Nzabisili20
Kondaayi a Saatana mu iveeve hi bilima
1Titswene, me amoni pofi mumosi mu ukulamana umata hu yulu. Nde aba akaanga tsaafi a mbeenge ya doheselee ŋa kaka na paanga yinene.2Nde akaangi Darango, taadi wu mukulu, nga nduhi mukuyi na Saatana, na nde ahadi nde mu iveeve hi bilima.3Pofi abwaahi nde hutso a mbeenge ya doheselee. Titswene, nde adibuhi yo mu tsaafi, na nde anyemi bwiingu ŋa yulu, mana Darango aveledungasa mabuli, natee bu iveeve hi bilima hyuvyoho. Hu mbisa iveeve hi bilima, baafwana unyangula Darango mu mwaana a taangu hoole.4Titswene, me amoni makiti ma ipfumu: ba baaba baatsahala ŋa yulu a mo, baayaki lituma li utsundasa. Me amoni kaka mivumu mya ba baadubi mu tooni imbangi hya bo mu Yisu na mu mambu ma Nzambi. Bo a baakundi ibulu ve, tso ifwita hya nde ve. A baakumi bo iliimbu ŋa libunzu tso ŋa kaka ve. Bo baabwefutaha moonyi na baabwetuma na Kristo mu iveeve hi bilima.5Baatu bakima ba baakwidi a baabwebaha moonyi ve, tehele iveeve hi bilima hifwa. Yiina ni tsuuhili yatsomi ya babaakwa.6Kinya huli ba bali mu ukoto mu tsuuhili yatsomi ya babaakwa! Bo bali bangidi, na lipfu la moole a lili na lituma ŋa yulu a bo ve. Ka bo sa baba bangaanga ba Nzambi baa bukaasalila Nzambi na Kristo. Na bo sa batuma na Kristo mu iveeve hi bilima.Mudiingu a tsyelele
7Bu iveeve hi bilima hyufwa, sa banyahula Saatana mu kondaayi.8Nde sa apala mu udungasa matsi ma mali mu Gog na Magog , ni ti bituungu bibina bya ŋa toto, mana bakuukaha bo mu mudiingu. Matsi mo sa malaha we musyeŋunyu mu muvanga a mubu.9Bo baatelimi mu toto yoosi, baadiingi itsaka hi hyaba baatu ba Nzambi na musyenge wu Nzambi hatondo. Ka mbaahu yaakulimini umata hu yulu na yaakudisi bo.10Na mukuyi wu akapfuta bo, sa baabwaha nde hutso a dyanga la mbaahu a suufe, hu hwamiitswamina ibulu na mumbihuli wu mapfuta. Huuna sa banyongese bo nyangu na butsuhu, mu bilima na bilima.Tsundusu ya tsyelele
11Titswene, me amoni kiti-ipfumu yinene yi fuuka, na wu aba atsahala ŋa yulu a yo. Toto na mayulu byatahuhi lala na hiinzi hya nde, na a baabwemono byo ve.12Titswene, me amoni babaakwa, bakuutu na bangebe, baateleme ŋa busu bwa kiti-ipfumu. Baadibuli mabuuku. Baabwedibula libuuku likima, ni libuuku la moonyi. Baatsundisi babaakwa mu mavaanga ma bo baasiidi, we bu baasonehe mutso mabuuku.13Mubu apalisi bamvumbi ba nde haaba na bo. Lipfu na tsi a babaakwa, bo kaka baapalisi babaakwa ba bo. Na baatsundisi bo boosi mu mavaanga ma bo baasiidi.14Lipfu na tsi a babaakwa baabwahi hutso a dyanga la mbaahu a suufe. Dyanga la mbaahu ni lipfu la moole.15Woosi wu baavelisonehe nduhi mu libuuku la moonyi, baabwahi nde hutso a dyanga la mbaahu.Wycliffe Bible Translators, Inc.