1 Koliito12
Bungodu bu Livupu la Ngidi
1Bunuubu, baana ba ngu, liyambilaani mu ma mali mu tala bungodu bu Livupu. Me tondi ti benu liyaaba imbuli mu tooni a bwo.2Benu liyaabi ti, ŋa benu laaba kini bangoyi, benu laabwidi mu linyungi li bifwita bi byaveletoyo. Benu a laakatwala ubisala byo ve.3Ni mu buuna, me ndi mu utsilasa benu lo. A hu li na muutu ve, wu Livupu la Nzambi libaatuma, wu utwala ufulaha ti: «Yisu aba wu baasinga!» Na a hu li na muutu wu utwala mu uleele ti: «Yisu li Pfumu», tso Livupu la Ngidi a lili mu usala mu nde ve.4Hu li na bungodu bwa pila mu pila, ka Livupu ni lo limosi libaava bwo.5Hu li na bisalili bya pila mu pila, ka Pfumu ni nde mumosi bubaasalila.6Hu li na bisalu bya pila mu pila, ka Nzambi ni nde mumosi li mu uva matwala huli baatu boosi mu uvaanga byosi.7Mu pasi muutu, Livupu la Ngidi libaamonehele mu bungodu bwa muutu-muutu, mu tooni libwe la baatu boosi.8Huli muutu mumosi, Livupu libaava bungodu bu ubaatoyo na tsiki. Huli mukima, Livupu ni lo limosi libaava bungodu bu ubaatoyo na nzaabili.9Livupu ndulu ni lo limosi libaava imiinu hya kimuhili huli muutu mumosi, na matwala ma ubeeloso babeedu huli muutu mukima.10Livupu libaava huli muutu mumosi matwala ma ubaavaanga bipadi, huli mukima matwala ma ubaabihula, huli mukima matwala ma ubaasa lisobosono ŋa hati li mavupu ma mapfuta na Livupu la mbuli. Huli mumosi, lo libaava matwala ma ubaatsuha mu mandaha ma pila mu pila. Huli mukima, matwala ma ubaabindula mandaha mo maana.11Livupu ndulu ni limosi libaavaanga maana moosi. Lo libaava huli pasi muutu bungodu bukima we bu lo libaatondo.Libundu lili we nyutu yi yili na binama bi bilahi
12Eeye, Kristo afwanina na nyutu yi yili na binama bi bilahi. Tso bu binama mo biina bili bi bilahi, byo byapfuutana ndulu mu nyutu mosi.13Ni mu buuna, tso hu li Bayudaayo, Bangeleke, baviha, buuve ba bali bunyanga, bisu boosi baatondihi itwadi, mana lituunga nyutu mosi. Mu Livupu la Ngidi ndulu ni lo limosi, bisu boosi laanywidi mu idiinga hya lo.14Mu tooni ati, nyutu abaavaanga mu inama imosi ve, ka mu binama bi bilahi.15Tso huulu huleeli: «Me a handi kaka ve, buuna me a handi mu nyutu ve». Ka liyaabi ti huulu utwala ubisa uba inama hya nyutu ve.16Na tso tswi lileeli: «Me a handi diisu ve, buuna me a handi mu nyutu ve», lo a luutwala ubisa uba inama hya nyutu ve.17Tso nyutu yoosi yaakiiba diisu, buni baatu baakiibaayuha kele? Tso yo yoosi yaakiiba ndulu tswi, buni baatu baakiibaayuha tsulu?18Mu mbuli, Nzambi asuusi pasi inama mu nyutu we bu nde haatondi.19Tso inama hyakiiba ndulu imosi, a hwakiiba na tsoongo ve. Mu tooni ati, nyutu a yaakiiba ve!20Eeye, binama bili bi bilahi, ka nyutu yili ndulu mosi.21Diisu utwala uleele huli kaka ve ti: «Me a handi na nzala a we ve!» Na, mutswe utwala uleele huli miilu ve ti: «Me a handi na nzala a benu ve!»22Homo, binama bya nyutu bi byafulala ukolo tso biveli, nyutu yoosi ukwa.23Na bi bisu libaapenye, bisu libaakiinza byo ufulala binama bikima. Binama bi laavelefwana usyenolo, bisu bibaava byo likiinzu li laafulala.24Buuna, binama bi bisu libaapenye, libaafula ukiinza byo. Nzambi haavaanga buuna, mana babaasinzayuusa binama bi byavele na tsoongo.25Buuna, makabu maveleba mu nyutu, ka binama bya nyutu bili tsiitsa na bibaakumbasana.26Na tso inama imosi hili mu pasi, binama bina byosi bili mu pasi na hyo. Tso inama imosi hiyaki likiinzu, binama bina byosi bili mu kinya na hyo.27Benu lili nyutu a Kristo: pasi nde mu benu li inama hya nyutu a nde.28Ni mu buuna, mu libundu, Nzambi asuusi hati a tsomi biluumbi, hwa moole mimbihuli, hu matatu milongisi. Titswene hu li na bungodu bu usa bipadi, bungodu bu ubeeloso babeedu, bungodu bu ukumbasa, bu ubaatuma, bu utsuha mandaha ma pila mu pila.29Boosi a bali biluumbi ve, buuve mimbihuli, buuve milongisi. Boosi a bali na bungodu bu ubaavaanga bipadi ve,30buuve bu ubaabeeloso babeedu, buuve bu utsuha mandaha ma pila mu pila, tso bu ubaabindula mandaha mo maana.31Ni mu buuna, benu laafwana usaha ubaha bungodu bu bwafulala tsoongo. Bunuubu, me tsambwemweese benu nzila yi yaafulala bubwe.Wycliffe Bible Translators, Inc.