BaHebburu12
1Nkikaako, mbukunga tuzyungulukidwe ajoba pati lyabakamboni, aswebo ngatusowe mukuli woonse, achibi chikkala kachili afwiifwi, alimwi atuchijaane akukakatila mwindilano ubikkidwe kunembo lyesu,2katulangide kuli Jesu ngutalika awumaninizya kabotu walusyomo lwesu, ooyo nkaambo kalukondo lwakabikkwa kunembo lyakwe wakakakatila achiingano, katakwe bweme pe, alimwi ulikkede kuluboko lwakululyo lwachuuno chaLeza.3Kamumuyeeya ooyo wakakakatila kuzwa kuli basizibi kupenzegwa kuliboobo atala anguwe, kuchitila kuti mutamani nguzu nikuba kutyompwa.4Mukukataazika kwanu atala achibi tamunakakatila pe mane kuyooosika akutilwa kwabulowa bwanu.5Alimwi mwaluba kalena ijwi lyaamba kuti muli mbuli bana balombe?“Mwanaangu, utawubansyi lulayo lwaMwami,nikuba kusweekelwa kusungwala naa wapegwa chisubulo anguwe.6Nkaambo Mwami ulamulaya ooyo ngwayanda,alimwi ulapa chisubulo kumwana woonse ooyo ngwatambula.”7Nkukululamikwa ooko nkumweelede kukakatila. Leza umubweza mbuli bana; nkaambo mwana ulibiyeni ooyo wisi ngwatalayi pe?8Kuti mwachaala kamutalayidwe pe, munzila bamwi boonse mubakayinda, eelyo tamweesi bana loko pe bakuzyala.9Kunze kwacheechi, twakali abamataata besu bamunyika kuti batulaye alimwi twakabalemeka. Tatweeledena kulibombya kapati kuli Taata wamyuuya mpawo tupone?10Nkaambo bakatulaya kwachiindi chiniini biyo mukuyanda kwabo, pesi ulatulaya mububotu bwesu, kuti tukakonzye kwaabilana busalali bwakwe.11Nkaambo chiindi choonse kulayigwa kulangika kakuchisa kwiinda kubotezya; muchiindi kulazyala muchelo waluumuno wabusalali kulibaabo bakayiisigwa andulo.12Nkikaako ngamunyampule maboko aanu aayo alengelede mpawo moolole mazwi aanu akompeme,13alimwi mululamike inzila zyamawulu aanu, kuchitila kuti eecho chilebukide chitadyunkuki kuzwa kuchisiko, pesi kuti chipone.14Amuzuzaanine luumuno abantu boonse, akupona buumi busalala nkaambo taakwe uyoobona Mwami katakwe buumi oobo.15Amubone kuti taakwe pe uyookachilwa kujana luzyalo lwaLeza; oolo lutakwe “muyanda ulula” usyuuka akweeta penzi, alimwi anguwo bayiingi balasofwala;16kuti kutabi naba umwi uba sibwaamu nikuba utakwe bunaLeza mbuli Isawu, ooyo wakawuzya lukono lwabupati bwakwe nkaambo kakulya chimwi.17Nkaambo mulizi kuti nikwakayinda, naakayanda kuti akone chilongezyo, wakakakwa, nkaambo taakajana chiindi chakusanduka pe, nikuba kuti wakachiyanduula amisozi.18Nkaambo teemwakaza kuli eecho chijatika pe, mulilo uyaka, amudima, akusiya aluwo,19akulila kwamweembo ajwi eelyo lili amabala akachita kuti basikuswiilizya bakumbile kuti kutabi ijwi lichaambwa lubo kulimbabo.20Nkaambo teebakachili kukakatila pe kumalayilile aayo ngibakapegwa, “Kuti nikuba munyama waguma chilundu, uyoodonkolwa.”21Nichoonzyo, bwakalikuyoosya busena Mozesi mbwakali kwaamba kuti, “Ndakaankama akuyoowa.”22Pesi mwaza kuChilundu chaZiyoni akuchisi chaLeza upona, Jerusalemu wakujulu, akubaangelo bayingi babungene mupobwe,23alimwi akumbungano yabataanzi kukuzyala kwabo balembedwe kujulu, akumubetesi uliLeza waboonse akumyuuya yabantu basalali bakalulamikwa,24akuli Jesu, sikwimaakati wachizuminano chipya, akubulowa busansiilwa bwambuula luzyalo lupati kwiinda bulowa bwaAbbelo.25Amubone kuti tamumukaki pe ooyo uliikwambuula. Nkaambo kuti teebakachija pe nibakamukaka ooyo wakabachenjezya anyika, buche biyo mbutiyoochija naa twamukaka ooyo uchenjezya kuzwa kujulu.26Ijwi lyakwe eelyo lyakazunganiya inyika; pesi lino wasyomezya kati, “Kakuli tandikwe kuyoozunganiya nyika luzutu pe pesi alubo ajulu.”27Eechi chaambyo, “Kakuli lubo,” chitondezya kugwisigwa kwacheecho chakazunganisigwa, mbuli eecho chakachitwa, kuchitila kuti eecho chitakonzyi kuzunganisigwa chichaale.28Nkikaako mbukunga twakatambula bwami atube akulumba ooko kutakwe kuyozunganisigwa pe, alimwi atupe kuli Leza bukombi butambulika, akulemeka akuyoowa;29nkaambo Leza wesu mulilo unyonyoona.
The Word for the World International