1 Koliito13
Ndongisili mu litondo
1Tso me ndi mu utsuha mandaha ma baatu na ma bapofi, me upele na litondo, me a handi na tsoongo ve. Me apfwanina na kulambeete buuve binzanza bi bili mu usa kele.2Tso me ndi na bungodu bu ubihula, buuve bwa nzaabili yoosi, na utsikaha matswehi moosi, na tso me ndi na imiinu hi usobo bisyelo mambuha, ka tso me peli na litondo, me a handi na tsoongo ve!3Tso me kabili bya me byosi huli bapuumbu, tso me nzyehuli nyutu a me mana batsuha yo, ka me upele na litondo, maana moosi a mali na kaluha huli me ve.4Litondo lili na mukami, lo lili na bulembo, lo nyengi ve, lo nyeme ve, na lo a libaasaha umonehele ve.5Litondo a libaasa mambu ma tsonyi ve, lo nyinga ve, lo a libaakwakesi ve na lo a libaakaanga piinga ve.6Litondo a libaamono kinya mu mavaanga ma mabi ve, ka lo libaamono kinya mu mambu ma imbuli.7Litondo libaakunda moosi. Mu pasi dyambu, lo libaaba na imiinu, na hiitu, na mukonono.8Litondo libaakwilala mu bilima na bilima. Ubihula sa hufwa hu busu, bungodu bu utoyo mandaha ma pila mu pila sa bufwa, na nzaabili sa yidimbala.9Mu mbuli, nzaabili a bisu a yili yi yaakuha ve, na mbihulili a bisu yili yi kusi.10Ka bu tangu a bibyasupahana yiuya, bi byavelekuha sa bidimbala.11Ŋa me amba mwana a ngebe, me akatoyo we mwana a ngebe, me akatsima we mwana a ngebe, me akatsikaha misamu we mwana a ngebe. Ka bu me ka mukuutu, me miitiimba byosi bi bungebe.12Mu tangu mo yiniiyi, bisu lili mu umono ndulu isisi hya fifila, hya we hi limwenu li likulu, ka bisu sa limono hiinzi mu hiinzi. Mu tangu mo yiniiyi, me anzaaba ndulu bu hwavelekuha. Ka me tsanzaaba Nzambi we bu hwakuha, ni bumosi, we bu nde mwakulu haayaaba me.13Bunuubu, bisiha mo bi bitatu biniibi byukwilala: imiinu, hiitu na litondo. Ka hi hyafulala bunene mu bi bitatu, ni litondo.Wycliffe Bible Translators, Inc.