SINU69
Kaku Owi Diɛta Ni Lɛkyakaako
Dawid onu. Kuɔta ni sinutuotɛ. Basa nwu di "Lili" sɛlɔ kanya.
1O Yaa, diki mi,diekye ntu nwu ntoodu simu nii.2Ntɔɔmɛ di apatapata kyofole kamɛ,lɛba le di kɔkpaa kasekɔ nnaa nii.Ntoodu ntu kyofole kamɛ;ntu ntooyii diemufũ mi.3Koloo okpi komiɛ ni lɛkyakaako;ɔkɔnsɔ nii ntookoso.Anu nii nte tutufuu,oowolaa ni Yaa nii.4Batii ba niekyidi mi ni kasakasampɔ balenke disi nii sinwini;balo nii mpɔ ninambla ni lɛsalɛsaa,mba nikomiɛ alɛ bawɔɔsa mi nii.Boonyinka mi alɛ ntalɛsaa le ninan-yu ni koto.5O Yaa, faye mi dibuu;lɛpɔɔ nii okpi diele fɔ lewofasaa.6Tanta mba nikonyu fɔ ni osukusinunsɔ lakpɛ ma ta ami oso,O Saate, Saate wɔ Ninlenke ni;tanta baakpee mba ninwolaa fɔ nisinunsɔ ta ami oso,O Israel Yaa.7Nfũ ditufa ta afɔ oso,nioso sinunsɔ leyii mi anu.8Ɔfɔɔ nle nta babiloo suɔtɔbi,kɔnalookyo nta yaami babisuɔtɔbi;9diekye oleɔyɔ di leyo lɛfɔ ntoole mi kamɛ,mba nintufa fɔ ni atufa kafɔɔ ntika mi di suoto.10Nse lewi, lenii kanya kafɔɔ,dikpeni nfũ atufa,11nse leklee kaku asaa,batii nnyu mi nyakatãa.12Mba ninsiɛ ni di kayoko mma mi,nle kafɔɔ onu nta batasiɛntɛ.13O Saate, kafɔɔ mpɛ ɔlaa nta fɔ,di sibualɛ lɛfɔ obe kamɛ;O Yaa, di lɛbɔmbɔ kplɛ lɛfɔ nwu kamɛ,tuna mi ku onukwale lɛfɔ didiki.14Diki mi di apatapata kamɛ,tantɛɛ lamɛɛ;diki mi fakyeko mba niekyidi mi ni nnɛɛ,fakyeko ntu kyofole nwu kamɛ.15Tanta ntu oyii nwu layɔ miee lamɛɛ di kakyofokɔ nwuee dibiɔ nwu kanya katĩi mi kaakpee kaamɛ.16O Saate, tuna mi di lɛbɔmbɔ biene lɛfɔ nwu kamɛ;di nyaami ɔnya lɛfɔ kplɛ kamɛ, munikĩi fawa ɔkyɛ nii.17Tanwofasa anu lɛfɔ di kpɛmblatɛ lɛfɔ suoto;tuna fatɛɛ wla, diekye ɔlaa letũ mi.18Tɛɛtɛɛ mi faafũ mi kafɔɔ;diki mi ta bakyiditɛ nii oso.19Faye mmle bootufa mi, mankpee ni sinunsɔ, mannyu mi ni kafɔɔ nyakatãa;balo nii bamuu nsi di anu lɛfɔ.20Atufa ntoobiɛ mi otudiɛta alɛ lɛkyakaako nnaa mi kafɔɔ;komiɛ lɛkyakaako,kafɔɔ kuninwii nnaa,kɔnɛɛ kaafutu bakpeetɛ, kafɔɔ ntawɛ kuonwii.21Baakpee kɔfa loonle di alesaa nii kamɛbaatɛɛ kafɔɔ katabu alɛ nnyi di otukɔnsɔ kanya.22Ta alesaa opunu wɔ beese ni di anu lɛma kukple dikyĩ;ta nwu kukple letoko nanfi ku okũ.23Ta anu awɔfɔ ma alɛ blasinnya,mmaa lɛma kafɔɔ dibo dinaa ni kaloo.24Nyɛɛnɛ ɔblɔ lɛfɔ fakpete ma di suoto;faata lɛblɔfiɛ yakayaka lɛfɔ kafɔɔ dilenkee ma.25Ta kasiɛkɔ lɛma kate kafukuti;tanta kuonwii lasiɛ di akpanta lɛma kamɛ.26Diekye batikanko mba feetika ni nkɔmankakatɛ kafɔɔ di mba beepila ni ninyinyi suoto.27Nanfi ma kootoko faakple fananfi ma kootoko;tanta ma baawɛ didiki lɛfɔ nwu.28Ta bayɛɛsa ma ayooto di nkpa kukũ kamɛtanta kafɔɔ baakpana ma ayooto baakpee di batininitɛ kamɛ.29Nsi di ninyinyi ku dibuo kamɛ;O Yaa, ta didiki lɛfɔ dinyu mi.30Matansa Yaa leyooto ku sinumatɔɔ dibu ku sɛfa ɔpɛ.31Nle mmle mabuo Saate nwu anu ninlenkee nankyue wɔ beediki ni ɔsayɛ,ninlenkee nankyue suɔtɔ ku akya ku akpɔbi nɔɔ.32Bapiitɛ manya mampɔ kafɔɔ-aye ba ninwolaa ni Yaa, situ lee sisiɛ nkpa!33Saate nwu nnu mba diefĩ ni sɛlɔannsĩ kafɔɔ batii nɔɔ ba ninte ni di ayo katenkɔ.34Ta osi ku kasɔ batansa nwɔ,lekpo nwu ku asaa ya amuu ninkyɛ ni kaamɛ,35diekye Yaa kamadiki Sionanse kafɔɔ Yuda sekpoo kplɛ nwu dibudi.Ni batii masiɛ ninfa kanle ma kale;36bakpɛmblatɛ nɔɔ babi nimale ka asaa,mba kafɔɔ nimbɔmbɔ ni leyooto nɔɔ nimasiɛ ninfa.The Seed Company