Nzabisili21
Yulu li linyatihi na toto yi nyatihi
1Titswene, me amoni yulu li linyatihi na toto yi nyatihi. Yulu latsomi na toto yatsomi byadimbili, na mubu kaka adimbili.2Na me amoni musyenge a ngidi, Yeruselemi yi nyatihi mu ukulamana, umata hu yulu huli Nzambi. Nde amiivangama we mukadi wu amiilwata bubwe mu tooni mulumi a nde.3Me anzuhi ndaha yi mifudi yi yaakamata hu kiti-ipfumu na yaakaleele: «Bunuubu, ngooto a ngidi ya Nzambi yika ŋa hati la baatu. Nde sa akwilala na bo, na bo sa baba mabuli ma nde, Nzambi nde mwakulu sa aba na bo. Nde sa aba Nzambi a bo.4Nde sa akombolo matsanga mu miisu ma bo. Lipfu a luubweba ve, tso lingebe, tso bililu, tso mapasi, mu tooni ati misamu myatsomi mi miidimbala.»5Muutu wu aba atsahala ŋa kiti-ipfumu aleeli: «Bunuubu me ndi mu utsa bisiha byosi bi binyatihi.» Titswene nde aleeli me: «Sonehe maniima, mu tooni ati mambu ma me mali mambuli na ma usiila hiitu.»6Nde aleeli me: «Bumiitswiha! Me ni Alafa na Omenga mbandihili na tsukusu. Wu li na peyu a mamba, me tsa pa nde mamba ma bungodu, ma mutswe a nzali wu ubaava moonyi.7Pasi muutu wu ubiinga, uyaka mukobe mo wuuna huli me. Me umba Nzambi a nde, na nde uba mwaana a me.8Ka huli ba baavele na ibahala, ba baavele na imiinu, bipumbulu, badubi, malaala, banga bungaanga, basambili ba binzanzambi na boosi banga mapfuta, la bo kabu sa liba hutso a dyanga la mbaahu li lili mu ululaha na la suufe: liina ni lipfu la moole.»Yeruselemi yi nyatihi
9Titswene, mumosi mu bapofi batsambu, ba baaba baakaanga mambungu matsambu ma maaba maaluula mu mapasi tsambu ma tsyelele, ayaleele me: «Yaanga, me tsa mweese we mukadi wu Mwana Limeme amiikwele.»10Pofi abiti me mu matwala ma Livupu ŋa yulu isyelo hiinene hi mutaabu. Na nde amweesi me musyenge a ngidi. Yeruselemi, wu aba mu ukulamana umata hu yulu huli Nzambi.11Yeruselemi yaakamwedeme mu muyusu a Nzambi. Liyalala la yo laaba we manya la talu. Manya la zape li mayangala we manya li mulingu.12Yo yaaba na ibaha hiinene na hi mutaabu. Yo yaaba na minywa mya nzo kuumi na myole. Bapofi kuumi na boole baakakeelese minywa mya nzo. Ŋa yulu minywa mya nzo, baaba baasonehe manduhi ma bibaandu bikuumi na byole bya baana ba Isereli:13Hwaba na minywa mya nzo pasi tsyelo: hu Esete mitatu, hu Noode mitatu, mitatu hu Sude, mitatu hu Wesete14Ibaha hi musyenge hyaba hyateleme ŋa yulu bibeene kuumi na byole. Ŋa yulu a byo baasonehe manduhi ma biluumbi kuumi na byole bya Mwana Limeme.15Pofi wu akayambili na me aba akaanga hyetso hi litsootso hya mu wolo, mu tooni uvolo hyetso hi musyenge, hi minywa mya nzo a nde na hi ibaha hya nde.16Matsyelo moosi mamana ma musyenge, maaba bula pila mosi. Bula bu musyenge aba tsiitsa na taha a nde. Pofi avoli hyetso hi musyenge mu litsootso la nde: bula bu musyenge bwosi bwaba, byetso biveeve kuumi na byole (12 000) bi basitade . Bula, na taha na mutaabu a nde, byaba pila mosi.17Nde ayehili kaka hyetso hi ibaha: kama maku mana na mana (144) ma hyetso hya mboŋonyo mu mutaabu, we bu hwaba hyetso hi pofi hakasalila.18Mumbu aba baatunga mu yasipe, na musyenge nde mwakulu aba mu wolo li laatsyeme, li libaamwedeme we mulingu.19Bibeene bi ibaha hi musyenge baaba baayolo byo mu mamanya ma talu, ma pila mu pila: ibeene hyatsomi aba mu manya la yasipe, hya byole hyaba mu manya la safiire, hi bitatu mu manya la angate, hi bina mu manya la emelode,20hi mutaanu mu manya la onise, hi musamunu mu manya la saledwani. Ibeene hya tsambu hyaba mu manya la kisolite, hya pwombo mu manya la belile, hi ipfwa mu manya la topase, hya kuumi mu manya la kisopase, hya kuumi na imosi mu manya la tukwase, na hya kuumi na byole mu manya la ametite.21Minywa mya nzo kuumi na myole myaba bilabu kuumi na byole. Pasi munywa a nzo aba baasa mu ilabu ndulu imosi. Litandala li musyenge laaba mu wolo li laatsyeme, ubaamwedeme we mulingu.22Me a hamoni nzo a Nzambi mutso musyenge mo wuuna ve, mu tooni ati, nzo a Nzambi musyenge, ni Pfumu, Nzambi Pungu matwala, na Mwana Limeme.23Musyenge a hali na nzala tso taangu ve, tso tsungi ve mu uyalusa nde. Muyusu a Nzambi ubaayalusa nde, na Mwana Limeme ni mwinda a musyenge mo wuuna.24Mabuli moosi sa mabaadyata mu liyalala la nde, na batumi baa toto sa babehe muyusu a bo huuna.25Minywa mya nzo mi musyenge sa mibaaba bwasi muyilala woosi. Mu tooni ati, butsuhu a buubweba ve.26Bo sa babita muyusu na butsitu bu mabuli moosi.27Ka isiha tso imosi hi hyasumaha a hyutwala ukoto mu musyenge mo wuuna ve. Muutu nga mavaanga ma nzododo na muutu nga mapfuta utwala ukoto kaka mu nde ve. Ka ndulu baatu ba baasonehe manduhi ma bo mu libuuku la moonyi li lili libuuku la Mwana Limeme, buukoto mu musyenge mo wuuna.Wycliffe Bible Translators, Inc.