SINU36
Batii Amumu Ole
Saate nwu kpɛmblatɛ Dawid onu. Kuɔta ni sinutuotɛ.
1Ɔlaa nsi di otu nii kamɛdi kpiletɛ sikpile ole suoto:Yaa lɛyɛkɛ diele lɛsaadi anu nɔɔ.2Diekye antakatɛsa suoto katoo di anu nɔɔ amuosie kanya alɛ aatofo ee akyidi okpile nɔɔ.3Kanya nɔɔ sɛlaa nle amumu ku kakyɔnkyɔ;atoodiɛ ninumbe ku dibiene ɔbla.4Bia di atensaa nɔɔ suoto antoobu disi kpile;an-yɔ suoto nɔɔ ankpee di sikpile ole kamɛ,annsĩ kafɔɔ lɛsaa le ninle ni dikpilesaa.5O Saate, lɛbɔmbɔ lɛfɔ ndu osi nwu,onukwale lɛfɔ ndu kolo.6Ɔsaabla tinini lɛfɔ nte fɛle abokote kplɛ,lɛkanko lɛfɔ fɛle lekpo kakyofolekɔ.O Saate, fanfũ batii ku babɔkɛɛ nkpa.7Mmle di lɛbɔmbɔ lɛfɔ le ninaa ni kaloo lefũ ni kɔya!Banɔɔfo ku bibisɔnwɛ katanikokɔ di afoko lɛfɔ oyududu.8Mankonko di leyo lɛfɔ alesaa lɛpɔ nwu suoto;fanta ma ntu di suoto lɛyɔɔ okle lɛfɔ nwu kamɛ.9Diekye ɔkyɛ lɛfɔ di nkpa kataakɔ nkpe;di lɛkpa lɛfɔ kamɛ buɔnya lɛkpa.10Ta lɛbɔmbɔ lɛfɔ nwu dikple diwɛ dita mba nin-ye fɔ ni,ɔsaabla tinini lɛfɔ kuta mba situ kamɛ niɛkpa ni.11Tanta mba nintakatɛsa ni suoto katoo lananafu mi,ee bakpiletɛ kɔnɛɛ kutososa mi.12Nyu mmle di sikpile bablatɛ lɛnɔɔ bate ni-beefuki ma bɛɛtɛ, boloofuo ɔtaka!The Seed Company