য়হুন্না13
1নিস্তার মানক্যা দেয়োংদাংতেমি নিমি। ইশুহা বাসিমতি হুইতেমসা আপাকোতা হোকো সময় দেয়োংদাংতেও তাওয়া নুওয়াং আকুহা গেমি নিমি। আকুহা বাসিমতিতা নিওয়া আপনিকো য়োংতোংবিহিং হাত্রংদো জেজেংপা জোচাংমি আসা আকুহা আবিহিংয়া নোইস্যাকো দিন চোইপা জেজেংপা জোয়ো।2ইশুহা আপনিকো য়োংতোংবিহিংপা জিরুংহা আমা চাদিংমি। আত্রং জেসাংহা সিমোনকো চেংওয়া য়হুদা ইস্করিয়োতকো তুংসিংতা ইশুহিং প্যইপাকো নোচেং নাগাইসোরাং ওয়্যাপুমতেমি নিমি।3সেংজাহা তাংসা অধিকার পিচামি নিও তাওয়া ইশুহা গেমি নিমি, আসা সেংজাকোসো লেমসা ন্যাসারাং সেংজাকোতারাং লাকাদাংয়ো তাওয়া নুওয়াংরে আকুহা গেমি নিমি।4আকু নোমসারাং ইশুহা চাদিংওয়াসো লোয়ে আসা জুপাকো বাইরে কাটুকো আংদুং লুমসা ইচো কেইনুংতা গামচারি মেরোইয়ে।5আকো নোইতা আকুহা য়োতিতা তি ওয়্যামসা য়োংতোংবিকো কোকোই দুমসা কেইনুংতা মেরোইওয়া গামচারিসো প্যায়ে।6ইশু সিমোন পত্রসকো কোকোই দুকো লেপানুওয়া পত্রসহা জাংয়ে, “প্রভু, নাতিহা কুং কোকোই দুদাংমগা?”7ইশুহা আকুহিংয়া জাংয়ে, “নেহা কা হাং জোদাংমে, নাতিহা মেগেরোওয়া। আদো নোইতা নাতিহা কোইরোওয়া।”8পত্রসহা জাংয়ে, “নাতিহা হাত্রংরে কুং কোকোইহা দুমতুরোওয়া!” ইশুহা জাংয়ে, “কাহা নাকো কোকোই মোদুনাহা নাতিহা কুং য়োংতোং জিংমক্যইরোওয়া।”9আত্রং সিমোন পত্রসহা জাংয়ে, “এপা বেনাহা প্রভু কুং কোকোই মেংচে মোকো, আদো খুই আসা পোরোরে দুপি।”10ইশুহা জাংয়ে, “তি হুপুনতেওয়া দিংঙাহিংয়া কোকোই ল্যামসা হাইরে দুমঘ্যইমগা, হাংপাতানাহা আকো জুপাহা চোসোপারাং নিও। নাবিহা চোসোপা জিংপুনতেও, আদো তাংসাহা মাজিংয়াংতো।”11হাংপাতানাহা আকুহা আপনিহিং প্যইপাপুদাংতেনা তাওয়া নুওয়াংহা সিদা চ্যইমি নিমি। আকো সোতা আকুহা নাবি তাংসা চোসোপা মাজিংয়াংতো তামসা জাংমি নিমি।12য়োংতোংবিকো কোকোই দুপুনতেনুকো নোইতাহা ইশুহা আংদুং লুউচায়ে আসা ন্যাসারাং গায়ে, আসা গাপুনতেনুকো নোইতাহা জাংয়ে, “কাহা হাং জোমে, নাবিহা কোইংগা?13নাবিহা কাহিংয়া উটকেওয়া আসা প্রভু তামগা, ই নুওয়াংহা আজিপ্পারাংগা, হাংপাতানাহা কাহা আকুরাংগা।