Read SINU 119

SINU119

Saate Nwu Kufiofa

¹Suoto siyɔɔ batii ba di ole kuonwii nnaa ni di sisuku lɛma suoto,mankyɛ ni di Saate nwu kufiofa kanya.²Suoto siyɔɔ mba niemufũ sɛlaa nɔɔ bakle nimanwolaa nwɔ ni kafɔɔ ku situ lɛma simuu.³Manambla lɛsaa le ninanlɛ ni;mankyɛ ni di sisuku nɔɔ suoto.⁴Fɛɛtɛ sɛsaablase dikaatɛ baabla ni nwaa obe lele.⁵O, alɛ sisuku nii lawo nimudi kufiofa lɛfɔ ole kamɛ!⁶Ni blɔbakpee mi sinunsɔnse lebu sɛlaa lɛfɔ simuu lenyu.⁷Kamatansa fɔ ku otu wɔ niɛkpa nifɛ mmle kotekete ni afiofa lɛfɔ tinini nwu.⁸Kamale afiofa lɛfɔ;tandiɛ mi nnɛɛ saa.

Saate Nwu Kufiofa Atoko Ɔkyɔɔ

⁹Lɛ di okosopo kafuo nkpa tinini osiɛ?Alɛ aasiɛ nkpa di ɔlaa lɛfɔ nwu kanya.¹⁰Nwolaa fɔ ku otu nii omuu;tantɛɛ lakpukuti di afiofa lɛfɔ suoto.¹¹Ntoowofasa ɔlaa lɛfɔ di otu nii kamɛalɛ naabla okpile di suoto lɛfɔ.¹²O Saate, batansa fɔ;tuo mi sisuku lɛfɔ.¹³Ku anyasibi nii n-seafiofa ya amuu nindie ni di kanya lɛfɔ lɛka.¹⁴Suoto n-yɔɔ mi di sɛlaa lɛfɔ otinkanko kamɛfɛ mmle di otii nnya ni suoto lɛyɔɔ di lɛsaawɛ kplɛ suoto.¹⁵Mbu disi di sɛlaa lɛfɔ suotontɛ anu kafɔɔ nnyu sisuku lɛfɔ.¹⁶Suoto n-yɔɔ mi di afiofa lɛfɔ suoto;namabla ɔlaa lɛfɔ nwu ɔfɔ́tɔ.

Suoto Lɛyɔɔ Di Saate Nwu Kufiofa Kamɛ

¹⁷Bla dibiene fata kpɛmblatɛ lɛfɔ, ni kamasiɛ nkpa;kamakyɔɔ ɔlaa lɛfɔ kotoko.¹⁸Tikiti mi anu alɛ kanyaasaa ya niɛbla ni ɔkpɛ di kufiofa lɛfɔ kamɛ.¹⁹Ɔfɔɔ nle kaasɔ suoto;tanwofasa mi afiofa lɛfɔ.²⁰Ɔkla nii kokpekpe anu anwolaaafiofa lɛfɔ nwu obe lele.²¹Fansĩ ɔlaa fanta mba nintakatɛsa ni suoto katoo, bɛɛkpani ma nibɛɛblasa ni suoto di afiofa lɛfɔ suoto.²²Diki mi fakyeko atufa ku lɛsaatambu lɛma kamɛdiekye lemufũ sɛsaabla lɛfɔ nkle.²³Nu di baka lesi bookũ kanwumbe di suoto nii yi,kpɛmblatɛ lɛfɔ mbu disi di afiofa lɛfɔ suoto.²⁴Sɛsaabla lɛfɔ ninle mi suoto lɛyɔɔ;nnya ninká mi nɛ.

