Koreeg nà moog‑e 9を読んでください。

Koreeg nà moog‑e9

¹Aneenda Tel e əild Nowan iiŋ èg jaalge inəgini, e bii'ĩgən: “Kuddu ədə ug talg 'pərdə addeega.²Jeg kərdəŋ ê fèe ogo ma e been lewdag é leel‑e, ma e been miig é aweelg‑e, ma e been nà bàlda tad‑e, gəwldəəgə nà feg‑iilg‑i, kərdəŋ a gəwsu ũgun.³Jeg kərəŋ nà den wag leeŋ addeeg‑ool‑e, a gawsa ũgun ã əddũgun nameese ar ná a gəwsǐ ũgun galagee‑ne.⁴Gəl ar ugû nəəmúu oɲ ná bur taa afad‑e wa.⁵Â mirug é kor é afad é jen duin. Â mir lewdag kay é kor iini. Jag kay, jaam ná tirsə golon‑e â miri jo re é kor é awlen ná tirsí‑i.⁶Jen ná tirsə golon‑e, ẽ tirdə́ní di, de aana talda jen duin ar ɲee əən‑i.⁷Gəl kuddú, əddə og talg, təwdə uuŋgu addeeg‑oolo.”

⁸Tel e bee Nowan èg jaalge inəgini:⁹“Aneenda de â tif meed əənə èg doge èg dö məyədi¹⁰èg jeg nà denoog addeeg‑ool‑e kay, miigə, lewdag é maaga kay, lewdag é leeleega nà ləzzǐ tuu poor‑eelg èg doge ta‑e èg jeg nà denoog e àa addeeg‑ool‑e.¹¹Â tif meed əənə èg doge. Maagga taan â cində wag kərdəŋ è jeg nà denoog‑e wa, ar ná moogee‑ne. Â talân maagg taan ẽ jəddə addeega wa.”

¹²Gəl Tel e bee: “Parada é meeda nii ná â tif èg doge ləŋ pad‑e èg jeg nà denoog‑e kərdəŋ èg məyəd uyug nà bur leeŋ‑e.¹³Â tal məɲil əən kuisəg‑iilg. Ê ada parad é meeda èg aane èg addeeg‑e.¹⁴É mun man ná a təlǐ buil aweelg‑e, məɲil e ragsa tui‑i,¹⁵â tur meed ná a tifsí èg doge èg jeg nà denoog‑e kay. Fega ê adân taan ã cində jega kərəŋ nà denoog addeeg‑ool‑e wa.¹⁶Məɲil e ragsâ tu kuisəg‑iilg‑i, â tur meed ná a tiwsí èg jega ná denoog addeeg‑ool‑e kay ləŋ pad‑e.”¹⁷Tel e bee Nowan: “Aneenda parad é meeda ná a tiwsə èg jeg nà denoog addeeg‑oolen‑e kərdəŋ‑i een nii.”

¹⁸Jaalgeen é Nowa nà pəllǐ tad poor‑eelg‑e Saam, Aam èg Yafase. (Aam een ná baaw é Kanaan.)¹⁹Jaalgeen é Nowan nà taa ozo‑e, jag nà ləzǐ diiŋg‑i egan nà sawrso addeeg‑ool kay‑e.²⁰Nowan jen é bui‑i, eena tumsí kaal é kandalga moog‑e.²¹É gara məssǐ saa iinin‑i e dafê saan‑e e pool é kulmug kumur‑iilg dë maade.²²Aam faan é Kanaan e tur faan e naa é kulmug. E waj e kor awleege nà dhaag taa tuu‑i.²³Gəl Saam èg Yafase eg war goon e pədíigin dë boraag e dhur diiɲjəg ẽ pə̀ddə faa iiŋ tad. E mə̀r ëg muugu gar dhaan gar ẽ turdíigi faan é kulmug wa.

²⁴É gara Nowan saan pəɲsǐ deel‑e e tur jin ná jaa iini Aam ná ɲaan‑e jissǐ ĩn‑i,²⁵e bee: “Bii əniid ẽ walda é Kanaan iiŋ! Ê ada dhəm é dhəmg é awleege.”²⁶E bee jo di: “Bii maanga ẽ adda Məi Tel é Saama! Bii Kanaan ẽ adda dhəm é Saam‑e.²⁷Bii Məi Tel ẽ əddə aldan é Yafasa ẽ adda é mada, o Yafasa ẽ adda kumur‑iilg maa Saam, o Kanaan ẽ adda dhəm é Yafasa.”²⁸É gara maagg kujjiigǐ‑i Nowan assé duugu 350.²⁹Nowan duugu inəgin kay nà əssǐ‑i taǎn 950, aneenda e tir.

Pioneer Bible Translators

https://app.library.bible/content/a230cccfbf4362be