মে আসা কুং ডেইয়াহিং কোব্রেং আসা য়ু নিও। কাবিহিংয়া ঘ্যইওয়া তাংসা কাবিহিংপারাং নিও।”20ওয়ারাংপাহা জাংয়ে, “নাবিহিংয়া কুং সাতা স্বাগত নিও। কা নাবিহিংয়া য়ুংকো পিচারোওয়া। নাবিহা লিশুংহা চৌপোতিতা য়ুংমঘ্যইরোওয়া।”21আকুহা আবিহিংয়া আপনিকো সাতা পুরায়ে আসা গাদাহিং চাংওয়া আংওয়াবি পিচায়ে। খুই কোকোই দুমসা আর্সিংবিহা চাওয়া চায়ে।22এপা জোমসা আবিহা গাগ্রুমসা গাদিংনুকো সময়তাহা একবিরি শহরকো বদমাসি দিংঙাবিহা আকু সাহিং য়োইসুয়ে আসা লাপুং বেসুয়ে। “নাকো সাতা লেওয়া দিংঙাহিংয়া বাইরে নোপা, কাবিহা আকুহিংপা নুংনাংসুরোওয়া।”23বাইরে হ্যামসা ওয়ারাংপাহা জাংয়ে, “মোকোমি, ব্যারোবাই, কৃপা জোমসা এপাজিংওয়া দু্ষ্ট আসা পাপকো কাম মোজো। ই দিংঙাহা কুং আর্সিংগা।24কাং, ইতা আকো হুইমে আসা কুং চেমে নিও। কা আবিহিংয়া বাইরেতা পারারোওয়া। নাবিহা আবিহিংপা হাই জোকো ইচ্ছা জিংবা জোপুই। আদো ই দিংঙাহিংপা এপা জিংওয়া আজকাক্যইওয়া কাম মোজোগ্যই!”25আদো আকু দিংঙাবিহা ওয়ারাংপা দিংঙাকো জাংওয়া নুওয়াং মাহিংতো। আকো সোতা লেবীহা আপনিকো হুইমেহিংয়া বাইরে নোপামসা আবিহিং পিচায়ে। আবিহা আকুহিংয়া হিপপিরি নুংনাংসুমসা আকো তোইতা অত্যাচার জোমসা হাপকোং মেংচে ল্যাপিয়ে।26হাপকোংসো আকু হুইমেহা লেমসা ওয়ারাংপাকো সাকো লাপুংকো আবেইতা ইপুয়ে। লেবীহা সাকো নাপোতারাং নিমগা। হাপকোং হোহোইপা জিংপুনু চোইপা আকুহা আউতারাং ইপুমি নিমি।27হাপকোং ওয়াংহা লোয়ে আসা আপনিকো ন্যাতা হ্যাকো লাপু ওয়েনুওয়া আপনিকো হুইমেহিংয়া সাকো নাগাই লাপুংতা খুই লামসা ইদিংওয়া আকুহা তিংয়ে।28আকুহা জাংয়ে, “লো, য়াংবিহা হোসি।” আদো আকুহা হাইরে জবাব মোমুংতো। আকো সোতা আকুহা গাদাতা আপনিকো হুইমেকো জুপা এহে আসা সাতা হোপুয়ে।29সাতা দেয়োংমসা আকুহা সাকো নাপোতা হোমসা ইচো কাসুমা নোপায়ে। আপনিকো হুইমেকো জুপা চ্যামসা বারচো সারু বানাইয়ে আসা ইচো ইচো সারু ইস্রালকো বার্চো জিরিবিহিং কাইপুয়ে।30ই তিংওয়া আবি তাংসা জাংয়ে, “কাবিহা এপা জিংওয়াহা হাত্রংরে মাতিংওয়াংমগা। ইস্রাইলিবিহা মিশ্র দেশসো নোপমসা লেনুসোওয়া হিনিকো দিন চোইপা এপাহা হাত্রংরে মাজিংয়াংতো। আকুহা আপনিরাং বিচার জো, হাং জোনেকোগা কাবিহিং জাং।”
The Seed Company