Disibu Ɔbla Ɔta Saate Nwu Kufiofa Ole

²⁵Bɛɛtɛ mi kaasɔ di kudu kamɛ;fũ mi nkpa di ɔlaa lɛfɔ nwu kanya.²⁶Lakyisa nkpa nii, ni faatuna faatɛɛ nɛ;tuo mi sisuku lɛfɔ.²⁷Tɛɛ nnu sɛsaabla lɛfɔ asaa otuo kasɔ;ni kamabu disi di sɛkpɛ lɛfɔ se niɛbla ni ɔkpɛ suoto.²⁸Ditoobuo ɔkla nii ku sɛnyaami owi;kpee mi osie di ɔlaa lɛfɔ nwu kanya.²⁹Kpukutisa kakyɔnkyɔ sisuku di suoto nii;le mi sibualɛ diefe ni di kufiofa lɛfɔ nwu suoto.³⁰Ntoodiki onukwale osuku nwu;ntɔɔyɔ otu nii letika di afiofa lɛfɔ suoto.³¹O Saate, lemufũ sɛlaa lɛfɔ nkle;tanta sinunsɔ lakpɛ mi.³²Ntoso di afiofa lɛfɔ osuku suoto,diekye fatɔɔta otu nii kunutoko.

Ɔlaa Ɔpɛ Diɛta Ni Lɛsɔnu

³³O Saate, tuo mi sisuku lɛfɔ,ni kamakle sĩ nnaase di kayɛntɛkɔ.³⁴Tɛɛ lɛsɔnu, ni kamale kufiofa lɛfɔ nwukamamufũ kũ nklee ku otu nii omuu.³⁵Kpaa mi fafenko di afiofa lɛfɔ osuku suoto,diekye nfa ninnya suoto lɛyɔɔ nɛ.³⁶Munikĩisa otu nii fakyɔɔ sɛsaabla lɛfɔkafɔɔ diele lete ni lɛlɛ kanya.³⁷Munikĩisa anu nii di asaa ya ninanfĩ ni suoto;fũ mi nkpa di ɔlaa lɛfɔ nwu kanya.³⁸Ta ntam lɛfɔ nwu diwa kaanya dita kpɛmblatɛ lɛfɔ,di mmle baayɛkɛ fɔ ni kanya.³⁹Tekete sinunɔ se kɔyɛkɛ ni fasifiko,diekye afiofa lɛfɔ nlɛ.⁴⁰Mmle di asaa otuo lɛfɔ nkle mi ni ɔkɔnsɔ!Fũ mi nkpa di ɔsaabla tinini lɛfɔ kamɛ.

Disi Otika Di Saate Nwu Kufiofa Suoto

⁴¹O Saate, ta lɛbɔmbɔ lɛfɔ nwu ninaa ni kalo diwa ɔkyɛ nii,didiki lɛfɔ nwu di mmle fɛɛka ni ntam kanya;⁴²ni kamakpee nnwɔ nintufa mi ni kanya,diekye letika disi di ɔlaa lɛfɔ suoto.⁴³Tankpafɛ onukwale ɔlaa nwu di kanya nii,diekye ntɔɔyɔ osuku onyu nii letika di afiofa lɛfɔ suoto.⁴⁴Obe lele kamale afiofa lɛfɔ nwu,dinaa ni kaloo.⁴⁵Kamakyɛ nkyi di atoko ɔkyɛ ole kamɛ,diekye ntootikanko asaa otuo lɛfɔ nwu.⁴⁶Kamakakatɛ di sɛlaa lɛfɔ suoto di baka anusinunsɔ dilɔbakpɛ mi kafɔɔ,⁴⁷diekye nnya suoto lɛyɔɔ di afiofa lɛfɔ suoto,diekye mbɔmbɔ nya.⁴⁸Lɛtakatɛsa nnɛɛ nii lɛkyɔɔ afiofa lɛfɔ ya nimbɔmbɔ nii,mbu disi kafɔɔ di sɛsaabla lɛfɔ suoto.

Disi Otika Di Saate Nwu Kufiofa Suoto

⁴⁹Nyuma ɔlaa wɔ faata ni kpɛmblatɛ lɛfɔ,diekye fɛɛtɛɛ osuku onyu.⁵⁰Nle mmle ninle kɔnɛɛ nii ɔkpee kaafutu di dibuo nii kamɛ nɛ:Ntam lɛfɔ nfũ mi nkpa.⁵¹Mba ninkanta ni mma mi manandiɛ nii.kafɔɔ ninkyi di kufiofa lɛfɔ kamaa.⁵²O Saate, nnyuma saa lɛfɔ afiofa nwu,anta otu nii nte kafɔɔ.⁵³Ɔblɔ nfiɛ mi osie kanya ta bakpiletɛ,ba niesĩ ni kufiofa lɛfɔ nwu oso.⁵⁴Sɛsaabla lɛfɔ ninle sinu nii disi ɔlaadi kakɔ lele lebuo kɔfɔɔ.⁵⁵O Saate, nnyuma leyooto lɛfɔ ku kakyɛ,kamamufũ kufiofa lɛfɔ nwu kafɔɔ nklee.⁵⁶Nle mmle ninle ɔkpɛ nii nɛ:nkyɔɔ asaa otuo lɛfɔ atoko.

