২ কোরোন্থি13
1কা নাবিকোতা সুংকোই চোইপা ওয়াংরোওয়া। “হাইক্রি দোষ নিনাহা নিহসো মোকোনাহা সুংচোকো গাওয়াইতা মেংচে ঠিক জিংমগা” তাওয়া তাংজিকো হিগাতা জাংমগা।2নিহকোই চোইপা কা ওয়াংনুওয়া পাপ জোমবি আসা দোসরা তাংসাহিংনে কাহা কোইপাওয়া নিমগা। নেহা ইসোরে কা নাবিহিংয়া আকু নুওয়াংরাং ন্যাসারাং কোইপারোওয়া। মেনা ন্যাসারাং কা ওয়াংনুওয়া নাগাই নাগাইকো পাপ জোমবি আসা দোসরা হাংসুহিংনে কা মাল্যা।3আত্রংহা খ্রীষ্টহা কাহিংপা জিংমসা য়্যইকোমে না মায়্যইকোমে, নাবিকো মোওয়া প্রমাণহা দোকোরে দোরোওয়া। নাবিকো প্যাকোতা কাম জোনুওয়া আকুহা কমজোর মোকো, আদো আকুহা সে নিওয়াগা,4হাংপাতানাহা আকুহা কমজোর জিংমসা ক্রুসতা থ্যইচপুয়ে, আদো সেংজাকো সেসো আকুহা ঙারোয়ে। কাবিরে আকু ত্যাবাপারাং কমজোর জিংপুমি নিও, আদো নাবিহিংপা কাবিকো ব্যবহারতা সেংজাকো সেসো কাবিহা আকুহিংপারাং বাচেরোওয়া।5নাবিকো দেংওয়াহা সাডুংপা নিমমে না মাতামমে, নাগাইহা আপনিহা আপনিহিং জাচেমসা কাং। ইশু খ্রীষ্টহা নাবিকো নাপোতা নিও তাওয়া সিদা মোচ্যইয়াংগা? য়দি এপা মোকোনাহা নাবিহা জাঁচতা অসফল জিংরোওয়া।6কা আশা জোরোওয়া, কি কাবিহা অসফল মাজিংয়াংতো তাওয়া নাবিহা সিদা চ্যইরোওয়া।7কাবিহা নাবি মেংতাওয়া কাম জোমগ্যইকো তামসা সেংজাকোতা পাচাইদিংয়ো। কাবিহা আপনিহিং এনতাপা তিংপাকো মোকো, আদো কাবিহা জাঁচতা অসফল জিংপুমি ত্যাবাপা তিংদো, নাবিহা এনতা এনতাওয়া কাম জোকো ছুকো তামসা কাবিহা পাচাইদিংয়ো,8হাংপাতানাহা কাবিহা আজিপ্পাকো কাটুতারাং কাম জোদিংয়ো, আদো আজিপ্পাকো বিরোধতাহা হাইরে জোমক্যইরোওয়া।9কাবিহা হাইরে জোকো মাছুওয়া কমজোর নিদো, আদো নাবিহা সাডুংপা নিওয়াতা কাবিহা গাগ্রুপারাং নিও, আসা নাবিহা সিদ্ধ জিংকো তামসা কাবিহা পাচাইকোরে পাচাইদিংয়ো।10নাবিহিংপা তানাং জিংপুনুকো সময়তা কা ই চিঠি লাদাংয়ো। তাকি কা আউতা ওয়াংনুওয়া প্রভুকো পিচাওয়া অধিকারহিংয়া কঠোর জিংমসা চালাইমঘ্যইকো। ইহা য়্যাকো সোতা মোকো, আদো বানাইকো সোতা পিচামগা।11নোইস্যাতা ডুওয়া এবাই আসা হুম্রিবাই, নেহা কা বিদ্যাই মুংকো। তুংসিং নাপোসোরাং সিদ্ধ জিংকো কোশিষ জো। কুং জাংচাওয়া হিং, ইচোহা ইচোকো জাংওয়া হিং, আসা তিমেপা য়ুং। তিমেপা আসা জেজেংপা জোওয়া সেংজাহা নাবিহিংপা য়ুংরোওয়া।12ইচোহা ইচোহিং জেজেংপা জোমসা অভিবাদন জো।13সেংজাকো তাংসা দিংঙাবিহা নাবিহিংয়া অভিবাদন কাইপুমি নিয়ো।14প্রভু ইশু খ্রীষ্টকো অনুগ্রহ, সেংজাকো জেজেংওয়া আসা পবিত্র লাংবেকো সংঙ্গতি নাবি তাংসাহিংপা নিকো।
The Seed Company