SINU78
Yaa Ku Batii Nɔɔ
Asaf onu. maskil
1O batii nii, binu asaa otuo nii;bikyɔɔ kanya nii sɛlaa atoko.2Kamabɛ kanya nii di akpa kamɛ,mbuɛ awofasaa, asaa ya niekye ni okofobee kamɛ-3n-se butoonu, buotofo ni kafɔɔ,n-se di bate loo ntɔɔtɔkɔ wo nii.4Bulɔbayɔ nya bukookaa babi lɛma;bubatɔkɔ kɔna ko nikɔwa niSaate nwu katansa sɛsaabla nwu,osie nɔɔ ku sɛkpɛ se niɛbla ni ɔkpɛ ɛɛbla nii.5Aabla afiofa aata Yakobaatɛ kafɔɔ kufiofa di Israel,nnya aakpee bawa looalɛ batuo ni babi lɛma,6alɛ kɔna ko nikɔwa ni katofo nya nii,bia babi babalofo ni sɛɛmaa,mma kafɔɔ babatɔkɔ babi lɛma.7Ni babayɔ anu lɛma mantika di Yaa suotoni blɔbayee sɛsaabla nɔɔkafɔɔ manklee afiofa nɔɔ nwu.8Blɔbate fɛle bawa lɛma-onunsie ku batokopĩitɛ kɔna nwu,di situ lɛma ditakyɔɔ ni Yaa atoko,di anwuna lɛma ditale ni onukwale aatɔɔ nii.9Efraim batii, kuntɛ baalolaa suoto ku ataa yi,baakple nkpaamaa di kakpɛ dii suoto;10batamufũ Yaa kanya ninii baaklebeesĩ kafɔɔ alɛ boosiɛ nkpa di kufiofa nɔɔ kanya.11Baayee nle ɛɛbla nii,atuosaa ya niɛbla ni ɔkpɛ aatuo ma nii.12Aabla sɛkpɛ se niabla ni ɔkpɛ di bate lɛma anudi Egipte kasɔ, di Soan kasɔ.13Aasɛ lekpo kamɛ ni aaleko ma katũ aafenko nɛ;aata ntu layila kloklo fɛle oyoyiɛ.14Aaklee ma ku lelokonkyɛ nwu ku anunwaa,lɛkpa niakye ni ɔtɔ nwu kamɛ ku kakyɛ kamuu.15Aabɛ afuɔ nwu di ɔfaafuuni aata ma ntu kpinwu fɛ lekpo nɛ;16aadiki seklenyĩi aakyeko difuɔ kyookyoo kamɛni aata ntu labiɛ diafe fɛle sekle nɛ.17Kafɔɔ baakple baatɔɔbla sikpile di suoto nɔɔ,otokopĩ di Nnwɔ Ninlenke ni suoto di ɔfaafuu nwu.18Baatɛ baasɔ Yaa baanyubaatɔɔkaalɛ alesaa ya baatoomiɛ nii.19Baakakatɛ di Yaa suoto, baabuɛ alɛ,"Yaa kafuo opunu ɔblɛfɛsa di ɔfaafuu nwu?20Obe wɔ aapɛ ni difuɔ nwu, ntu ladie,ni di seklenyĩi labiɛ siafe kpinwu nɛ.Abafuo wo alesaa kafɔɔ ɔta?Abafuo batii nɔɔ sina ɔta?21Obe wɔ di Saate nwu lanu ma nii, ɔblɔ lafiɛ nwɔ osie kanya;ni aadiki ɔtɔ nɔɔ aakpee Yakob nɛ,ninfɛ di ɔblɔ yakayaka nɔɔ lataka di Israel suoto nɛ,22diekye batafũ Yaa baanuee batika disi di didiki nɔɔ suoto.23Kafɔɔ aadiki kanya aata kolo kaatooaasɛkɛtɛ kafɔɔ osi n-yoko;24aata mana lakpakpaa aata batii lale,aata ma osi atitabi nwu.25Batii lale Yaa batɔkyɛntɛ bloblo;aakyesee ma alesaa ya amuu baafuo ni ole.26Aata kufĩ katunkɔ kɔfɛɛfɔ lafɛ kuakye osiaaleko kalakasɔ kɔfɛɛfɔ katũ di osie nɔɔ kanya.27Aata sina lakpakpaa di suoto lɛma fɛle kudu,bakansiɛ flɛlɛtɛle fɛle ɔtɛnsia di lekpo kotoko.28Aata ma baasoo di nsiɛkɔ lɛma nwu kamɛ,bamuu lamana akpaayo lɛma baakyi.29Baale baamiɛ baalenkeesa mmle boomiɛ nii,diekye aata ma nle baatoomiɛ nii.30Kafɔɔ fiɛ babadiɛ ni alesaa ya baatoomiɛ ni ole,bia di obe wɔ aasiɛ ni di nnya lɛma kamɛ,31Yaa lanya ɔblɔ di suoto lɛma;aalo basientɛ kaamɛ lɛma,aapɛ Israel bakosopo kaasɔ.32Di n-ya mmle amuu sɛmaa, baakple baatɔɔbla sikpile;di sɛsaabla nɔɔ se niɛbla ni ɔkpɛ sɛmaa, batafũ baanu.33Nioso aata ayi lɛma laloo wlaalɛɛ lɛma kafɔɔ di lɛyɛkɛ kamɛ.34Nse Yaa lelo ma, babawolaa nwɔ;mankyi mankple mansifi ɔkyɛ nɔɔ wla.35Baanyuma alɛ Yaa nianle ma Difuɔnkpaa,alɛ Yaa wɔ Niɛtaka Katoo alenke ni niale ma Dikitɛ.36Kafɔɔ mankyɔnkyɔ nwɔ ku nnya lɛma,manlaa mantɔɔ ku sɛkplalomii lɛma;37batayɔ situ lɛma baatɔɔ,batale onukwale baata kanya ninii nɔɔ.38Kafɔɔ nyaami nyatɛ aale;aayɔ ɔtanlolaa ɔbla lɛma aakyɛ manioso atawɔɔsa ma.Di obe, di obe kamɛ andiɛ ɔblɔ nɔɔ ɔnyaansinnya kafɔɔ ɔblɔ yakayaka nɔɔ nwu.39Aanyuma alɛ batii ko bale,kɔfɛɛfɔ ko ninfe ni kunaankple nii.40Sɛsɛ́ batabla atokopĩsaa baakpee nwɔ di ɔfaafuu kamɛbaakpee nwɔ sɛnyaami kafɔɔ di kasɔ kosole nwu suoto!41Baasɔ baakple baasɔ Yaa baanyu;baakpee Israel Klekletɛ nwɔ ɔblɔ.42Batanyuma osie nɔɔ-dii le aadiki ma aakyeko ni amumu bablatɛ nnɛɛ,43dii le aadiki atuosaa nɔɔ ya niabla ni ɔkpɛ aatuo ni di Egipte,sɛkpɛ nɔɔ se niabla ni ɔkpɛ di Soan kasɔ suoto.44Aamunikĩisa sekle lɛma ntu aabla ntɔ;batafuo seklenyĩi lɛma ntu onyi.45Aata banwakɛ sɛlambu labatataa ma,ku basua ba niakpee ma ni kubuɛ.46Aayɔ alesaa di afe lɛma aata atroe,awosobi lɛma kafɔɔ aata akpakyekyee.47Aalalaasa awosobi awoso lɛma ku atubɔkaniiku sikamɔ-abue lɛma ku kabiene kanto.48Aayɔ banankyue lɛma aata atubɔkanii nwu,basebɔkɛɛ lɛma