Ole Ɔyɔ Di Saate Nwu Kufiofa Suoto

⁵⁷O Saate, afɔ ninle ole mi;lɛka ntam nlɛ makyɔɔ sɛlaa lɛfɔ kotoko.⁵⁸Ntoowolaa anu lɛfɔ ku otu nii omuu;le mi sibualɛ di ntam lɛfɔ nwu kanya.⁵⁹Ntoobu disi di sisuku nii suotonioso ntoomunikĩisa anu nii lɛkyɔɔ asaa otuo lɛfɔ.⁶⁰Kamapɛsɛwa, namakyɛkyɛlɛ kafɔɔkakyɔɔ ni afiofa lɛfɔ kotoko.⁶¹Nu di bakpiletɛ leninii mi ku sikũ yi,namayee kufiofa lɛfɔ.⁶²Ntaka ku nkyɛntɛɛ mpɛ fɔ sɛfata afiofa lɛfɔ tinini oso.⁶³Siɛwo nle nta batii ba bamuu nin-yɛkɛ fɔ nii,ku mba bamuu nintikanko ni asaa otuo lɛfɔ.⁶⁴O Saate, kasɔ leyii ku lɛbɔmbɔ lɛfɔ;tuo mi sisuku lɛfɔ.

Saate Nwu Kufiofa Lefũ Kɔya

⁶⁵Bla dibiene fata kpɛmblatɛ lɛfɔO Saate, di ɔlaa lɛfɔ nwu kanya.⁶⁶Tuo mi lɛsaatofo ku lɛkanko biene,diekye lefũ afiofa lɛfɔ lenu.⁶⁷Fiɛ baananfi mi ni kootoko, layu osuku,kafɔɔ nunua kɔkyɔɔ ɔlaa lɛfɔ kotoko.⁶⁸Falɛ, nle fɔɔbla ni kafɔɔ nlɛ;tuo mi sisuku lɛfɔ.⁶⁹Mba ninkanta ni lɛkpɔnɔfɔsa mi ku sɛlaa ku afunu,nkle asaa otuo lɛfɔ ku otu nii omuu.⁷⁰Situ lɛma nkpe osie ku lɛsɔnu,kafɔɔ suoto n-yɔɔ mi di kufiofa lɛfɔ kamɛ.⁷¹Diasiɛko alɛ baananfi mi kootokoalɛ katekete sɛsaabla lɛfɔ nwu.⁷²Kufiofa nwu niekye ni kanya lɛfɔ lefũ mi kɔya kulenkekoto fututu ku koto sɛɛle nkpenkpe.

Saate Nwu Kufiofa Tinini

⁷³Nnɛɛ lɛfɔ niabla mi dialolaa mi kafɔɔ;tɛɛ lɛsɔnu nintekete afiofa lɛfɔ.⁷⁴Ta mba ninyɛkɛ fɔ ni banya suoto lɛyɔɔ nse bɛɛnyɛɛ,diekye lɛyɔ osuku onyu nii letika di ɔlaa lɛfɔ suoto.⁷⁵O Saate n-ye nlɛ afiofa lɛfɔ nte tinini,di onukwale kanya fɛɛnaanfi mi kootoko.⁷⁶Ta lɛbɔmbɔ lɛfɔ nwu ninaa ni kaloo dikpee mi kɔnɛɛ kaafutu,di ntam be faaka faata ni kpɛmblatɛ lɛfɔ kanya.⁷⁷Ta nyaami ɔnya lɛfɔ nwu ditɛɛ nsiɛ nkpa,diekye kufiofa lɛfɔ nwu ninle mi suoto lɛyɔɔ nɛ.⁷⁸Ta sinunsɔ sikpɛ mba ninkanta ni ta bɔɔtɛ mi koló ninambla ni lɛsalɛsaa;kafɔɔ kamabu disi di asaa otuo lɛfɔ suoto.⁷⁹Ta mba ninyɛkɛ fɔ ni bamunikĩi bawa ɔkyɛ nii,mba nienu ni sɛsaabla lɛfɔ kasɔ.⁸⁰Tanta baatɛ otu nii koló di sisuku lɛfɔ suoto,alɛ balaakpee mi sinunsɔ.

