য়হুদা1
1কা য়াকুবকো এ আসা ইশু খ্রীষ্টকো ডেইয়া য়হুদাগা। সেংজাকো জেংমসা জেজেংপা জোমবি আসা ইশু খ্রীষ্টকো রক্ষা জোমবিহিং ই চিঠি লাদাংয়ো।2নাবিহা সিওপা জেজেংওয়া, লামতুওয়া আসা তিমেওয়া মুংচাকো।3ও ব্যারোবাই, নাবিহিংয়া কাবি তাংসাকো মুংচাওয়া মুক্তিকো বিষয়তা লাকো কাহিংয়া টেবো ইচ্ছা জিংয়ো আসা চিত্তা হাত্রংদো তেংক্যইপা আপনিকো পবিত্র দিংঙাবিহিং সেংজাহা ইকোই মেংচে পিচাওয়া দেংওয়াকো সোতা লুইসুকো হিম্মাত নাবিহিংয়া পিচানেকোরাংগুং তাওয়া জিংয়ে।4লেরা-লেরাহা নাগাইসোরাং দোষি জিংতেওয়া দিংঙাবিরে নাবিকো প্যাকোতা চেকেপা হোমি নিও। আবিহা সেংজাহিংনাং মামানেমগা। সেংজাকো পিচাওয়া অনুগ্রহহিংয়া আবিহা মেংতাপা কাম জোওয়া হাতিয়ার বানাইমি নিও আসা ইশু খ্রীষ্টহিংনে ইচো মেংচে প্রভু আসা গিরিগা তামসারে মামানেমগা।5কা নাবিহিংয়া সিদা চ্যইমি নিদো, হাইক্রি নুওয়াং প্যারাতাংপাকো কেংরোওয়া। প্রভুহা আপনিকো দিংঙাবিহিংয়া মিশ্র লোইসো নোপামসা পারায়ে। আদো নোইতাহা মাদেংবিহিংয়া দাংপাপুয়ে।6আপনিকো অধিকারসো বাইরে য়ুংমসা আপনিকো য়ুংওয়ারে হুইতেমসা তেইওয়া লোডিংবাকো পোইংবিহিংনে আকুহা ন্যায়কো দিনতা দন্ড পিচাকো হাত্রংরে হ্যইপামক্যইপা তাইমি নিও আসা নাটুংওয়াতা সুংমসা এমি নিও।7এপা জোমসারাং সদমসো গোমোরা আসা আবেই আবেইকো শহরকো দিংঙাবিহা ইচো ইচো জোমসা আচকা-চিগাক্যইওয়া নুংনাংসুওয়া কামবি জোয়ে। মেতা দাংপুমসা আবিহা হাত্রংরে মিসিওয়া মেতা দন্ড মুংওয়াবিকো নামুনা জিংপুয়ে।8আবিহা দর্শন তিংমগা, ই দিংঙাবিহা আপনিকো জুপাহিংয়া অশুদ্ধ বানাইমগা, ইবিহা প্রভুকো অধিকারহিংয়া ইন্কার জোমগা, আসা মহিমাসো মেইপুওয়া লোডিংবাকো পোইংবিকো নিন্দা জোমগা।9আদো মাটা লোডিংবাকো পোইং মিকায়েলরে মোসাকো সিপুওয়া জুপাকো বিষয়তা জেসাংহিংপা স্যাসুমসা আকুহিংয়া নিন্দা জোমসা দোষ মালাগাইতো। এসে মেংচে জাংয়ো “প্রভুহা নাতিহিংয়া য়েংরোওয়া।”10আদো ই দিংঙাবিহা আপনিকো কোইকোরে-মোকোইওয়া নুওয়াংহিং নিন্দা জোমসা দোষ লাগাইমগা, আসা আবিকো কোইকো ছুওয়া সেহা দুংজি মোতোওয়া সেংচেংবিকো ত্যাবাপা আসা আবিহা আউসোরাং দাংপুরোওয়া।11নাবিকো সোতা ইহা হাসেকো চুসুং-মাইসুংক্যইওয়া নুওয়াংগা। আবিহা কয়িনকো ন্যাতাতা হোপুয়ে। ন্যাস্যাকো সোতা বালামকো জোওয়া মেংতাওয়া কামকো ন্যাতা হুইপুয়ে আসা কোরহ ত্যাবাপারাং আবিহা বিরোধ জোয়ে, আসা আবিহা আকু বেপারাং দাংপুরোওয়া।