Misebezi ya Baapositola27
1Iino nibakayeeya kuteeti twiinke ku Itali omugolo mupati, Paulu abaange bamwi bakabikwa mumaanzaa mweendelezi wabasilumamba walikuteegwa Juliyasi. Wakali mweendelezi wenkamu yabasilumamba be Loma yalikwiitwa kuteeti, “Basilumamba bo Muleli Mupati.”2Twakatanta mumugolo mupati wali woku Adilamitiyamu, ooyo walikuyanda kuyoinda muzito ziindene-indene zili mucooko ca Eziya. Twakuutalikizya musinzo waamaanzi antoomwi o Alisitakasi muna Masedoniya walikuzwa kutaindi pati lya Tesalonika.3Buzuba bwakacilila twakasika mu Sidoni. Mweendelezi wabasilumamba Juliyasi waloo moyo mubotu kuli Paulu, wakamuzumizya kupotela beenzinyina kuteegwa bakamupe zyaalikuyanda.4Twakazumanana omusinzo wesu. Iino kaambo keguwo lyalikubbubbula kutugama, twakainda kunyika lye nsumbu ya Saipulasi yakatukwabilila kuguwo.5Twakazubuka lwizi lupati lubambene ecooko ca Silisiya eca Pamfiliya mane twaakusika kutaindi pati lya Maila mucooko ca Lisiya.6Ookuya, mweendelezi wabasilumamba wakatujanina mugolo mupati woku Alekizandiliya, ooyo walikwiinka ku Itali okututansika mwateni.7Twakatola mazuba manji kuyobweenda aniini-aniini mubuyumu-yumu mane twakasika kumbali etaindi lya Sinidasi. Iino kaambo keguwo lyacili kubbubbula kaligama ndiswe twakakacilwa kuzumanana. Mpoonyina twakaselelela mumbali lye nsumbu ya Kiliti yakatucingilizya kuguwo, twakainda kumbali enkomwe ya Salimoni.8Twakainda kumbali enkomwe ya Kiliti mubuyumu-yumu mane twaakusika kucibaka calikwiitwa kuteeti Zito Zibotu. Eeci cibaka calaafwiifwi etaindi lya Lusiya.9Mbokunga twakasowa nako ndamfu kwateni kusikila mane kwatalika kuyoosya kweendaa maanzi kaambo nako yempeyo yalaafwiifwi, enako yokuliimya yaliindide, Paulu wakabacenjezya kuteeti,10“Nobaalumi, ndabona kuteeti musinzo wesu uyoobaa ntenda ape kuyooba kusweekelwa kupati kwezintu omugolo antoomwi amaumi eesu.”11Kono mweendelezi wabasilumamba wakamvwida zyaakaamba sikweendelezya mugolo omwini womugolo kutaamba zyakaamba Paulu.12Iino kaambo cito eeci ticaliinsi kabotu kukalila mugolo nako yempeyo eguwo, bunji bwabo bakayanda kuteeti bazumanane kusola kusika ku Fonikisi okukala kwateni nako yempeyo nicalikukonzeka. Fonikisi cito comu Kiliti calangide kumbo lyo kumusaanza okumbo lyo kunyika.13Luuwo luniini nilwakatalika kuunga kuzwida kumusaanza, basikweenzya mugolo mupati bakayeeya kuteeti inga bacita zibali kuyanda. Mpoonyina zibulo zikasya mugolo kweenda bakazikwelela mumugolo okutalika kweendela afwiifwi loko e nkomwe ya Kiliti.Mugolo Mupati Muguwo Pati14Kono kweciindi ciniini feela, guwo pati loko liteegwa kunyika yokujwe lyakatalika kubbubbula kuzwa kunsumbu.15Lyakatontaika mugolo mupati cokuteeti ticalikukonzeka kuulanzya kuzwa guwo, mpoonyina twakauleka feela kuteeti kuuyobucilizya guwo kolibbubbwida.16Twakacingilizigwa kuguwo nitwakainda kumusaanza woku ka nsumbu kaniini kateegwa Kauda, ooko mubuyumu-yumu twakakonzya kukwelela kagolo kaangwaanga kusule lyo mugolo mupati okukatansika.17Bakazingaila mugolo mupati amantambo kuteegwa mugolo udiye. Beenzya mugolo bakayoowa kuteeti inga twaakupatila mumuseenga wedaka walaafwiifwi enkomwe ya Silutisi yali kunyika ya Afulika. Mpoonyina bakawisizya cintu mumaanzi cikasya mugolo kweenda kufwambaana.18Buzuba bwakacilila, beenzya mugolo mupati bakatalika kufusa zibya zyali mumugolo mumaanzi kaambo keguwo pati lyakazumanana kutubbubwida ce ntenda.19Ape buzuba bwakacilila bakafusila mumaanzi zibelesyo zyomugolo.20Kwamazuba manji taakwe nitwalikulibona zuba na nyenyeezi. Guwo pati lyakazumanana kutubbubwida loko cokuteeti bulangizi bokufutulwa bwakamana.21Mbokunga