Ɔlaa Ɔpɛ Diɛta Ni Didiki

⁸¹Ɔkla nii nloo ɔnyɛɛ ku ole ɔyɔ di didiki lɛfɔ suoto,kafɔɔ lɛyɔ osuku onyu nii letika di ɔlaa lɛfɔ suoto.⁸²Ditoobuo anu nii, oowolaa ni ntam lɛfɔ nwu;kɔkaalɛ nlɛ, "Ɔmɛmbe fabakpee mi kɔnɛɛ kaafutu?"⁸³Kuntɛ nte fɛle nta dikuuku di kɔyɔ kamɛ yi,nin-yee sisuku lɛfɔ.⁸⁴Ɔmɛmbe di kpɛmblatɛ lɛfɔ anyu osuku alaase?Ɔmɛmbe fabanaanfi mba nikowolaa mi ni kaanya kootoko?⁸⁵Mba ninkanta ni lekutu abiɔ bɛɛtɛ mi,mananle ni kufiofa lɛfɔ nwu.⁸⁶Disi otika nkpe di afiofa lɛfɔ amuu suoto;kyakaako mi, diekye batii kowolaa mi kaanya ninambla ni lɛsalɛsaa.⁸⁷Beeloo mi olo odiki kaasɔ suoto,kafɔɔ nindiɛ asaa otuo lɛfɔ.⁸⁸Fũ mi nkpa di lɛbɔmbɔ lɛfɔ nwu kanya,ni kamabla di kanya lɛfɔ lɛkakatɛ suoto.

Ofũ Onu Di Saate Nwu Kufiofa Kamɛ

⁸⁹O Saate, ɔlaa lɛfɔ nnaa kaloo;kuyɛ kpinkpĩ di osi.⁹⁰Onukwale lɛfɔ makyɛ kunfe di ana lɛfɔ amuu kamɛ;fɛɛtɛ kasɔ, ni kate dinaa ni kaloo nɛ.⁹¹Afiofa lɛfɔ nte anaa kaloo ɛɛbadu dii le mmle,diekye asaa amuu kosumu fɔ.⁹²Nse diele kufiofa lɛfɔ ninle mi suoto lɛyɔɔ,see ntabakpi di nimiina nii kamɛ.⁹³Namayee asaa otuo lɛfɔ diidii,diekye nnya faayɔ faafũ mi nkpa nɛ.⁹⁴Fũ mi nkpa, diekye ole fɔ nle,ntootikanko asaa otuo lɛfɔ.⁹⁵Bakpiletɛ nsoko mi alɛ bɔɔwɔɔsɛa mi,kafɔɔ kamabu sɛsaabla lɛfɔ disi.⁹⁶Kɔnya kase di asaa ya amuu niewo ni nimu;kafɔɔ afiofa lɛfɔ nnaa kase.

Lɛbɔmbɔ Diɛta Ni Saate Nwu Kufiofa

⁹⁷O, mmle nimbɔmbɔ ni kufiofa lɛfɔ nwu!mbu disi ninwu suoto dii kufĩ kumu.⁹⁸Afiofa lɛfɔ nwu ntɛɛ mbe anu nlenkee balo nii,diekye akpe di ɔkyɛ nii obe lele.⁹⁹Nkpe nya lɛsɔnu nlenke asaa batuotɛ nii bamuu,diekye mbu disi di sɛsaabla lɛfɔ suoto.¹⁰⁰Nkpe lɛsɔnu nlenke banɔɔfo,diekye nkyɔɔ asaa otuo lɛfɔ kotoko.¹⁰¹Ntookpukutisa nkpaa nii di okpile biala osuku suotodi mmle kakyɔɔ ni ɔlaa lɛfɔ kotoko.¹⁰²Nindiɛ afiofa lɛfɔ ole,diekye afɔ omu niatuo mi asaa.¹⁰³Sɛlaa lɛfɔ lɛmɛnɛ mi,siɛmɛnɛmɛnɛ silenke bablɔ di kanya nii!¹⁰⁴Nwɛ lɛsɔnɔ nkyeko asaa otuo lɛfɔ kamɛ;nioso lekyidi osuku kpile biala.

