YOSUA9
Gibeon Batii Lakyɔnkyɔ Yosua
1Di obe wɔ di baka ba bamuu niawɛ ni di Yordan kufĩ kamɛɛkɔ lanu ni sɛlaa se mmle- mba di lekpenkpe kale ku kufĩ kamɛɛkɔ akpenkpe nkpaa ku Lekpo Kplɛ kotoko basiɛtɛ bamuu, dialaadu bia Lebanon (Heti batii, Amori batii, Kanaan batii, Perisi batii, Hewi batii ku Yebusi batii baka)-2lasi baabla onwii di Yosua ku Israel suoto.3Kafɔɔ di Gibeon batii lanu ni lɛsaa le di Yosua labla ni Yeriko ku Ai yi,4baafe di kakyɔnkyɔ osuku: Baakyɛ fɛ kɔtɔ bakyɛntɛ ba di babɔkɛɛ ba nintuka ni atoo nintuka ni bakotoku tɔle ku nta akukuuku kofole ya niebibiɛ beetĩtĩi nii.5Basuɔtɔ nwu lakpee ntokota bɛbɛɛle bɛɛkakaa ni ninkpaa lɛma, baakpee kafɔɔ akpeele kofole. Bloblo ku alesaa lɛma ya amuu baaklee ni laklee aakoso aapɛ kufuta.6Ni baakyɛ Yosua nfũ di kasiɛkɔ nɔɔ di Gilgal baalaatɔkɔ nnwɔɔ ku Israel batii alɛ, "Buokye kale kyonle buɔwa; buomiɛ bulɛ bibla kanya ninii ku awo.”7Ni di Israel batii latɔkɔ Hewi batii alɛ, “Kafɔɔ loobia bisi bikaako wo. Ni lɛ nfɛ buabla kanya ninii ku aye?”8Ninfɛ baatɔkɔ Yosua alɛ, “Bakpɛmblatɛ lɛfɔ bule.”Kafɔɔ Yosua lakaalɛ ma alɛ, “Bawe bile, ɔfɛ kafɔɔ biekye?”9Ni baabuɛ alɛ: “Bakpɛmblatɛ lɛfɔ lekye kale ka niɛtɛ keekyo ni, ta SAATE Yaa lɛfɔ leyooto oso. Diekye butoonu nwɔ suoto sɛlaa: asaa ya amuu aabla ni di Egipte,10ku asaa ya amuu aabla ni baka nwu banyɔ ninle ni Amori batii ɔka di Yordan kufĩ katunkɔ- Hesbon ɔka Sihon ku Basan ɔka Og wɔ niale ni sɛka di Astarot.11Ni di banɔɔfo loo ku mba ninsi ni di kale loo latɔkɔ wo alɛ, ‘Biyɔ alesaa biklee bita osuku lee ɔkyɛ; bikyɛ biɛlaakyakako ma, biɛtɔkɔ ma bilɛ, “Bakpɛmblatɛ lee bule; bibla kanya ninii ku awo.” ’12Alesaa loo ya mmle lafila di obe wɔ buayɔ nya ni leeyo di dii le buadie bulɛ buɔwa ni ɔkyɛ lee. Kafɔɔ nunua binyu mmle atookoso ɛɛpɛ ni kufuta.13Nta akuuku ya mmle afɔle aale fiɛ buakpete nta, kafɔɔ binyu mmle atomumuɛ ni. Akpeele ku ntokota loo ntɔɔbɛbɛɛ ta osuku nkyonle ɔkyɛ oso.”14Nioso Israel batii lafũ alesaa lɛma nwu, kafɔɔ batakaalɛ SAATE nwu banu fiɛ.15Ninfɛ di Yosua lanii atoko ɔkyɛ ole kanya ku Gibeon batii alɛ basiɛ ninfa, ni di dikudi nwu batunletɛ laka ntam baata ma nɛ.16Di ayi atiɛ sɛmaa, baanii ni kanya ku Gibeon batii yi, Israel batii lanu alɛ bawo lɛma bale basi bakaako ma nii.17Nioso Israel batii layefe osuku, di dii tiɛfa baabuo sekpoo kplɛ lɛma nwu: Gibeon, Kefira, Beerot ku Kiriat Yearim.18Kafɔɔ Israel batii ditadieko ma, diekye dikudi nwu batunletɛ laka ntam di SAATE, Israel Yaa nwu suoto baata ma.
Ninfɛ di Israel batii bamuu lakakakatɛ di batunletɛ nwu suoto nɛ,19kafɔɔ batunletɛ nwu bamuu latɔkɔ ma alɛ, “Butɔɔka ntam loo di SAATE, Israel Yaa nwu suoto buɔta ma, nkpo oso bulaafuo ma ɔkpanko nunua.20Nnya lɛsaa le bubabla ma ni: Bubata ma mansiɛ, ta mmle di ɔblɔ dilɔbawa wo ni di suoto ta buotũ ni ntam be buɔka buɔta ma ni oso.”21Baakple baabuɛ alɛ, “Bita ma basiɛ, kafɔɔ bita ma bale awosoku babuditɛ ku ntu badutɛ bata okpoo omuu.” Nioso baafũ batunletɛ nwu ɔlaa baakpee.22Ninfɛ di Yosua lalɛɛ Gibeon batii aakaalɛ alɛ, “Obe oso biɛkyɔnkyɔ wo bilɛ, ‘Lɛba le busi ni lekyo ku aye,’ obe wɔ di nwaako bisi bikaako wo ni?23Nunua lɛkpaani kalɔ nfɛ bisi: Bilɔbadiɛ awosoku obudi ku ntu odu ɔta di Yaa nii leyo.”24Ninfɛ baatɔkɔ Yosua alɛ, “Baatɛ baatɔkɔ bakpɛmblatɛ lɛfɔ mmle nwu di SAATE, Yaa lɛfɔ latɔkɔ ni kpɛmblatɛ nɔɔ Mose alɛ ayɔ kasɔ nwu kamuu ata ye ni, ku mmle biaawɔɔsa ni kasɔ nwu batii bamuu di anu lee. Nioso buayɛkɛ nkpa loo ta aye oso, nkpo oso buabla nle mmle nɛ.25Nunua nfɛ busi di nnɛɛ lɛfɔ. Bla wo lɛsaa lele ninlɛ, diesiɛko ni kafɔɔ diɛta fɔ ni.”26Nioso Yosua lafũ ma nkpa di Israel batii nnɛɛ, nkpo oso batalo ma.27Dii nwu nkpo, Yosua layɔ Gibeon batii aabla awosoku babuditɛ ku ntu badutɛ aata Israel batii ku SAATE nwu oleɔta akyikye, di lɛba le di SAATE nwu kamatuo nii. Nkpo kafɔɔ bate bia miɛ nɛ.
The Seed Company