bantu balikukacilwa kulya kweciindi cilamfwu, Paulu wakaima kunembo lyabo okuteeti, “Nobaalumi, mwalikweelede kundimvwa aalya nindakaamba kuteeti tutazwi ku Kileti. Ooku koonse kusweekelwa okusinyekelwa kwacitika nikwatatucitikila.22Kono ndimukumbila kuteeti mutabilaili kaambo taakwe utifwe akati kenu aati feela mugolo mupati nguutisinyeke.23Ndaamba namu kaambo masiku mungelo wa Leza wangu ngondikomba walizide kulindime24okundaambila kuteeti, ‘Utayoowi Paulu! Weelede kuyoozekesegwa kuli Kaisala. Nconzyo Leza muluzyalo lwakwe kulindiwe wafutula maumi abantu boonse mboyoobweenda ambabo.’25Iino nobaalumi amukazike myoyo kaambo ndilasyoma muli Leza kuteeti kuyooba mboonyina mbuli mbundaambilwa,26kono tulatontelwa kukansumbu.”27Mubusiku bwe kumi a one, akati kamasiku katuyoobweenzegwa eguwo akati ko lwizi lupati lwa Adiliyatiki , balikweenzya mugolo bakabonaanga twalikuyoobuswenena anyika.28Bakatalika kupima bulamfu bwamaanzi. Bakalosya ntambo ijesi cilemu cokupimya maanzi okujana kuteeti zyali ntaamu zili makumi otatwe ecisambowe kwiinka ansi. Ape nitwakendeenda, bakacita mboonyina namu okujana kuteeti zyali ntaamu zili makumi obile eciloba.29Mukuyoowa kuteeti mugolo ulagaila mumabwe, bakalosya zyokujatisya mugolo zyone kusule lyomugolo okukomba kuteeti buce.30Balikweenzya mugolo mupati balikuyanda kuloboka, bakaselusya kagolo okukalosezya mumaanzi okucitaanga bayanda kulosya zyokujatisya mugolo mupati kunembo lyomugolo.31Kono Paulu wakaambila mweendelezi wabasilumamba abasilumamba kateeti, “Aati basikweenzya mugolo, bakale mumugolo mupati tamukoofutuka.”32Mpoonyina basilumamba bakatimbula ntambo zyalikujesi kagolo okukaleka kuteeti kakunkulike.33Mujunzo-onza, Paulu wakakumbila bantu kuteegwa balye kateeti, “Mwalindila kuteeti mubone zitacitike kwensunda zyobile kamutalyi naanga comwi.34Iino ndamukumbila, amulye kuteegwa mube enguzu. Taakwe naanga omwi akati kenu utisweekelwe susu mumutwe wakwe.”35Naakamana kwaamba namu, wakabweza cinkwa okucikomona kabamulangilizya okulumba Mwami okutalika kulya.36Boonse bakayumisigwa okulya cilyo.37Toonse antoomwi nitwali mumugolo mupati twali myaanda yobile amakumi aali ciloba ecisambomwe.38Nibakalya okukuta boonse, bakabweza maila asyeede okwasowela mulwizi lupati kuteegwa mugolo mupati wuube.39Nibwakaca basikweenzya mugolo mupati bakabona nyika kono taakwe nibakiiziba eeyi nee. Iino bakabona cibaka eco lwizi lupati mpolubaanga luzwida aanze cijesi seese ape mpocijesi maanzi mafwiifwi. Mpoonyina bakayeeya kuteeti na inga cakonzyeka mugolo mupati bautole kwateni okuwiimika.40Mpoonyina bakatimbula zijatisyo zyo mugolo mupati okuzisiya mu lwizi lupati. Aciindi conya eeco bakaangununa ntambo zyakaangide mapulanga ookunyonesya mugolo mupati. Mpoonyina bakaangununa sila lyokunembo lyo mugolo mupati kuteegwa guwo likonzye kuutontela kunembo, mpoonyina twakalulama kwiinka ku nkomwe.41Kono mugolo mupati wakaakuma mumuse kaambo maanzi alimafwiifwi. Mpoonyina wakapatila kunembo cokuteeti tiwalikukonzya kuswena. Kusule wakatalika kukwamooka kaambo ka mayuwe aaleenguzu loko.42Iino basilumamba bakakanza kujaya boonse baange kuteegwa batadwayi kwiinka kunkomwe okuloboka.43Kono mweendelezi wabasilumamba walikuyanda kuteeti afutule Paulu, wakabakasya kucita namu. Mpoonyina wakalailila kuteeti aabo bakonzya kudwaya basaangune kusotokela mumaanzi kuzwa mumugolo okudwaila kunkomwe.44Basyaala beelede kucilila kabajesilidi kumapulanga naanga kuzibeela zimwi zyo mugolo mupati zyakakwamokede. Oobu mbombubo toonse mbutwakazubukila kunkomwe okufutuka. Paulu a Bamwi Muntenda yo Mugolo Mupati
The Seed Company