Lɛkpa Le Niekye Ni Saate Nwu Kufiofa Kamɛ

¹⁰⁵Ɔlaa lɛfɔ nle kandiɛ kuɔta nkpaa niilɛkpa kafɔɔ diɛta osuku nii.¹⁰⁶Ntɔɔka ntam letika difuɔ kafɔɔ,nlɛ kamatikanko afiofa tinini lɛfɔ nwu.¹⁰⁷Ditoobuo mi diɛpɔ;O Saate, tɛɛ nsiɛ nkpa di ɔlaa lɛfɔ nwu kanya.¹⁰⁸O Saate, fũ kanya nii kamɛ katansa,faatuo mi kafɔɔ afiofa lɛfɔ nwu.¹⁰⁹Kuntɛ lɛtɛ lɛyɔ nkpa nii nkle ninnɛɛ nii yi,namayee kufiofa lɛfɔ nwu.¹¹⁰Bakpiletɛ nwu ntɔɔkyɔɔ mi okũ,kafɔɔ ninkyi asaa otuo lɛfɔ kamaa.¹¹¹Sɛlaa lɛfɔ ninle mi atesaa dinaa ni kaloo,sile otu nii kamɛ suoto lɛyɔɔ.¹¹²Otu nii ntika di afiofa lɛfɔ ole suotodiɛlaase ni di kayɛntɛkɔ kamu.

Katitĩi Di Saate Nwu Kufiofa kamɛ

¹¹³Lekyidi batii ba asibu ninle ni anyɔ anyɔ,kafɔɔ mbɔmbɔ kufiofa lɛfɔ.¹¹⁴Afɔ ninle mi katanikokɔ ku difuɔnkpaa nii;ntɔɔyɔ osuku onyu nii letika di ɔlaa lɛfɔ suoto.¹¹⁵Bla di suoto nii, afɔ sikpilebablatɛ,alɛ kale Yaa nii afiofa!¹¹⁶Mufũ mi faklee di ntam lɛfɔ kanya, ni masiɛ nkpa;tanta nnɛɛ lafee mi di osuku onyu nii suoto.¹¹⁷Mufũ mi fase, ni babadiki mi;obe lele nkpe dibu lɛta afiofa lɛfɔ.¹¹⁸Feesĩ mba bamuu nieyu ni osuku di afiofa lɛfɔ suoto.¹¹⁹Feefuki bakpiletɛ bamuu di kasɔ suoto feeyu fɛle aku;nioso mbɔmbɔ sɛlaa lɛfɔ.¹²⁰Ami omu kɔyɛkɛ fɔ ku ditũtũkũ;n-yɛ ku difu di kufiofa lɛfɔ nwu suoto.

Kotoko Ɔkyɔɔ Di Saate Nwu Kufiofa Suoto

¹²¹Ntɔɔbla nle niɛbla ni tinini dite ni nkpo kafɔɔ;tandiɛ mi faata mba nikonyinka mi nii.¹²²Tika difuɔ di kpɛmblatɛ lɛfɔ lɛlɛ suoto;tanta mba ninkanta ni lanyinka mi.¹²³Ditoobuo anu nii, oowolaa ni didiki lɛfɔ nwu,oowolaa ntam lɛfɔ tinini nwu.¹²⁴Bla fata kpɛmblatɛ lɛfɔ di lɛbɔmbɔ lɛfɔ kanyafaatuo mi afiofa lɛfɔ.¹²⁵Kpɛmblatɛ lɛfɔ nle, tɛɛ lɛsaatofoalɛ kanu sɛlaa lɛfɔ kasɔ.¹²⁶O Saate, obe ntoowo fɔ faadiki ni kɔkpaa;bɔɔlalaasa kufiofa lɛfɔ nwu.¹²⁷Diekye mbɔmbɔ afiofa lɛfɔ nwunlenkee koto sɛɛle, nlenkee koto sɛɛle nwaa,¹²⁸ta mmle nimbu ni disi kafɔɔ di asaa otuo lɛfɔ amuu nwaa,lekyidi osuku kpile biala.

