Nzabisili17
Lilaala li linene
1Ni mu buuna, mumosi ŋa hati li bapofi batsambu ba baaba baakaanga bikoombe tsambu ayaleele me: «Yaanga, na me tsa mweese we tsundusu yi yubwila lilaala li linene, liina li laatsahala ŋa yulu banzali ba banene.2Batumi baa toto baakoti mu ndyatili yi bulaala na nde. Na baatu ba ŋa toto baalaangi malamu ma bulaala bwa nde.»3Livupu laakaangi me na pofi abiti me hu kumu a nzala. Huuna me amoni mukaasu mumosi wu atsahala ŋa yulu ibulu imosi hi ibeenge, hi hyaba hyaluula mu manduhi ma utuha Nzambi. Ibulu mo hyaba na mitswe tsambu na matsyembo kuumi.4Mukaasu aba alwata bikutu bi bibeenge bya talu. Nde aba alwata kaka bilengele bi bilahi bya mu wolo, bya mu mamanya ma talu na bya mu bilabu. Nde aba akaanga ŋa kaka, mbungu mosi ya mu wolo, yi yaaba yaaluula mu mavaanga ma nde ma nzododo na mu mbiili a nde yi mbi.5Mu libunzu la nde aba baasonehe nduhi mosi ya tswehi. Mbinduli ni ti: «Babylooni, musyenge wu munene, ngu a malaala, ngu a mavaanga ma nzododo ŋa toto.»6Me amoni ti mukaasu mo wuuna aba alaanga makila ma baatu ba ngidi na makila ma bambangi baa Yisu. Bu me amoni nde, me akimuhi huulahi.7Buuna pofi akaleele me: Mu hima we li mu ukimuha? Me tsa nzabisa we tswehi a mukaasu mo wunuwu, na ma ibulu hi hili mu ubaabita nde. Ibulu hi hili na mitswe tsambu na matsyembo kuumi.8Ibulu hi we amoni, hyaba moonyi hutsomi, ka bunuubu, hyo a hisaali moonyi ve. Hyo sa hipala hutso a mbeenge ya doheselee mu uyene hu unyambana. Baatu ba ŋa toto ba baavelesonehe manduhi mu libuuku la moonyi, umata pangili a toto, sa bakimuha ŋa bo buumono ibulu. Mu tooni ati, hyo hyaba moonyi hutsomi na hyo a hisaali moonyi ve. Ka hyo sa hibwemonehele.9Ŋaniiŋa, muutu afwana uba na buyedi na tsikihili. Mitswe mitsambu ni bisyelo tsambu bi mukaasu hatsahala ŋa yulu a byo. Myo kaka ni batumi tsambu.10Bataanu mu bo baamiibwa. Wu musamunu kini mu utuma buunuubu. Mutumi wu mutsambu kini a hamaya ve. Ka mu taangu yi nde huuya, nde sa adiinga ndulu mu mwaana taangu hole.11Ibulu hi hyaba moonyi hutsomi, na a hyasaala moonyi ve, hyo hili hyo mwakulu mutumi wu mupwombo. Ni hyo kaka hili mumosi mu batumi batsambu, na hyo hili mu uyene hu unyambana.12«Matsyembo makuumi ma we amoni, mali batumi kuumi ba bakini a baabandihi utuma ve. Ka bo sa bayaka matwala ma utuma na ibulu mu ngunga mosi.13Bo boosi bakuumi bali na matsimi mamosi: usalila matwala na lituma bya bo hu tsina a tumili ibulu.14Bo sa balwanisa Mwana Limeme. Ka Mwana Limeme sa abiingala bo mu tooni ati, nde ni Pfumu bapfumu, na Mutumi batumi. Nde ubiingala itwadi na ba nde hateele na ba nde hasoolo, ba bali ngetetee mu nde.»15Pofi aleeli me: «Mamba ma we moni maana, ŋa hwatsahala lilaala, ni mabuli, makonge, matsi na mandaha.16Matsyembo makuumi ma we moni maana na ibulu sa babelele lilaala. Bo sa bapatula lo bisiha byosi bi lo lili na byo na usiisa lo pene. Bo sa badya musunya a lilaala na utsuha lo loosi hu mbaahu.17Mu tooni ati, Nzambi asuusi mutso mitima mya bo litondo li utswihasa tsimi a nde. Bo sa bavanga buuna mu itwadi mu usuusa lituma li ipfumu hya bo hu tsina a tumili ibulu, natee bu mambu ma Nzambi mu utswiha.18Buuna, mukaasu wu we amoni wuuna ni musyenge wu munene wu li mu utuma batumi baa toto.»Wycliffe Bible Translators, Inc.