SINU109
Otii Wɔ Ninsi Ni Di Dibuo Kamɛ Ɔlaa
Dawid onu. Kuɔta ni sinutuotɛ.
1O Yaa, nnwɔ nintansa ni,tanlo kanana,2diekye bakpiletɛ ku bakyɔnkyɔtɛntɔɔbɛ nnya lɛma di suoto nii;batɔɔkakatɛ di suoto nii ku sɛlaa ku afunu sɛkplalomii.3Bɛɛmana mi beekyi ku kakyidi sɛlaa;mandieko mi ninambla ni lɛsalɛsaa.4Di sisiɛwo nii kanya yi, ɔlaa bɔɔyɔ di suoto nii,kafɔɔ nle otii wɔ nimpɛ ni ɔlaa.5Bɛɛyɔ dikpile bɔɔta dibene nii koto,baakyidi mi di sisiɛwo nii kanya.6Diki otii kpile aadieko nwɔ;ta kanyabuditɛ ayila di oletanɛɛkyɛ nɔɔ.7Nse bɛɛkanko nwɔ, ta balo nwɔ lɛpɔɔ,faata kafɔɔ ɔlaa ɔpɛ nɔɔ kutɛ nwɔ kolò.8Ta ayi nɔɔ abla kafui;ta otii bamba ayila di tunletɛ kayilakɔ nɔɔ nwu.9Ta babi nɔɔ bale bakuɛbiɔsɔfɔ nɔɔ kafɔɔ ale kpisɔfɔ.10Ta babi nɔɔ bale banyanyitɛ batookyi;ta badiki ma di ayo biɛle lɛma kamɛ.11Ta otii wɔ niafɛnsa nwɔ ni asaa afũ asaa ya amuu ninkpe nwɔ ni;ta bafɔɔ bayɔ dibuo nɔɔ kamɛ asaa.12Tanta kuonwii labla nwɔ sifutulɛee anya bakuɛbi nɔɔ nwu nyaami.13Ta banantii nɔɔ baloo,bayɛɛsa ayooto lɛma di kɔna ko nikɔwa ni kamɛ.14Ta banyuma bate nɔɔ ɔtanlolaa ɔbla di Saate nwu anu;tanta baayɛɛsa ɔya sikpile diidii.15Ta sikpile lɛma sika di Saate nwu anu,alɛ alasinyuma ma di kasɔ nwu suoto.16Diekye diidii atanyu alɛ ɔɔbla sifutulɛ,kafɔɔ bapiitɛ antikanko anloku mba diefĩ ni ku mba di situ kobiɛ ni.17Aabɔmbɔ lɛkpaani sɛlaa-ta ni diwa nwɔ di suoto;suoto nin-yɔɔ nwɔ di lɛyɔɔ owii suoto-ta dikyɛ lookyo di suoto nɔɔ.18Ankpee akpaani fɛ akpeele nɔɔ;ta dibuo di suoto nɔɔ kamɛ fɛle ntu,di akufi nɔɔ kamɛ fɛle nnɔnyi.19Ta dite fɛle akpeele beemiminisa nwɔ,fɛle ofiamɛ beenii beekyisa nwɔ, dinaa ni kaloo.20Ta nle mmle dile Saate nwu letota dita kanya nii babuditɛ,dita mba nikɔkakatɛ ni dikpile kanya di suoto nii.21O Saate Kplɛ, kafɔɔ afɔ,klee mi nwaa di leyooto lɛfɔ kanya;ta lɛbɔmbɔ lɛfɔ biene nwu oso, diki mi.22Diekye dipii nkle mi, diefĩ mi kafɔɔ,otu nii kafɔɔ lefũ kakɔ kaamɛ nii.23Kɔyɛ fɛle kɔtɔɔfɔ kunyii;bɔɔkpa mi man-yu fɛle letroee.24Ntoonii kanya akunkyi nii lɛkpakpaa;ntookoso lɛbla wakalaa kafɔɔ.25Nle lɛmansaa lɛta kanya nii babuditɛ;nse bɛɛnyɛɛ, mantũkunsa asi lɛma.26O Saate Yaa nii, kyakaako mi;diki mi ku lɛbɔmbɔ lɛfɔ nwu.27O Saate, ta ma batofo alɛ kɔnɛɛ lɛfɔ nwu,niɛbla ni nɛ.28Baafuo ɔkpaani, kafɔɔ afɔ fabawii lɛyɔɔ;nse bɛɛtaka, babakpee ma sinunsɔ,kafɔɔ kpɛmblatɛ lɛfɔ kamanya suoto lɛyɔɔ.29Sinunsɔ kamamana kanya nii babuditɛ sinkyimanunsɔ kafɔɔ fɛ dibula beenyukũ.30Kamatakatɛsa Saate nwu katoo ku kanya nii;di batii dikudi kplɛ kamɛ kamatansa nwɔ.31Diekye anyila di nnwɔ diefĩ ni oletanɛɛkyɛ,anfũ nkpa nɔɔ ankyeko mba nielo nwɔ ni kukpi lɛpɔɔ nnɛɛ.The Seed Company