Anu Otika Di Saate Nwu Kufiofa Ole Suoto

¹²⁹Asaa otuo lɛfɔ lɛbla ɔkpɛ;nioso nkyɔɔ nya kotoko.¹³⁰Sɛlaa lɛfɔ kasɔ odiki nta lɛkpa;sinta mba nin-ye ni lɛsaa nnu kasɔ.¹³¹Mpɛsɛwa mbɛ kanya nii ntɛ,nsoko afiofa lɛfɔ nwu kafɔɔ.¹³²Munikĩi fawa ɔkyɛ nii faanyɛɛ nyaami,fɛ mmle fambla ni obe lele fanta ni mba nimbɔmbɔ ni leyooto lɛfɔ nwu.¹³³Tuo nnafukpaa nii osuku di ɔlaa lɛfɔ nwu kanya;tanta okpile kuonwii lale sika di suoto nii.¹³⁴Diki mi di batii ninyinka kamɛ,alɛ kakyɔɔ asaa otuo lɛfɔ kotoko.¹³⁵Ta anu lɛfɔ akpa akpete kpɛmblatɛ lɛfɔfaatuo mi kafɔɔ sisuku lɛfɔ.¹³⁶Nnumɛɛ seklenyii kobiɛ sinkye anu nii,diekye bloole kufiofa lɛfɔ nwu.

Saate Nwu Kufiofa Tinini Nwu

¹³⁷O Saate, tininitɛ fale,afiofa lɛfɔ kafɔɔ nkyɛ di osuku kanya.¹³⁸Asaa otuo ya fɛɛtɛ ni nte tinini;ɛɛtɛ ale disi ditikasaa.¹³⁹Nnɛɛ nfee midiekye balo nii lesĩ sɛlaa lɛfɔ nwu.¹⁴⁰Ntɔɔsɔ ntam lɛfɔ nwu lenyu lefenko,nioso kpɛmblatɛ lɛfɔ mbɔmbɔ mi.¹⁴¹Nu ninandie lɛsalɛsaa, bɔɔnyɛɛ nyakatãa kafɔɔ yi,nin-yee asaa otuo lɛfɔ nwu.¹⁴²Ɔsaabla tinini lɛfɔ nnaa kalooonukwale kafɔɔ di kufiofa lɛfɔ nwu nle.¹⁴³Dibuo ku nimiina ntɔɔwa mi di suoto,kafɔɔ afiofa lɛfɔ nle mi suoto lɛyɔɔ.¹⁴⁴Sɛsaabla lɛfɔ lɛkpa kɔmɛ dinaa ni kaloo,tɛɛ lɛsɔnu alɛ kasiɛ nkpa.

Ɔlaa Ɔpɛ Diɛta Ni Didiki

¹⁴⁵O Saate, kɔlɛɛ fɔ ku otu nii omuu; tuna fatɛɛ,kamale afiofa lɛfɔ nwu kafɔɔ.¹⁴⁶Lɛlɛɛ fɔ; diki mikamamufũ asaa otuo lɛfɔ nwu nklee.¹⁴⁷Ntaka nnwi kaku diɛta ni lɛkyakaako fiɛ di kolesɛtũ nwo,ntɔɔyɔ osuku onyu nii letika di ɔlaa lɛfɔ suoto.¹⁴⁸Nimmaasa anu nii kakyɛ kamuu,alɛ kabu disi di ntam lɛfɔ nwu suoto.¹⁴⁹Nu mi sɛlɔ, di lɛbɔmbɔ lɛfɔ nwu kanya;O Saate, fũ mi nkpa, di afiofa lɛfɔ nwu kanya.¹⁵⁰Amumubablatɛ ninkũ ni kanwumbe ntɔɔtɛɛtɛɛ,kafɔɔ beekyo di kufiofa lɛfɔ nwu suoto.¹⁵¹O Saate, afɔ fɛɛtɛɛtɛɛ,onukwale kafɔɔ di afiofa lɛfɔ nwu nle.¹⁵²Saa yi, latekete asaa lakyeko asaa otuo lɛfɔ nwu kamɛalɛ faatɛ nya alɛ aate dinaa ni kaloo.