12ই সৌবে তাপুওয়া দিংঙাবিহা নাবিকো জেজেংওয়াকো ভোজতা মিকা ধুইপাওয়াগা। আবিহা দোসরাহিং প্যারামাপাপা আপনিকো ফেমা মেইপাওয়াগা। আবিহা বিংঙাসো ভুইপাওয়া আসা ওয়্যাতি মাওয়্যাওয়া মুউওয়া ত্যাবাপাগা। আবিহা হাইরে ফল মেসেওয়া দেবেসোরাং ওইচপুওয়া লাপাবি সেংপুওয়া সিংতেংবি বেপাগা।13আবিহা ঝাহাদিকো চুসুং-মাইসুংক্যইওয়া চুরা লোওয়াবেপা নিও আসা আপনিকো আচকাক্যইওয়া নুওয়াংহা ঝাহাদিকো বোকা লোওয়া বেপা তিংপামগা। আবিহা হুরাওয়া ফুইমাবি বেপা নিও, হাংসুকো সোতা হাত্রংদো চুসুং-মাইসুংক্যইওয়া নাটুংওয়া জায়গা তৈয়ার জোমসা এমি নিমমে।14আদমকো নীচো পুস্তাকো নোইকো হানোকহা নোইতা হাং জিংকোমে আকু নুওয়াংহা নাগাইসোরাং জাংমি নিমগা, “কাং, হাজার হাজার পবিত্র পোইংবিহিংপা প্রভুহা লেপায়ে।15আকুহা এপাজিংওয়া দিংঙাবি তাংসাহিংয়া ন্যায় জোরোওয়া আসা আবিকো জোওয়া মেংতাওয়া কিসিমকো কামবিকো আসা আকো বিরোধতা য়্যইওয়া নুওয়াংবিকো দন্ড পিচারোওয়া।”16ই দিংঙাবিহা হাত্রংরে আপনিহিং মেতেংওয়া, হাত্রংদো দোসরাকো দোষ মোমসা নোপাওয়া আসা আপনিরাং মেংতাওয়া ইচ্ছাতা তেইওয়া, আপনিহিং টেবো নোওয়া আসা আপনিকো কাম বানাইকো দোসরাহিং নোইপাওয়া জিংমগা।17আদো ও ব্যারোবাই, য়োংকো প্রভু ইশু খ্রীষ্টকো জেংওয়া পোইংবিকো নাগাইসো জাংওয়া নুওয়াংবিহিং মালিরিং।18আবিহা জাংওয়া নিমগা, নোইস্যাকো দিনবিতাহা ঠাট্টা জোওয়াবি নোরোওয়া। আবিহা সেংজাহিং মামানেপা আপনিকো ইচ্ছাতা তেইরোওয়া।19নাবিহিং স্যাসপাওয়াতা পারাওয়ারে ই দিংঙাবিরাংগা। আবিহা বাসিমতিকো নোচেংতারাং য়ুংমগা, হাংপাতানাহা আবিকোতাহা পবিত্র লাংবে মাতামগা।20আদো ও ব্যারোবাই, নাবিহা পবিত্র দেংওয়াতা সাডুংপা জিংমসা নাগাই গ্যইমসা হোতু। পবিত্র লাংবেকো সেতা য়ুংমসা পাচাই।21প্রভু ইশু খ্রীষ্টকো অনুগ্রহকো সোতা খুইমসা য়ুং, আকোসোরাং নাবিহা হাত্রংরে মিসিওয়া সাদি মুংচারোওয়া। এপা জোনাহা নাবিহা সেংজাকো জেজেংওয়াতা বাচেরোওয়া।22শংঙ্কা জোওয়াবিকো তোইতা লামতুওয়া তিংপা।23নরককো মেতা পোরেওয়াসো দোসরাবিহিং ডেইমসা বাচাই। দোসরাবিহিং জেজেংপা জোমসা লামতুওয়া তিংপানুওয়া হোশিয়ার জিং, পাপকো লোংস্ত্যাইওয়াসো অপবিত্র জিংপুওয়া আবিকো আংদুংহিংনে আচকাপা জো।24সেংজা, হাংসু নাবিহিং পাপতা দেকাওয়াসো বাচাইমমে আসা মেংটা মোতোওয়া নির্দোষ আসা গাগ্রুপামসা আপনিকো নাগাই দেপামমে।25আকু ইচো মেংচে সেংজা য়োংকো মুক্তিদাতা ইশু খ্রীষ্টতা য়োংকো প্রভুকোসো তাংসা আদর, সন্মান, সে, অধিকার শুরুসোহা নেচোইপা আসা নোইস্যাতা চোইপা হাত্রংদো জিংকো। আমেন।
The Seed Company