Wadaddiit Luúkaam17
1Wa xare Bulis wa Siila ib Amfiibuliisa wa Abuluniya saafaraw wa Tasaaluniiki batsxaw. Wa diiba maqbad Yahudi qala.2Wa Bulis kimma lamadu la maqbad ata wa igil salas sabit minna Kitaab naaghashayom.3Wa sharxa wa bayyana ilom la Masex kim igil limtsats wa min mot igil lighnats kim qala ilu. Wa belayom, “La Yasoq la ibbu ibashshirakkum halleko la Masex tu.”4Wa galela Yahud aghtanqaw wa misil Bulis wa Siila taxaabaraw kimma bizxaam minna Yunaaniyiin la ferhat Rabbi wa anis sharifaat bizxaat.5Wa Yahud biqidaam ghanáw ka gale sab shawsharat jamqaw min matraakabihom wa fawdat asoraw diibba madiinat. Wa bet Yaasun hajmaw Bulis wa Siila inlaxazzu asikka maxaabir igil laámtsiíwom.6Laakiin kim saánawom Yaasun wa galela xaw la biqidaam jarraw ghadamma xekmatta madiinat. Wa dtarxaw wa belaw, “Illi sab la iddinya killa gallabaw aze insar matsáw7wa Yaasun diib betu attarxaba ibbom. Hitom marsumma Ghaysar naghdo hallaw wa, ‘Malik biqid Yasoq litbahal halla,’ liblo hallaw.”8Waan la jameq wa xekmatta madiinat illi samqaw jodtat harrasaw.9Wa xare Yaasun wa la biqidaam damaanat adfaqaw wa qarxawom.10Kim masa inintu la emnat Bulis wa Siila asik Biiriya nadáw. Wa ken dolat batsxaw maqbadda Yahud ataw.11Wa Yahud Biiriya min Yahud Tasaaluniiki litsharrafo qalaw wa la liíkat ib miraad wa lawagh tkabbataw wa minna ritqiinaaha Kitaab kil amqil litxaggago qalaw la Bulis libillu qala amaan min tu igil litákkado.12Wa kim figgariit Yahud bizxaam amnaw wa bizxaat anis Yunaaniyaat shariifaat amnaya wa bizxaam sab Yunaaniyiin.13Laakiin waan Yahud Tasaaluniiki Bulis diib Biiriya ib zaqat Rabbi bashshir halla aamaraw, galehom ken gesaw wa la maxaabir fatnaw.14La emnat agiidaay Bulis asikka nageb nadáw laakiin Siila wa Tiimusaawus diib Biiriya tarfaw.15Wa la Bulis afgaraw asik Asiina amtsáwu. Wa xare ib amir qaghabalaw igil Siila wa Tiimusaawus ib shafaag igil litxaaboru.16Bulis diib Asiina inlitsabbarrom ib raáyat la madiinat ib asnaam milít, marra ghimum qala.17Ka diiba maqbad misilla Yahud wa la Yunaaniyiin la ferhat Rabbi naaghasha. Wa diibba sug amqilka la xaadraam lithaage qala.18Jamaaqat minna falaasifat Al Abighuriyiin wa Ruwaaghiyiin wa igil litfaarodu astabdaw. Galehom saálaw, “Illi hilluf mi igil libal laxazze halla?” Wa galehom, “Aalihat gaana nashshir halla,” belaw. La sabab la illi belaw ibbu jalliib Bulis ib Yasoq wa ghaniitsu min mot bashshir qala tu.19Wa darbu asikka ijtimaaqla Aryubaaghus amtsáwu wa saálawu, “Illi adrasot xadiis la ilu taádarris halleka, igil naámirru litghaddar?20La iitsanxat afkaar insammeq minka hallena ka maqnata igil nifham naxaze hallena.”21(Killom seknat Asiina wa la gaana la diiba saaknaam waghtom it naaghashot illa afkaar la xaddaas ledta laxaalufu qalaw.)22Xare Bulis it ijtimaaq Aryubaaghus bidtaaru gabá wa bela, “Yahaw sab Asiina, diib kil gaátkum marra maddayiniin titraáwni hallekum23sabab jawalko wa sinaqla qibaadatkum ib atkarot taayankowa wa akaan, ‘Igil qibaadat yiímmur ilaah’, kitub itta ma reéko. Ka la ilu taqabdo hallekum yiímmur tu, wa ana ibbu igil ibashshirakkum tu.24La Rabbi la iddinya wa killu la halla diiba mana, hitu Molaay midir wa sama tu wa hitu diib hayakil ib idey shighiit iisakkin.25Wa it kidmat aadami ghaddimma xiguz iiko jallaab hitu tu la igil aadami xayot wa tinfaas wa kil gaá lahayib.26Wa min orot inaas killa la umam azra killu la midir igil tixdar. Wa la awghaat wa la akaanaat la quriit la diiba sakno xaddada.27Rabbi illi addaam igil lixizayu wa igil lishaaógu wa qasa alla rakkubu wadayu min ayiinaaka rayiim ma min iigabbí.28Ajil diibu innabbir wa nitxarrak wa hallayotna minnu tu. Kimma galela shaqaraakum belawa, ‘Xina talaku xina.’29Ka xagho talak Rabbi gabána la Ilaahla kon kim surat min dahab aw fiddat aw imin saayigh simmuma igil ninsú alabna.30Itta ghadaamiit Rabbi tamaasil illa ghiwet hammala laakiin itta xaadrat killu la addaam itta hallaya la halle igil litobe laámmir.31Sabab la amqil la iddinya ib qadaalat laxaakim itta ibba inaas la ilu qayyana xaddada wa igil killu min kim tu asbata ib min mot qaghnasotu.”32Ghaniits min mot kim samqaw inintu galehom tarjaga. Laakiin biqidaam belawu, “Ib xadiis ibbilli mawdoq igil tithaage naxazzeka hallena.”33Kiínna Bulis minna majlis fagra.34Galehom Bulis talaw wa amnaw. Wa Diyuniisyus min illom qala wa nafar majlis Aryubaaghus qala wa bardu issiit Daamaariis titbahal wa biqidaam ma qalaw.
Summer Institute of Linguistics Ethiopia