Bahebeleho2
Liyobolo li laafulala bunene
1Ni mu buuna, bisu laafwana usinzakangama mu ndongisili yi bisu laayuhi, mana bisu liveledunga.2Mu tooni ati, tsaangu yi bapofi baabehili bisu hu tsikulu, yimiimweese tsoongo a yo. Na pasi nde wu apenyi yo, buuve wu avelisiingala yo, ayaki tsyembili yi yaahwama na nde.3Buuna, buni bisu mwakulu luutwala upeke tsyembili, tso bisu lipenyi liyobolo la pila mo yiniiyi? Pfumu nde mwakulu ateehili uyabisa lo, titswene ba baayuhi Pfumu, baasilisi bisu tsoongo a lo.4Nzila mosi, Nzambi asilisi imbangi hya bo mu biliimbu bya kimuhili na bimangu na bipadi bya pila mu pila, naapa mu bungodu bu Livupu la Ngidi li nde haakabili we bu hu li litondo la nde.Nde wuuna wu li mu ubita baatu hu liyobolo
5Nzambi a haasuusi tsi yi yuuya, yi lili mu uyambila mu yo, hu tsina lituma li bapofi ve.6Mu mbuli, mu Mabasonehe ma Ngidi, muutu mumosi atiidi imbangi mo hiniihi:«Muutu hima ali,mana we yibuhala moonyi mu nde,mwana a muutu hima ali,mana we taasila nde?7We akulimisi nde hoole hu tsina bapofi,we afuungili nde mu muyusu na mu likiinzu,8we asuusi bisiha byosi hu tsina lituma la nde.»Tso Nzambi asuusi bisiha byosi hu tsina lituma la nde, mbindulili ti nde a haasiisi isiha tso imosi hi hyaavele hu tsina lituma la nde ve. Ka bunuubu, bisu kini a laamaamono ti bisiha byosi biba hu tsina lituma la muutu ve.9Ka ma bisu lili mu umono ni maniima: Yisu baakulimisi hoole hu tsina lituma li bapofi, mana mu hyese hya Nzambi, nde akwa mu tooni a baatu boosi. Na bunuubu, bisu lili mu umono nde baafuungala mu muyusu na mu likiinzu, mu tooni lipfu li nde haamoni pasi.10Mu mbuli, hwaba hwayelemene ti Nzambi, muvaangi na mukeelisi bisiha byosi, asyenolo Yisu hu kuhisili mu nzila yi mapasi. Mana baana ba balahi bakoto mu muyusu a nde. Mu tooni ati, Yisu ni watsomi mu ubita bo hu liyobolo.11Ka Yisu wu ubaatsyemese masumu ma baatu boosi, na boosi ba bamiitsyeme, bali na Taata mumosi. Ni mu buuna, Yisu a hali na tsonyi mu uteele bo baana ba ngu a nde na bakedi ba nde ve.12Mu mbuli, nde li mu uleele:«Nzambi a me, me toondi uyabisa nduhi a wehuli baana ba ngu na bakedi ba me,me toondi uyuusa we,ŋa kuungi la baatu.»13Nde abweleele:«Me utsa hiitu hya me mu Nzambi.»Titswene:«Me ndyowunuuwu, na baana ba Nzambi haava me.»14Ka bu baana mo bali bivaangu bi musunya na bi makila, Yisu nde mwakulu miikituha we bo. Nde adyati itwadi na bo, mana mu lipfu la nde, nde atwala uhesolo Saatana wu akaanga matwala ma lipfu,15na uyobolo boosi ba boomo bu lipfu bwakakitusa we baviha mu idiingu hya bo hyoosi.16Mu mbuli, a mu uyaakumbasa bapofi ve, ka mu uyaakumbasa imbisa hya Abrahami.17Ni mu buuna, hwafwani ti nde akituha ifwafwani hya baana ba ngu na bakedi ba nde, mana nde aba mukuutu bangaanga ba Nzambi a bo, wu aluula mu kwili lingebe na wa ngetetee mu isalu hya Nzambi, mu tooni ufwinzala masumu ma baatu.18Na bunuubu, nde utwala ufuuhasa baatu ba bali mu uyebe, mu tooni ati, nde mwakulu avyohili mu iteesi hya nzyebili na hi mapasi.Wycliffe Bible Translators, Inc.