প্রেরিত25
1পেস্তোসহা কইসোরিয়া দেয়োংওয়াকো সাসুংয়ু নোইতা য়রুশালেমতা হোয়ে।2আউতা নিনুওয়া মাটা পাউবি আসা য়হুদিবিকো ওয়ারাংপা দিংঙাবিহা আকুহিংয়া পাউলকো তোইতা মেংতাওয়া নুওয়াংবি হিংপায়ে,3আবিহা পেস্তোসকোতা পাউলহিং য়রুশালেম নিংপি তামসা জাংচায়ে, হাংপাতানাহা আবিহা পাউলহিংয়া ন্যাতাসো ওয়াংপাওয়া-ওয়াংপাওয়াতা স্যাকো কেংসুদিংমি।4আদো পেস্তোসহা আবিহিংয়া এপা জাংয়ে, “পাউলহিংয়া কইসোরিয়াতা সুংমসা এমি নিও আসা কারে সেন্নেপা হোদাংয়ে।5নাবিকো প্যাকোতাহা ইচো নিহসো কাহিংপা মাটাবি হোকো কেংদানাহা কাহিংপা নিংপি। পাউলমি হাইক্রি মেংতাওয়া জোমি নিনাহা আবিহা আউতারাং জাংকো চুরোওয়া।”6সায়্যাইয়ু ত্যায়ু চোইপা য়রুশালেমতা য়ুংপুনতেনুওয়া পেস্তোসহা কইসোরিয়াতা লায়োংয়ে। ইচো নিহসো য়হুদিকো ওয়ারাংপাবিরে আউতা হোয়ে। আকো জুকুংহা আকুহা ন্যায় জোওয়াতা গামসা পাউলহিং পারাকো তামসা জাংয়ে।7পাউল দেয়োংতেনুকো নোইতাহা য়রুশালেমসো লেওয়া য়হুদি ওয়ারাংপাবিহা আকো হুরাপা জাসুমসা কোওয়া-মোকোওয়া দোষ চুউসুয়ে। আদো আবিকো চুউওয়া দোষবিহা আজিপ্পারাংগা তামসা তিংপামক্যইতো।8পাউলহা আবিহিং জাংয়ে, “কাহা য়হুদি লিংপাংকো হিগাকো তোইতা না দেমসাকো তোইতা না রোমি টেবো জাইপুকো তোইতা মেংতাওয়া কাম জমি নিংগা।”9য়হুদি মাটাবিহিং গাগ্রুপাকো নোমসা পেস্তোসহা পাউলহিং জাংয়ে, “কা নাতিহিংয়া য়রুশালেম নিংপুরোওয়া আসা ই নুওয়াংকো তোইতাহা কা নাকো ন্যায়হা আউতারাং জোরোওয়া, মুতুকোগা?”10আদো পাউলহা জাংয়ে, “কা রোমি টেবো জাইপুকো ন্যায় জোওয়াকো নাগাই জাদিংমি নিও। ইতারাং কুং ন্যায় জিংনেরোওয়া। কাহা য়হুদিবিকো তোইতা হাইরে মেংতাপা কাম মোজোয়াংতো তামসা নাতিরে গেমি নিও।11“কাবেমি মেংতাপা কাম জোমি নিনাহা আসা সিনেকো বেপা মেংতাওয়া কাম কামি জোসুনাহা কা সিকোরে তৈয়ার নিও। আদো য়হুদিবিকো চুউসুওয়া দোষবি অ্যাজ্যাপা বেনাহা কাহিংয়া আবিকো খুইতা হাংসুরে স্যইমক্যই। কা রোমি তেবো জাইপুকো নাগাইতা জাংওয়া অধিকার য়াচারোওয়া।”12আত্রংহা পেস্তোসহা আপনিকো ওয়ারাংপা দিংঙাবিহিংপা হুইসুয়ে আসা পাউলহিং জাংয়ে, “নাতিহা টেবো জাইপুকোতারাং জাংরো তামসা জাংয়ো। আকো সোতা কা নাতিহিংয়া তেবো জাইপুকোতারাং নিংপুরোওয়া।”13সাইয়ু নিহয়ুকো নোইতাহা জাইপু অগ্রিপাস আসা আকো য়েমে বরনিকীহা পেস্তোসহিং অভিবাদন জোকো কইসোরিয়াতা লেহে।14আবিহা সাইয়ু নিহয়ু কইসোরিয়াতা য়ুংপুনতেনুওয়া পেস্তোসহা জাইপুহিংয়া পাউলকো নুওয়াং এপা জাংমসা হিংপায়ে, “ফেলিকস নিনুওয়া প্যইমসা এওয়া পাউল তাওয়া দিংঙা ইতা নিও।15কা য়রুশালেমতা হোনুওয়া য়হুদিবিকো মাটা পাউ আসা য়হুদি মাটা ওয়ারাংপাবি আকো তোইতা মেংতাপা দোষ তিংপামি নিমি আসা আকুহিংয়া দন্ড পিচানেরোওয়া তামসা জাংসুয়ে।16আদো কাহা আবিহিংয়া জাংয়ে, ‘দিংঙাকো দোষ মাতিংপানু চোইপা রোমি সরকারতাহা দন্ড পিচাওয়া লিংপাং মোতো। দোষ লাগাইওয়া দিংঙাহা দোষ তিংপাওয়াকো নাগাই আপনিকো নুওয়াংবি জাংচাকো মুংচানেরোওয়া।’17আবি ইতা ওয়াংপুনতেনুওয়া কাহা মোগোইপাপা আকো জুকুংহা পাউলহিং ন্যায় জোকো লাচি জাংওয়াতা পারাকো জাংয়ে।