14আদো কামি উটকেওয়া আসা প্রভু জিংমসারে নাবিকো কোকোই দুনাহা নাবিরে ইচোহা দোসরাকো কোকোই দুনেরোওয়া।15কুং জোমি ত্যাবাপা নাবিরে জো তামসারাং কাহা এপা জোমসা তিংপামগা।16আজিপ্পারাং কা নাবিহিং জাংরোওয়া, গিরিরোমা ডেইয়া টেবো মাজিংমগা আসা দেরেং কাইপুওয়ারোমা দেরেং সাওয়া টেবো মোকো।17নেহা নাবিহা ই নুওয়াং কোইমসা আকু ত্যাবাপারাং জোনাহা নাবিরে আশিষ জিংরোওয়া।”18আকো নোইতা ইশুহা জাংয়ে, “কাহা নাবি তাংসাকো তোইতা জাংওয়া মোকোমগা। কুং জেংওয়াবিহিংয়া কা নাইমগা। আদো কাহিংপা কোব্রেং চাওয়া দিংঙাহা কাহিংনাং মোসোংপা জোওয়া জিংপুরোওয়া তামসা তাংজিকো হিগাতা লাওয়া নুওয়াং তাংসা জিংনেরোওয়া।19ই নুওয়াং জিংওয়ারোমা নাগাইসোরাং নাবিহিং জাংমি নিও, আকো সোতা ই নুওয়াং জিংনুওয়া কারাং সেংজাকো নিংপুওয়া জাইপু খ্রীষ্টগা তামসা দেং।20আজিপ্পারাং কা নাবিহিং জাংরোওয়া, কুং নিংপুওয়াহিং লেই তাওয়াহা কাহিং লেই তারোওয়া, আসা কাহিং লেই তাওয়াহা কাহিং নিংপুওয়াহিং লেই তারোওয়া।”21এসে জাংপুনতেনুকো নোইতাহা ইশুহা তুংসিং চিচাপুমসা জাংয়ে, “আজিপ্পারাং কা নাবিহিং জাংরোওয়া, নাবিকো প্যাকোসোরাং ইচোহা কাহিং প্যইপাপুরোওয়া।”22ইশুহা ই নুওয়াং হাংসুকো তোইতা জাংমে তামসা য়োংতোংবিহা মোকোইমসা ইচোহা ইচোকো তোইতা ন্যইসুয়ে।23ইশুকো জেজেংপা জোওয়া য়োংতোংহা আকো আবেইতা ব্যামসা গাদিংওয়া নিমি।24সিমোন পত্রসহা আকুহিং লাবে চামসা জাংয়ে, “উইকেওয়া, আকুহা ই নুওয়াংহা হাংসুকো নুওয়াং জাংমগা?”25আকো সোতা আকু য়োংতোংহা ইশুকো তুংসিংতা ব্যামসা উইয়ে, “প্রভু, আকুহা হাংসুগা?”26ইশুহা জাংয়ে, “কোব্রেং বুমসা কা হাংসুহিং পিচা, কুং জাংওয়া দিংঙাহা আকুরাংগা।” আসা ইশুহা কোব্রেংকো চোংব্রা বুমসা সিমোন ইস্করিয়োতকো চেংওয়া য়হুদাহিং পিচায়ে।27আকু কোব্রেং য়ুনতানি য়হুদাকোতা শয়তান হোপুয়ে। আত্রং ইশুহা আকুহিংয়া জাংয়ে, “নাতিহা হাং জোদাংমে, সেন্নেপা জোপুই।”28আদো ইশুহা আকুহিংয়া ই নুওয়াং হাংপা জাংমে, আউতা গামসা চাদিংওয়াবিহা হাংসুরে হাইরে মোকোইতো।29হাংপাতানাহা লেরাহা এপা নোয়ে, য়হুদাহিংপাহা ন্যাস্যা এওয়া পেকুওয়া নিও, আকো সোতা ইশুহা আকুহিংয়া মানক্যাকো সোতা ঘ্যইওয়া সোংসাবি চোইকো, মোকোনাহা আকুহা জোরোংবিহিং হাইক্রি পিচাকো তামসা জাংসুমগা।