1 Pita4
1Nkikaako mbukunga Kkirisitu wakapenzegwa mumubili, ngamube amuyeeyo uliboobo alanu, nkaambo kufumbwa upenzegwa mumubili tachili muchibi pe,2kuchitila kuti bakapone kwachiindi choonse mumubili kutali aziyandisyo zyamubili pe pesi akuyanda kwaLeza.3Amuleke chiindi eecho chakayinda chijinke chakuchita eezyo batazi Leza nzibachita, kabapona muzisusi, busofwazi, bukolwi, bwaanka, mapobwe ataluleme, akukomba mizimu munzila zisesemya.4Baliikugamba kuti lino tamuchili aamwi pe mukupona kwabo mubuumi bwabo oobo butaluleme, mpawo bamujata bubi,5pesi bayoovwila kuli ooyo ulibambilide kuyoobeteka bawumi abafu.6Nkaambo nchiichicho ijwi nchilyakakambawukwa nikuba kubafu, nikuba kuti babetekwa mumubili mbuli bantu, ngabayoopona mumuuya mbuli Leza.7Nkikaako mamanino azintu zyoonse ali afwiifwi, ngamuchenjele alimwi mubatame ankaambo kankombyo zyanu.8Atala azyoonse ngamujatisye chakutakatala luyando lwanu kuli umwi awumwi, mbukunga luyando luvumba zibi zyiingi.9Ngamuchitilane kabotu kakutakwe kunyontooka kuli umwi awumwi.10Mbuli awumwi mbwakatambula chipo, ngamubelesezyane mububotu kuli umwi awumwi, mbuli babanzi babotu baluzyalo lusiyenesiyene lwaLeza.11Kufumbwa waambula, abe mbuli umwi waambula majwi aLeza, kufumbwa ukutawuka mulimu, ngabe mbuli umwi ukutawuka anguzu zizwa kuliLeza, kuchitila kuti mulizyoonse Leza alumbayizigwe mukwiinda muli Jesu Kkirisitu. Kulinguwe bulemu abweendelezi bwalyoonse alyoonse. Ameni.12Nimuyandwa, mutagambwi kumasukusyo ayoosya aza kulindinywe kuti mweezegwe, mbuli kuti kuli chimwi chintu chiyoosya chiliikuchitika kulindinywe.13Pesi ngamubotelwe nimwabilana mukupenzegwa kwaKkirisitu, kuchitila kuti anywebo mukabotelwe mpawo mukakondwe eelyo bulemu bwakwe bwayubununwa.14Kuti mwatukilwa nkaambo kazina lyaKkirisitu mulilongezedwe, nkaambo Muuya wabulemu awaLeza uli alindinywe.15Pesi kutabi umwi upengana mbuli mujayi, nikuba sikubba, nikuba sikubisya, nikuba sikusunda,16anukuti umwi wapenzegwa mbuli munaKkirisitu tayelede kuba abweeme, pesi ansi azina eelyo ngamumuleke alumbayizye Leza.17Nkaambo chiindi chasika lino chalubeta lutaanzi muŋanda yaLeza, alimwi kuti kalutalika andiswe, ayooba biyeni mamanino abaabo bataswiilizyi makani mabotu aLeza?18Alimwi“Kuti kakuli buyumuyumu kumusalali kuti avunwe,kuyooba biyeni kuli utakombi asizibi?”19Nkikaako aabo bapenzegwa mukwiinda mukuyanda kwaLeza ngabachite kabotu alimwi babikke myuuya yabo kuMulengi usyomekede.
The Word for the World International