18আসা য়হুদিকো মাটাবিহা পাউলহিং মেংতাপা জোমসা আকুহিং দোষ তিংপাকো জায়ে, আদো কুং নোমেপা টেবো দোষহা হাইরে তিংপাকো মোচুতো।19আবিকো তাংজি আসা সিপুনতেওয়া ইশু তাওয়া দিংঙাকো তোইতা মেংচে আবিকোহা পাউলহিংপা স্যাসুওয়া নিমকোগুং। পাউলহা সিপুনতেওয়া ইশুহা ঙারোমি নিও তামসা মুজোই-ম্যারাই মুং।20ই নুওয়াংকো তোইতাহা কা হাইরে উই-জাংকোরে মাচুতো। এপা জিংপুনুওয়া আকুহিংয়া কাহা য়রুশালেমতা হোমসা নাকো ন্যায়হা আউতারাং জোকো তুকোগা, তামসা উইয়ে।21আদো আকুহা টেবো জাইপুকোসো ন্যায় মুংচাকো তাসমা জাংচায়ে, আকো সোতা কা সিজর টেবো জাইপুকোতা মানিংপুনু চোইপা আকুহিং এনতাপা একো তামসা জাংমি নিও।”22ই জাংওয়া হিংমসা অগ্রিপাসহা পেস্তোসহিং জাংয়ে, “কা আপনিরে আকো নুওয়াং হিংদাংপা তিংপে।”
পেস্তোসহা জাংয়ে, “জুকুংরাং নাতিহা হিংচামুংরোওয়া।”23আকো জুকুংহা অগ্রিপাস আসা বরনিকীহা আউতা আদরকো সাথতা লেহে। আবিহা সেনাপতি আসা শহরকো টেরবো টেরবো দিংঙাবিহিংপা জোংসুকো গাসুয়ে। পেস্তোস জাংপুনতেনুকো নোইতাহা পাউলহিং জোংসুওয়াকো নাগাইতা পারায়ে।24পেস্তোসহা জাংয়ে, “জাইপু অগ্রিপাস আসা ইতা নিওয়া তাংসা এনতাওয়া দিংঙাবাই, য়হুদিবিহা কুংতা লেমসা জাংরেওয়া ই দিংঙাহা ইরাংগা। ই দিংঙাহিং স্যানেরোওয়া তামসা তাংসা য়হুদিবিহা য়রুশালেমতা আসা ইতা কইসোরিয়াতারে জাংসুদিয়ে।25আদো কাহা ই দিংঙাকোতাহা সিনেকো বেপা দন্ড মুংনেওয়াহা হাইরে দোষ দোপামক্যইতো। আদো আকু আপনিরাং রোমি টেবো জাইপুকোতা বিনতি জোওয়াকো সোতা কাহা আকুহিংয়া রোম শহরতা নিংপুকো নোয়ে।26আদো কাহা টেবো জাইপু সিজরহিংয়া চিঠিতা হাং লানেকোমে তাওয়া কাহা মেগেতো। আকো সোতা কাহা ই দিংঙাহিংয়া নাবিকো নাগাই আসা নাতি জাইপু অগ্রিপাকো নাগাইতা পারামি নিও। নাবিহা ইহিং উইকো গেকো কেংপিনাহা কুং লাওয়া নুওয়াংতা কা সহায়তা মুংচাকোমে তামসা আশা জোমি নিও।27হাংপাতানাহা হাইক্রি দোষ মাতিংপাপা আউতা নিংপুকোহা কাহিংয়া এনতাপা মাজিংতো।”
পেস্তোসহা জাংয়ে, “জুকুংরাং নাতিহা হিংচামুংরোওয়া।”23আকো জুকুংহা অগ্রিপাস আসা বরনিকীহা আউতা আদরকো সাথতা লেহে। আবিহা সেনাপতি আসা শহরকো টেরবো টেরবো দিংঙাবিহিংপা জোংসুকো গাসুয়ে। পেস্তোস জাংপুনতেনুকো নোইতাহা পাউলহিং জোংসুওয়াকো নাগাইতা পারায়ে।24পেস্তোসহা জাংয়ে, “জাইপু অগ্রিপাস আসা ইতা নিওয়া তাংসা এনতাওয়া দিংঙাবাই, য়হুদিবিহা কুংতা লেমসা জাংরেওয়া ই দিংঙাহা ইরাংগা। ই দিংঙাহিং স্যানেরোওয়া তামসা তাংসা য়হুদিবিহা য়রুশালেমতা আসা ইতা কইসোরিয়াতারে জাংসুদিয়ে।25আদো কাহা ই দিংঙাকোতাহা সিনেকো বেপা দন্ড মুংনেওয়াহা হাইরে দোষ দোপামক্যইতো। আদো আকু আপনিরাং রোমি টেবো জাইপুকোতা বিনতি জোওয়াকো সোতা কাহা আকুহিংয়া রোম শহরতা নিংপুকো নোয়ে।26আদো কাহা টেবো জাইপু সিজরহিংয়া চিঠিতা হাং লানেকোমে তাওয়া কাহা মেগেতো। আকো সোতা কাহা ই দিংঙাহিংয়া নাবিকো নাগাই আসা নাতি জাইপু অগ্রিপাকো নাগাইতা পারামি নিও। নাবিহা ইহিং উইকো গেকো কেংপিনাহা কুং লাওয়া নুওয়াংতা কা সহায়তা মুংচাকোমে তামসা আশা জোমি নিও।27হাংপাতানাহা হাইক্রি দোষ মাতিংপাপা আউতা নিংপুকোহা কাহিংয়া এনতাপা মাজিংতো।”
The Seed Company