aata ɔplalaa amunaa.49Aadiki ɔblɔ nɔɔ kpankpa aatuo di suoto lɛma,ɔblɔ yakayaka nɔɔ ku lɛbɔfiɛ ku amumu-kawɔɔ batɔkyɛntɛ dikudi.50Aalolaa nkpaa osuku aata ɔblɔ nɔɔ;atayɔ kukpi aakyɛ makafɔɔ aayɔ ma aata ofiɛ kplɛ.51Aalo lelofo kasale babi bamuu di Egipte,sisuɔtɔ kamɛ lelofo kasale nwu di Ham akpaayo kamɛ.52Kafɔɔ aakpaa batii nɔɔ aadieko fɛle bafoso dikudi;aaleko ma katũ fɛle bafoso aafenko di ɔfaafuu nwu kamɛ.53Aanyu ma nwaa, nioso batayɛkɛ;kafɔɔ lekpo nwu lamana balo lɛma.54Diata aakpaa ma aawako kasɔ klekle nɔɔ nwu suoto,akpenkpe nɔɔ kale nwu di koletanɛɛ nɔɔ lafũ nii.55Aatososa nnle di anu lɛmani aayɔ nsɔ lɛma kafɔɔ aata ma fɛ atesaa nɛ;aasiɛsa Israel nfaabi nwu di ayo lɛma.56Kafɔɔ baasɔ Yaa baanyubaataka baayila di Nnwɔ Niɛtaka Katoo Alenke ni suoto;batamufũ afiofa nɔɔ baaklee.57Baate fɛle bate lɛma, baawɛ onunsie ku ɔtaanfũ onu,fɛ kasɛfɛ ka ninanlɛ ni manantika ka ni disi.58Baakpee nwɔ ɔblɔ ku ntakalekɔ lɛma nwu;baata sɛsɔfɔwo ɔkpɛ nɔɔ lataka katoo ku afiɔ lɛma nwu.59Nse Yaa lenu ma yi, ɔblɔ nfiɛ nwɔ osie kanya;aasĩ Israel fɛɛ.60Aadiɛ Silo lɛkpaayo klekle nwu,akpanta nwu aapɛ ni di batii kamɛ.61Aayɔ kanya ninii lɛlakaa kplɛ nɔɔ nwu aasifiko sɛlanle kamɛ,aayɔ asaa nɔɔ kafɔɔ aakpee di lo nwu nnɛɛ.62Aayɔ batii nɔɔ aata kapamii nwu;aanya ɔblɔ osie kanya ku atesaa nɔɔ.63Ɔtɔ lafiɛ bakosopo lɛma,bakpeele lɛma kafɔɔ ditawɛ sɛkafɔɔ sinu;64baalo olebatatɛ lɛma kafɔɔ ku kapamii,bakpisɔfɔ lɛma kafɔɔ ditafuo owi.65Ninfɛ di Saate nwu lasɛnkɛ fɛle sɛkyɔsĩ kamɛ aakye,fɛ mmle di otii nsɛnkɛ ni di lɛtansiɛ kamɛ.66Aapɛ balo nɔɔ aakplesa;aata sinunsɔ lakpɛ ma dinaa ni kaloo.67Ninfɛ aasĩ Yosef akpanta nɛ,atadiki Efraim kafaabi nwu;68kafɔɔ aadiki Yuda kafaabi nwu,Sion Kobokote nwu ambɔmbɔ ni.69Aabla lɛkpaayo klekle nɔɔ fɛle ntakalekɔ,fɛle kasɔ nwu ɛɛtɛ ni dinaa ni kaloo.70Aadiki Dawid kpɛmblatɛ nɔɔaakpaa nwɔ kafɔɔ aakyeko lefosoyo nwu;71bafoso kanyunkɔ aakpaa nwɔ aakyekoalɛ abale bafosokpatɛ ata batii nɔɔ Yakob,dile ni Israel atesaa nɔɔ.72Dawid kafɔɔ lanyu ma ku otu biene;ku lɛsaatofo nnɛɛ aaleko ma katũ.The Seed Company