SINU35
Ɔlaa Ɔpɛ Diɛta Ni Lɛkyakaako
Dawid onu.
1O Saate, dieko mba nikodieko mi ni;kpɛko mba nikɔkpɛko mi ni.2Yɔ kubidifunsaa ku akpakyaa;faataka fawa fabafũ mi.3Nanfi lɛkplɔ ku ɔkyɔɛdi mba nintikankoe ni suoto.Tɔkɔ ɔkla nii falɛ,"Ami ninle fɔ didiki.”4Ta sinunsɔ sikpɛ mba nintikanko mi ni nkpabaanunsɔ kafɔɔ;ta batii ba nikomiɛ mi ni kawɔɔnnɛɛ difee ma baakple nkpaamaa.5Ta ma bate fɛle sɛsɔ di kɔfɛɛfɔ anu,di Saate nwu tɔkyɛntɛ kotososa ma ansifiko ni;6ta osuku lɛma kuwɔfɔ kuɔkplɔkplɔ kafɔɔ,di Saate nwu tɔkyɛntɛ letoso atikanko ma ni.7Diekye bɛɛkyɔɔ mi okũ ninambla ni lɛsalɛsaa,beekutu dibiɔ kafɔɔ bɛɛtɛ mi ninambla ni lɛsalɛsaa,8ta kawɔɔ kafua ma-faata okũ wɔ beewofasa ni kumufũ ma,ta ma bakpa babuo di dibiɔ lɛma nwu baawɔɔ.9Ni ɔkla nii manya suoto lɛyɔɔ di Saate nwu kamɛampɔ kafɔɔ di didiki nɔɔ nwu kamɛ.10Suoto nii simuu mabuɛ alɛ,"O Saate, owe ninte fɛle afɔ?Afɔ nindiki bapiitɛ fankyeko batii ba ninkpe ni osie balenke ma ni nnɛɛ,bapiitɛ ku mba diefĩ ni di mba nintafaa ma ni nnɛɛ.”11Balaatɛ kamaabayilatɛ ntɔɔtaka;bɔɔkaalɛ mi sɛlaa se ninan-ye nwu ni ole kuonwii.12Bɛɛyɔ dikpile bɔɔtɛɛ dibiene kotobeediɛ ɔkla nii kyɛlete kafɔɔ.13Kafɔɔ di obe wɔ baatoofiɛ nii, laklee kaku dibulalawakosa suoto nii kasɔ kafɔɔ ku kanya onii.Nse ɔlaa ɔpɛ nii lekple kuɔwa ɔkyɛ nii kunaanwa kaanya yi,14nkyɛ nkyi ntoowi kakufɛ bia siɛwo nii ee obiloo suɔtɔbi kowi nta.Nwakosa disi nii kasɔ ku sɛnyaamifɛ bia yaami kowi nta.15Kafɔɔ obe wɔ latuula nii, baasi baanya suoto lɛyɔɔ;bakyiditɛ nii lasi kanya di suoto nii di obe wɔ ntatofo nwu ni ole.Bɔɔkpɔnɔfɔsa mi, monoodiɛ nii.16Bɔɔma nyakatãa fɛle mba ninan-ye ni Yaa;boowee anyɛɛ lɛma mankpee mi.17O Saate, ɔmɛmbe fabakyi fannyu mi?Fũ mi nkpa fakyeko amumu lɛma nwu,nkpa finle nii nwu fakyeko bakyata ba mmle nnɛɛ.18Kamapɛ fɔ sɛfa di kasikɔ kplɛ nwu kamɛ;di batii dikudi kamɛ kamatansa fɔ.19Tanta mba nikɔnya ni suoto lɛyɔɔ di suoto niibale ni balo nii, ninambla ni lɛsalɛsaa;tanta mba niekyidi mi ni kasakasalanyu mi kunu nyakatãa.20Diele atoko ɔkyɛ ole kanya mankakatɛ,kafɔɔ sɛlaa ku afunu lɛnyabudi suotodi batii ba ninsi ni kloklo di kasɔ nwu suoto.21Mambɛ nnya manyu mi tuwĩi mambuɛ alɛ, "Ɛhɛ̃ɛ! ɛhɛ̃ɛ!Butɔɔnya ku anu loo amu.”22O Saate, fatɔɔnya nle mmle; tammaasa kanya.O Saate, tankyo mi.23Sɛnkɛ, faataka fakpɛ fatɛɛ!Yaa nii ku Saate nii, ka lɛka fatɛɛ.24O Saate, Yaa nii, tɛɛ lɛbɛ di ɔsaabla tinini lɛfɔ kamɛ;tanta suoto layɔɔ ma di suoto nii.25Tanta baabuɛ alɛ, "Ɛhɛ̃ɛ, nkpo buomiɛ nɛ!"ee baabuɛ alɛ, "Butɔɔmɛ nwɔ.”26Ta batii ba bamuu nikɔnya ni suoto lɛyɔɔ di dibuo nii kamɛsinunsɔ sikpɛ ma, baakpɔkpɔtɔ kafɔɔ;ta mba ninkanta ni di suoto niisinunsɔ simana ma sikyi baanunsɔ kafɔɔ.27Ta batii ba diɛyɔɔ ni kafutu di lɛbɛ nii ole suotobayiisa suoto lɛyɔɔ kudu, baapɔ kafɔɔ;ta babuɛ obe lele alɛ, "Batakatɛsa Saate nwu katoo,nnwɔ nimiɛ ni kpɛmblatɛ nɔɔ lɛ̀lɛ.”28Ɔkplalomii nii makakatɛ di ɔsaabla tinini lɛfɔ suotoku katansa lɛfɔ di dii nimu kamɛ.The Seed Company