Lekoto Otikiti Diɛta Ni Lɛkyakaako

¹⁵³Nyu dibuo nii, faadiki mi,diekye nin-yee kufiofa lɛfɔ.¹⁵⁴Buɛ ɔlaa nii fatɛɛ faadiki mi kafɔɔ;fũ mi nkpa di ntam lɛfɔ nwu kanya.¹⁵⁵Didiki lɛkyo di bakpiletɛ suoto,diekye mann-wola sisuku lɛfɔ.¹⁵⁶O Saate, sibualɛ lɛfɔ lɛmuɔ;fũ mi nkpa di afiofa lɛfɔ nwu kanya.¹⁵⁷Bakyiditɛ ba nikomiɛ mi ni dikpile mpɔ,kafɔɔ ninkyi di afiofa lɛfɔ kamaa.¹⁵⁸Nnyu mba ninaa ni ofũonu ku ɔblɔ,diekye mann-kyɔɔ ɔlaa lɛfɔ kotoko.¹⁵⁹Nyu mmle nimbɔmbɔ ni asaa otuo lɛfɔ;O Saate, fũ mi nkpa di lɛbɔmbɔ lɛfɔ nwu kanya.¹⁶⁰Sɛlaa lɛfɔ nwu simuu nle onukwale;afiofa tinini lɛfɔ nwu nkpe anaa ni kaloo.

Saate Nwu Kufiofa Okleklesa

¹⁶¹Batunletɛ kodieko mi ninambla ni lɛsalɛsaa,kafɔɔ otu ni ntũtũkũ di ɔlaa lɛfɔ suoto.¹⁶²Nnya suoto lɛyɔɔ di ntam lɛfɔ suotofɛle otii wɔ niɛwɛ ni kakpɛ kamɛ asaa kplɛ.¹⁶³Lekyidi ayududusaa ku sɛlaa ku afunukafɔɔ mbɔmbɔ kufiofa lɛfɔ.¹⁶⁴Sikuɛnsĩ di dii kamɛ nintansa fɔdiɛta ni afiofa tinini lɛfɔ nwu.¹⁶⁵Atoko ɔkyɛ ole kplɛ nkpe mba nimbɔmbɔ ni kufiofa lɛfɔ,lɛsalɛsaa dilaata ma batuula.¹⁶⁶O Saate, nsoko didiki lɛfɔ,ntikanko kafɔɔ afiofa lɛfɔ.¹⁶⁷Mmufũ sɛsaabla lɛfɔ nklee,mbɔmbɔ sĩ osie kanya.¹⁶⁸Nkyɔɔ asaa otuo ku sɛsaabla lɛfɔ kotoko,diekye faye sisuku nii simuu.

Ɔlaa Ɔpɛ Diɛta Ni Lɛkyakaako

¹⁶⁹O Saate, kaku owi nii kɔwa anu lɛfɔ;tɛɛ lɛsɔnu di ɔlaa lɛfɔ nwu kanya.¹⁷⁰Ta ɔlaa ɔpɛ nii kuwa anu lɛfɔ;diki mi di ntam lɛfɔ nwu kanya.¹⁷¹Ta anyasibi nii ayiisa kudu ku katansa,diekye feetuo mi afiofa lɛfɔ.¹⁷²Ta ɔkplalomii nii kusa sɛlaa lɛfɔ sinu,diekye afiofa lɛfɔ nte tinini.¹⁷³Ta kɔnɛɛ lɛfɔ kulolaa suoto kuɔbakyakaako mi,diekye ntoodiki asaa otuo lɛfɔ nwu.¹⁷⁴O Saate, nsoko didiki lɛfɔ,kufiofa lɛfɔ ninle mi suoto lɛyɔɔ.¹⁷⁵Tɛɛ nsiɛ nkpa alɛ katansa fɔ,alɛ afiofa lɛfɔ kaklee mi.¹⁷⁶Ntooyu osuku fɛle foso.Wolaa kpɛmblatɛ lɛfɔ,diekye nin-yee afiofa lɛfɔ nwu.

The Seed Company

https://app.library.bible/content/6b5691c19d7261b4