30য়হুদাহা কোব্রেংকো চোংব্রা চাওয়া তোইনতানি লোপুমসা বাইরে নোপুয়ে। আত্রংহা মারি মোপুনতেমি।31য়হুদা হ্যাপুনতেনুওয়া ইশুহা আপনিকো তোইতা এপা জাংয়ে, “দিংঙাকো চেংওয়াহিংয়া নেহা মহিমা জিংমি নিও আসা আকোসোহা সেংজাহা মহিমিত জিংমি নিও।32দিংঙাকো চেংওয়াকোতামি মহিমা জিংপুমি নিনাহা সেংজা আপনিরাং আকুহিংয়া মহিমা জোরোওয়া আসা সেংজাহা ই কামহা সেন্নেপা জোরোওয়া।33“ও কুং চেংবাই, কাহা ন্যাসারাং আম্যই চোইপা মেংচে নাবিহিংপা নিরোওয়া। নাবিহা কাহিং মোরোওয়া আসা কাহা য়হুদি ওয়ারাংপাবিহিং জাংমি ত্যাবাপা নাবিহিংনে জাংরোওয়া, হাংতা কা হোদাংমে, আউতা নাবিহা ওয়াংমক্যইরোওয়া।34নেহা কা নাবিহিংয়া ইচো চুবে লিংপাং পিচারোওয়া, নাবিহা ইচোহা ইচোহিং জেজেংপা জো। হেপা কা নাবিহিং জেজেংপা জোমে, এপারাং নাবিরে ইচোহা ইচোহিং জেজেংপা জো।35নাবিহা আপনি লারাই জেজেংপা জোসুনাহা নাবিহা কুং য়োংতোংগা, তামসা তাংসা দিংঙাবিহা নাইরোওয়া।”36পত্রসহা উইয়ে, “প্রভু, নাতিহা হাংতা হোদাংগা?”
ইশুহা জাংয়ে, “নেহা নাতিহা কুং হোওয়াতা কুং নুনুই কাহিং হুইপুমসা ওয়াংকো মোচুরোওয়া, আদো নোইতাহা নাতিহা চুরোওয়া।”37পত্রসহা উইয়ে, “প্রভু, কা নাতিহিংয়া হাংপা নেহা হুইপুমসা হোকো মোচুকোগা? কাহা নাকো সোতা সিকোরে চুরোওয়া।”38ইশুহা জাংয়ে, “আজিপ্পারাং নাতিহা কুং সোতা সিকোরে চুরোওয়া তামসা জাংমগা? কা নাতিহিংয়া আজিপ্পারাং জাংরোওয়া, জুকুং হাপকুং কেকা ওনুরোমা নাগাই নাতিহা কাহিংয়া সুংকোই চোইপা মানাইমি তামসা জাংরোওয়া!”
ইশুহা জাংয়ে, “নেহা নাতিহা কুং হোওয়াতা কুং নুনুই কাহিং হুইপুমসা ওয়াংকো মোচুরোওয়া, আদো নোইতাহা নাতিহা চুরোওয়া।”37পত্রসহা উইয়ে, “প্রভু, কা নাতিহিংয়া হাংপা নেহা হুইপুমসা হোকো মোচুকোগা? কাহা নাকো সোতা সিকোরে চুরোওয়া।”38ইশুহা জাংয়ে, “আজিপ্পারাং নাতিহা কুং সোতা সিকোরে চুরোওয়া তামসা জাংমগা? কা নাতিহিংয়া আজিপ্পারাং জাংরোওয়া, জুকুং হাপকুং কেকা ওনুরোমা নাগাই নাতিহা কাহিংয়া সুংকোই চোইপা মানাইমি তামসা জাংরোওয়া!”
The Seed Company